Read Navajo PSALMS 55 Bible Online

PSALMS 55 - Navajo bible

PSALMS 55

¹Diyin God nílíinii, shisodizin yíníłts'ą́ą́', áádóó nánooshkąąhígíí t'áadoo bits'ąą na'ádiníl'iní!

²Shííníłts'ą́ą'go shich'į' ééhonísįįh, háálá saad honishłónígíí índa nidish'ni'ígíí bik'ee nitsinishtłah.

³Háálá shi'ana'í hahóół'á, áádóó diné doo yá'ádaashóonii shich'į' nidahwiiłná. Háálá doo ákwii át'éii shik'ijį' deidiyiiłtááh, áádóó bádahachį'go dashijoołxá.

⁴Shijéí t'áá íiyisí yidíłniih. Anoonééł bik'ee hóyée'ii shik'i dahoole'.

⁵Shił yéé' hazlį́į́' áádóó shitah hodiis'náá' índa ts'ídá t' áá íiyisí t'óó bik'ee shił hóóyéé'.

⁶Áko ádíshní, Hasbídí nahalingo shit'a' hólǫ́ǫ doo yę́ę, áko éí bee yóó'adeesht'ahgo háadida hanáshyį́įh doo nít'éé'.

⁷Jó, ákót'éego éí nízaadgóó adeeshááł nít'éé'; honoojíidi hanáshyį́įh doo nít'éé'. Síilah.

⁸Ayóó át'éego níyol áádóó t'óó báhádzidgo níyol bits'ąą tsxį́įłgo niiłt'ádiich'ijį' yóó'adeesht'ah nít'éé'.

⁹Bóhólníihii nílíinii, éí bił dahóhłąąh índa bizaad bits'ą́ą́' ałtaa nánínił, háálá éí kin haal'áagi diné ádéédahooldzíihgo índa ahináádiijahgo yiiłtsą́.

¹⁰T'áá ákwíí jį́ índa t'áá ákwíí tł'éé' éí kin haal'á binaa ahééda'astł'inígíí bighą́ą'di nidaakai áádóó doo ákwii át'éii índa ádílááh bitahgi hólǫ́.

¹¹Kintahgóó doo yá'áshóonii baa na'aldeeh. Kintah da'nítiingóó ade áhólzinii índa yooch'ííd doo yóó'adeidi'aah da.

¹²Háálá shá nahast'i'ígíí éí doo shi'ana'í át'į́į da lá, éí át'į́įgo éí bich'į' ha'ííníshníi doo nít'éé'. Índa shik'ee deeznihii shich'į' ayóó át'éego í'diilyaii doo éí át'į́į da lá. Éí át'į́įgo éí bits'ąą nídideesht'į́į́ł nít'éé'.

¹³Nidi ni ánít'į́į́ lá; diné t'áá bił ahinisht'éii, bił tádísh'aashii, shik'is nílíinii, ni ánít'į́į́ lá;

¹⁴łikango ahił náhwiilnih nít'éé'. Diyin God bikingóó k'é ahidii'níigo lą'í bił neiikai nít'éé'.

¹⁵Bíni' t'áadoo kót'é ílíní daniné, bíni'dii t'áá dahináago ch'į́įdiitahgóó ahikááh, háálá kéédahat'į́įgi índa dabitahgi ts'ídá doo yá'áshóonii hólǫ́.

¹⁶Nidi shí éí Diyin God néideeshkąął, áádóó Bóhólníihii yisdáshidoołtééł.

¹⁷E'e'áahgo índa abínígo áádóó ałné'é'áahgo t'áá niná'deet'įįhjį' sodiszin; t'áá niná'deet'įįhjį' yéego ná'ooshkąąhgo shiinéé' yididoots'į́į́ł.

¹⁸Naashbaahdę́ę́' t'áadoo át'éhígóó hózhǫ́ǫgo shii' sizíinii yisdéidoołtééł, háálá lą'í shit'ááh nájah.

¹⁹Diyin God, t'áá ałk'idą́ą́' hoo'áałii shididoots'į́įłgo atíhodoolííł. Síilah. Háálá doo łahgo ádajinéhígíí bąą Diyin God doo dazhdísin da.

²⁰Yił k'é ahidi'níinii yich'į' nát'ą́ą́' ninálwod; yił aha'deet'áanii k'íinínizh.

²¹Bizaad łikango yáłti', nidi bijéí biyi'di t'éí anaa' nidzin; ak'ah yilzhólígíí bilááh át'éego yáłti', nidi yee yáłti'ígíí diltłish nahalingo bik'eda'ashch'íí'.

²²Bee nide áhoot'éhígíí Bóhólníihii baa diní'aah, áko naa áhályą́ą doo. Diné t'áá ákogi át'éii nahjį' kóbidi'doolníłígíí ts'ídá doo yee hwiidooł'aał da.

²³Nidi Diyin God nílíinii, ni éí a'áán góyaa ó'ooldįįłjį' ahodííłkał. Diné nideiłtseedgo dił bits' ádaazlį́įgo ádeile'ii índa binda'adlo'ii doo nízaadgóó dahináa da doo, nidi shí éí naa jííníshłíi doo.