Read Navajo PSALMS 64 Bible Online

PSALMS 64 - Navajo bible

PSALMS 64

¹Diyin God nílíinii, sodiszingo shiinéé' diits'į́į́h. Shi'ana'í bik'ee shił yé'ígíí bits'ąą shaa áhólyą́.

²Diné doo yá'ádaashóonii t'áá nahont'inee shindaha'áago doo ákwii ádaaníiłii shide nídahidiikáahii bits'ąą náshidíł'įįh.

³Diltłish deeníinii nahalingo dabitsoo' yee saad da'digishii yee ayánínáda'niiltih. K'aa' bee éézhnítah nahalingo saad bik'i da'ashch'íi'ii yee éédantah.

⁴Áko diné t'áadoo bee bik'íhót'ahí daígíí nahont'indę́ę́' dayółt'óóh. T'áadoo hooyání dahółt'óohgo doo bił daayée' da.

⁵Doo yá'áshóonii yiniyé ádaat'íinii yéego yąąh dashijéé'. T'áá nahont'inee łoh nidadii'nił, daaníigo yaa yádaałti'. Ádeinízin, Háísh deidoołtsééł?

⁶Doo ákwii ádadooníłígíí yíká da'íłkeed. K'ad lá índa bindahosiigiz ni, daaní. Áko yaa nitsídaakeesii índa bijéí biyi'di ádahoot'éii doo bééjółkááh át'ée da.

⁷Nidi Diyin God éí k'aa' yee hodoołkah. T'áadoo kót'é ílíní k'adahodi'doolk'eh.

⁸Áko hazaad danichxǫ́'ígíí t'áá hó hak'ijį' nídadoodleeł. Diné hak'i dahaghaałígíí t'áá ałtso hak'ee yóó'adoojah.

⁹Áko diné t'áá ałtso bił yéé' dahodooleełgo Diyin God yinaashnishii yaa dahalne' doo. Háálá Diyin God yaa naayáii hazhó'ó yaa nitsídaakees doo.

¹⁰T'áá ákogi ádaat'éii éí Bóhólníihii binahjį' bił dahózhǫ́ǫ doo áádóó yaa deidzólíi doo. Bijéí yee t'áá ákóne' ádaat'éii t'áá ałtso yaa dahaniih doo.