Read Navajo PSALMS 62 Bible Online

PSALMS 62 - Navajo bible

PSALMS 62

¹T'áá aaníí shii' sizíinii déesyéelgo Diyin God yiba' át'é. Bí t'éí yisdáshiiłteeh.

²T'áá bí t'éiyá tsé shá nilį́ áádóó bee yisdáhásháahii índa bine' ahinishchéehii nilį́. Ts'ídá doo nahjį' kóshidi'doolníił da.

³Haa nízáágóó ach'į' nahwii'ná bee t'áá ánółtso diné bindahoh'áa doo? Áko tsé ahénátł'ingo nídíníizhoozhgo naałdaasígíí áádóó anít'i' diniitłóo'ii nahalingo bida'noołhį́.

⁴Aląąjį' dzizínídóó nahjį' háádahodiyiilghą́ą́ł danízingo hondaha'á. Wooch'ííd ayóogo baa bił dahoneeni. Ak'idajidlíigo yádaałti', nidi ódziih bii' dahólǫ́. Síilah.

⁵Shii' sizíinii nílíinii, Diyin God t'éiyá biba' ánít'é, háálá éí bits'ą́ą́dę́ę́' shił chohoo'į́.

⁶T'áá bí t'éiyá tsé shá nilį́ áádóó bee yisdáhásháahii índa bine' ahinishchéehii nilį́. Doo nahjį' kóshidi'doolníił da.

⁷Bee yisdáhásháahii áádóó bee ił nishłíinii Diyin God bílák'ee silá. Diyin God éí tsé bee shidziilii nilį́, áádóó bine' nehesdzíihii nilį́.

⁸Diné danohłíinii, t'áá áłahjį' Diyin God baa dadzíínóhłí. Bídin danohłíinii t'áá ałtso danihijéí tł'ááhdę́ę́' bee bi ł dahołne'. Diyin God bine' ahiniichéehii nihá nilį́. Síilah.

⁹Diné baa hojoobá'ígo naaldeehii t'áadoo nánídlíní da; diné baa yádahasinii éí t'óó ádaat'é; díí t'áá áłah dahidiidleehgo ayol t'áá bich'į'go ászólí yee'; t'áadoo náádleełí da.

¹⁰Ade ádahwíínóhsinígíí t'áadoo bada'íínóhłíhí. Diné łídaocházhígíí binahjį' adeesht'įįł t'áadoo danohsiní; jit'íinii hodidileehgo t'áadoo nihijéí bee bíchą́deídółni'í.

¹¹Díigi át'éego Diyin God t'ááłáhídi haadzíí', áádóó naakigo ałkéé' haz'ą́ diséts'ą́ą́'; Diyin God éí bidziil,

¹²áádóó ałdó' Bóhólníihii nílíinii, aa a'ááh nínízin, háálá diné t'ááłá'í nítínígo ádáát'įįdígíí bik'ehgo bich'į' ni'iyílé.