Read Navajo PSALMS 57 Bible Online

PSALMS 57 - Navajo bible

PSALMS 57

¹Shaa jiiníbaah, Diyin God nílíinii, shaa jiiníbaah, háálá díí báádahadzidgo ádahooníłígíí ałtso eeldojį' shii' sizíinii t'áá aaníí naa dzólíigo nit'a' biyaagi nehesdzíih doo.

²Diyin God Aláahgo Ayóó'át'éii nilíinii, Diyin God t'áá ałtsoní shá ła'yoolíiłii néideeshkąął.

³Shá nahałt'i'go t'áá ashółneehgo shaa nitsíkeesii bits'ąą yisdáshidoołtééł biniyé yá'ąąshdę́ę́' shaa'dool'aał. Síilah. Diyin God yee aa a'ááh nízinii índa bit'áá aaníinii shich'į' ch'íididoo'ááł.

⁴Náshdóítsoh bitsiijį' daditł'ooii nidahojílinii hatahgi shii' sizíinii hólǫ́. Éí bizéé'dę́ę́' kǫ' hadadino' nidahalingo nídadidzihii bitahgi sétį́. Éí nihokáá' diné danilíinii dabiwoo' tsiidétáán áádóó k'aa' nidahalin. Dabitsoo' éí diltł ish deeníinii nidahalin.

⁵Diyin God nílíinii, yá'ąąsh biláahgo ayóó ánít'ée le'! Bee ayóó ánít'éii nahasdzáán t'áá náhwiiz'ą́ą́ nít'éé' biláahgo baa ha'niih le'.

⁶Yishááłgóó łoh shiniyé ninádei'ááh. Shii' sizíinii bąąh nááháka'. Shidáahdi shá hadahwiizgeed, nidi t'áá bí yiih náníídee'. Síilah.

⁷Shijéí bohoníłdzil, Diyin God nílíinii, shijéí bohoníłdzil. Naa hashniihgo nich'į' hashtaał doo.

⁸Shii' sizíinii ch'éénídzííd! Tsin tł'óół neeznáá bąąh daneelzhee'go bee nida'a'néii áádóó tsin tł'óół naakits'áadah bąąh daneelzhee'go bee nida'a'néii nohłíinii, ch'éénóhdzííd! T'óó hoos'įįdą́ą́' ch'éédeesdził.

⁹Bóhólníihii nílíinii, diné bitahgóó naa hashniih doo. Ał'ąą dine'é bitahgóó naa hashniihgo nich'į' hashtaał doo.

¹⁰Háálá aa a'ááh nínízinii yá'ąąsh bilááh át'é áádóó nit'áá aaníinii k'os bíneel'ą́.

¹¹Diyin God nílíinii, yá'ąąsh biláahgo ayóó ánít'ée le'! Bee ayóó ánít'éii nahasdzáán t'áá náhwiiz'ą́ą́ nít'éé' biláahgo baa ha'niih le'!