Read Navajo PSALMS 56 Bible Online

PSALMS 56 - Navajo bible

PSALMS 56

¹Diyin God nílíinii, shaa jiiníbaah, háálá diné t'áá adashółneehgo shaa nitsídaakees. Shá bíighah shi'ana'í danilíinii shide ádahósin.

²Aláahgo Ayóó'át'éii nílíinii, shá bíighah shi'ana'í t'áá adashółneehgo shaa nitsídaakees, háálá lą'í dashóbááh.

³Shił yéé' náhádleehgo t'áá íiyisí naa jííníshłíi doo.

⁴Diyin God bizaad baa hashniih; éí Diyin God nilíinii baa jííníshłí. Diné haada shizhdoolíiłgi doo binásdzid da.

⁵Shá bíighah shizaad t'áá ádzaagóó nideigiz. Doo yá'áshóonii t'éiyá yee shich'į' nitsídaakees.

⁶Shiniyé ahínéiikah. Shaa nidahaakai; shii' sizíinii yaa héeshjée'go hidishááhgóó shikék'eh hashchíínígóó hadeisííd.

⁷Doo ákwii ádajooníłígíí bąą ch'íhíłtł'iid. Diyin God nílíinii, hashké niidzįįhgo dadine'é naa'ahíłtł'iid!

⁸Tádíshááhgóó baa ákonínízin. Shinák'eeshto' nitózis bii' hasht'e'nihízííd. Éí ninaaltsoos biyi' ádaalyaa.

⁹Nánooshkąąhgo lą́ą, shi'ana'í danilíinii t'ą́ą́' hadookah ni. Éí shił bééhózin, háálá Diyin God shich'ijí nilį́.

¹⁰Diyin God bizaad baa hashniih doo. Bóhólníihii bizaad baa hashniih doo.

¹¹Éí Diyin God nilíinii baa jííníshłí. Diné haada shizhdoolíiłgi doo binásdzid da.

¹²Diyin God nílíinii, nich'į' bee ádee hahásdzíi'ii shich'į' si'ą́; ahééh nisingo naa hashniih doo.

¹³Háálá anoonééł bits'ą́ąjį' shii' sizíinii yisdéíníłtį́: áko iiná bee adinídííngóó Diyin God bá hinishnáa doo biniyé, doo dishgeehgóó áshiinilaa.