Read Navajo PSALMS 49 Bible Online

PSALMS 49 - Navajo bible

PSALMS 49

¹Dadine'é danohłíinii, t'áá ninánooł'ą́ąjį' t'áá ánółtso díí dadoohts'į́į́h. Nihokáá' dine'é nohłíinii, t'áá ánółtso da'íísółts'ą́ą́',

²a'ohgo áádóó aláahgo ádanoht'éii, da'oht'íinii índa nihadahojoobá'ígíí t'áá ánółtso da'íísółts'ą́ą́'.

³Hódzą́ bee yáshti' doo. Áádóó shijéí biyi'di bik'i'diitáanii éí nabik'ítséskees doo.

⁴Hódzą́ągo yáti' yínísts'ą́ą' doo; tsin tł'óół bąąh daneelzhee'go bee nida'a'néii bee na'a'néego saad doo bééhózinii hazhó'ó bee nihił hodeeshnih.

⁵Shich'į' nidahwiiłnáanii doo ákwii ádaat'íinii shinínálzhishgo doo yá'áshǫ́ǫ́góó yoołkáałgo, ha'át'íísh biniyé shił yéé' náhádleeh doo?

⁶Éí t'áá bí deit'íinii yaa dadzólí índa ts'ídíkohgo asht'į́ daaníigo yee ádaa daha'niih.

⁷T'áá háiida doo ła' hak'is bik'é ninázh'doodléeł da, índa hak'is bą́ą́h ílį́ bíighahgo Diyin God doo baa jónííł át'ée da,

⁸háálá bii' naazíinii ayóo ílį́. Áko hool'áágóó ts'ídá doo ałtso bik'é nizh'dooléeł da.

⁹Áko hináago ahool'áa doo, índa doo yóó'ábidi'doolníił da, ch'ééh jinízin.

¹⁰Háálá dahóyáanii daninéego áádóó doo áhályáanii índa naaldlooshii nahalingo doo nitsíkeesii ałdó' áádįįłgo binaalye'é yits'ą́ą́' ahikáahgo náánáła' bíí' nidahaleehgo baa ákoznízin.

¹¹T'áá biyi'ídi ádeinízin, Hool'áágóó shighan si'ą́ą doo, áádóó kééhasht'į́įgi náás oochííłgóó daabíí' dooleeł; shikédaayah t'áá shízhi' yee dayózhíi doo, danízin.

¹²Diné at'į́įgo baa yáhásinii doo hool'áágóó hináa da; naaldlooshii áádįįłii nahalingo hó ałdó' dazdootsaał.

¹³Díí diné doo ádahalyáanii áádóó yee hadahaasdzíi'ii éí ba'áłchíní náás ahoolchíiłii bił t'áá da'ákoígíí ákódaanííł. Síilah.

¹⁴Dibé yah anoolkaad nahalingo jishcháa'di jizhjée' doo; dibé yaa áhályáanii nahalingo anoonééł haa áhályą́ą doo; abíínígo t'áá ákogi ádaat'éii hondant'áa doo, áádóó dahats'íís danizhónígíí jishcháá' góne' dadidoołdził, áko doo kénáádahojit'į́į da doo.

¹⁵Nidi jishcháá' bibee adziilii bits'ąą Diyin God éí shii' sizíinii néidiyoołnih, háálá nááshididoodlééł. Síilah.

¹⁶Diné ła'da at'į́ ábi'diil'įįhgo bighan góne' naalye'é haleehgo t'áadoo bik'ee nił yé'í.

¹⁷Háálá daaztsą́ągo t'áadoo dah yididooléłí da. Hanaalye'é doo t'áá hakéé' dooleeł da.

¹⁸Azhą́ hináago, Shii' sizíinii bił hózhǫ́, nízin nidi, áádóó azhą́ náás ooléełgo bee baa ha'niih nidi,

¹⁹dahazhé'é yę́ę adahaazlį́į́'góó jidooleeł. Áko adinídíín ts'ídá doo deizhdoołtséeł da.

²⁰Diné at'į́įgo baa yáhásinii doo ak'i'diitįįhgóó, éí naaldlooshii áádįįłii nahalingo dazdootsaał.