Read Navajo PSALMS 63 Bible Online

PSALMS 63 - Navajo bible

PSALMS 63

¹Diyin God nílíinii, shiDiyin God nílį́; ts'ídá t'áá aaníí hándínísh'į́į' doo. Kéyah náhooltseii áádóó nídínéesdzáago tó ádindi shii' sizíinii níká dibáá' nilį́ áádóó shits'íís nídin nilį́.

²Áko bee nidziilii índa bee ayóó ánít'éii yideestsééł biniyé kin bii' sohodizin góne' hándéé'į́į́'.

³Jó, iiná biláahgo aa a'ááh nínízinígíí bee naa hashniih doo.

⁴Kót'éego ni'níłdįįd bijį́įjį' naa hashniih doo. Dego dah nídidiishnihgo nízhi' bee naa hashniih doo.

⁵Awol áádóó ak'ah jííyą́ą́' nahalingo shii' sizíinii hwiih nilį́ áádóó shił hózhǫ́ǫgo naa hashniih.

⁶Shitsásk'eh bikáá' sítį́įgo nénáshniih, áádóó tł'ée'go ch'énínásdzi'go naa nitséskees.

⁷Háálá shíká anánílwo' nít'éé', áko nit'a' biyaagi k'ad shił hózhǫ́.

⁸Shii' sizíinii yéego nikéé' ahidíízį́; ninish'náájí bee nisdzilgo áshíínísin.

⁹Nidi shii' sizíinii ádazhdoołdįįł biniyé hádajit'íinii éí nahasdzáán biyi' ayóó ánízáád góyaa dazhdooleeł.

¹⁰Diltłish bee nidahodi'dootsił. Mą'ii dahodoolghałii dajílį́į doo.

¹¹Nidi aláahgo naat'áanii éí Diyin God yaa bił nihoozhǫǫh doo. T'ááłá'í jinítínígo t'áá aaníí ádajiníigo ádee hadahizhdidziihii éí hoł dahózhǫ́ǫ doo, nidi dabiyooch'íidgo yádaałti'ii dahodi'doolyił.