Read Navajo PSALMS 50 Bible Online

PSALMS 50 - Navajo bible

PSALMS 50

¹Diyin God Ayóó'át'éii, Bóhólníihii nilíinii, nihokáá' dine'é hágo yiłníigo ha'ii'aah áádóó i'ii'aah.

²Záíyan ayóó ánóolninii hadaałt'éii biyi'dóó, Diyin God adiníłdíín.

³NihiDiyin God doogáałgo doo déesxéel da doo. Bilą́ąjį' kǫ' ó'oołdįįł doo. Binaagóó ayóó át'éego níyol doo.

⁴Bidine'é yá nihodiyoo'ááł biniyé yót'ááh hiníláii áádóó nahasdzáán yich'į' ání,

⁵Náá'iiniih bee shidiyį́į́' bił aha'dadi'nisht'ánígíí éí shaa áłah ółééh!

⁶Yót'ááh hiníláii éí Bóhólníihii t'áá ákogi ááníłígíí yaa dahalne', háálá Diyin God t'áá bí ánihwii'aahii nilį́! Síilah.

⁷Shidine'é danohłíinii, dashíísółts'ą́ą'go nihich'į' hadeesdzih. Shoo, Ízrel nihidi'níinii, nihik'ijį' hadeesdzih. Diyin God nishłį́įgo nihí nihiDiyin God nishłį́.

⁸Nááda'ayołniihígíí biniinaa doo nihidideeshteh da. Didlidgo náádahołniihígíí t'áá áłahjį' shidáahgi hólǫ́.

⁹Nihighandóó dóola índa nihidibé bighandóó tł'ízíchǫǫh doo ła' dínéesįįł da.

¹⁰Háálá tsintahgóó naaldlooshii t'áá ałtso shí, índa t'ááłáhídi mííl deílk'idgo bighą́ą́'góó béégashii deíl'áhígíí ałdó' t'áá ałtso shí.

¹¹Dziłdi tsídii naaldeehii t'áá ałtso bééhasin. Áádóó halgaidi naaldlooshii da'a łchinii t'áá ałtso shí.

¹²Dichin sélį́į'go doo bee nihił hodeeshnih da, háálá nahasdzáán éí shí áádóó bikáa'gi dahólóonii t'áá ałtso shí.

¹³Da' dóola bitsį'ísh yishghał, índa tł'ízí bidiłísh yishdlą́?

¹⁴Diyin God bich'į' ahééh hasin náádahołniih áádóó t' áá aaníí ádadohníigo Aláahgo Ayóó'át'éii bich'į' bee ádee hadadoohdzíi'ii bida'dohłííł.

¹⁵Nihide áhoot'įįhgo nídashiinohkąąh, áko yisdánihideeshnił áádóó ayóó át'éego shaa dahohniih doo.

¹⁶Nidi Diyin God éí diné doo yá'áshóonii ííłní, Bee nihoyí'áanii baa hólne'go índa shibee aha'deet'áanii baa yáníłti'go doo bee ná haz'ą́ą da.

¹⁷Háálá na'nitin jiiníłá, áádóó shizaad nidinínáágóó ahíłkaad.

¹⁸Ani'įįhii ła' yiiłtséehgo bił ałch'oní'níi łeh índa diné da'diléii bił nanildeeh łeh.

¹⁹Saad doo adaaníinii t'éiyá bee yáníłti'go ánósin. Áádóó nitsoo' na'adlo' ííł'į́.

²⁰T'áá ni nik'is nibíyáníłti'go sínídáa łeh; t'áá ni nimá biyáázh t'áá ádzaagóó aa yáníłti' łeh.

²¹Díí baa nisíníyá. Shí éí t'óó dííníshhéél nít'éé'. T'áá shígi ájít'é nínízingo shaa nitsíníkees nít'éé'. Nidi k'ad éí nidideeshteh, baa nisíníyáhígíí ałkéé' sinilgo bee nił hashne' doo.

²²Nihí Diyin God baa dayoohnéehii, k'ad díí baa ntsídaohkees; doo ádaoht'į́į́góogo t'óó nanihidiyeeshdlałgo doo ła'da yisdánihidiyoonił da.

²³T'áá háiida ahééh nízingo shich'į' náá'iiłniihii éí shaa haniih, áádóó t'áá háiida t'áá ákogi át'éego yinaha'áii Diyin God bee yisdá'iildéehii bich'į' ííshjání ádeeshłííł.