Read Navajo PSALMS 66 Bible Online

PSALMS 66 - Navajo bible

PSALMS 66

¹Nihokáá' dine'é nohłíinii, t'áá ánółtso nihiinéé' nídididla'go Diyin God bich'į' nihił dahózhǫ́.

²Ayóó át'éego bízhi' ił nilíinii baa dahohniihgo dahohtaał. Ayóó át'éego baa dahohniih!

³Diyin God ádabidohní, Dooládó' ninaanish t'óó bik'eda'ayói da! Ayóó át'éego nidziilígíí bee ni'ana'í danilíinii niyaajį' ni'ádidoo'nił.

⁴Nihokáá' dine'é t'áá ałtso nich'į' nidahałáa doo. Naa dahaniihgo dahataał, nízhi' yaa dahaniihgo dahataał doo. Síilah.

⁵Hágo, Diyin God yaa naayáii níníł'į́. Diné bitahgóó yaa naagháii t'óó bik'eda'ayóí.

⁶Tónteelgi hóółtseigo áhoolaa. Diné t'áá ni' tooh ha'naa niníná; áadi hwee nihił nidahoozhǫǫh nít'éé'.

⁷Bidziil yee hool'áágóó nant'á. Ał'ąą dine'é haisííd. Dooda yee nidaalteehii ayóó át'éego áda'dólne' lágo. Síilah.

⁸Dadine'é danohłíinii, nihiDiyin God baa dahohniih. Ayóó íits'a'go baa dahohniihígíí adahosiilts'įįhgo ádaahłééh.

⁹Éí nihii' sizíinii dahináanii bitahgi nihaa áhályą́ áádóó doo dadiigeehgóó ánihósin.

¹⁰Háálá ni, Diyin God nílíinii, nanihínínítą́ą́'. Béésh łigaii nabóhoneestą́'ígi át'éego nanihínínítą́ą́'.

¹¹Łoh biih nihííní'eezh. Nihitsé'ak'i gónaa hééł t'áá íiyisí nidaazii bik'i dah síníyį́ nahalin silį́į́'.

¹²Diné danilíinii nihitsiits'iin bik'i łį́į́' bił nidaazhjée'go íinilaa. Kǫ' áádóó tó bii' ch'ínii'ná, nidi t'áá ałtsoní hózhǫ́ǫgo bee áda'azįįdjį' anihííní'eezh.

¹³Didlidgo náádahaniihii yishjihgo nikin góne' yah adeeshááł. Nich'į' ádee hadeesdzíi'ii bi'deeshłííł.

¹⁴Éí shich'į' nahwii'ná yę́ędą́ą́' bee haasdzíi'ii éí t'áá aaníí ádíshníigo bee nich'į' ádee haasdzíí'.

¹⁵Daneesk'ahgo didlidgo náádahaniihii, deenásts'aa' didlidgo bits'ą́ą́dóó łikání halchingo nich'į' nááhideeshnih. Dóola áádóó tł'ízí bił nich'į' nááhideeshnih. Síilah.

¹⁶Diyin God dadíínóhsinii t'áá ánółtso, hágo, kodi da'íísółts'ą́ą́' áádóó shii' sizíinii yá yaa naayáhígíí baa nahodeeshnih.

¹⁷Ts'ídá yéego bich'į' haasdzíí' áádóó bee bich'į' haasdzí'ígíí bee baa has'nih.

¹⁸Doo ákwii át'éii shijéí bii' bá hosíł'ą́ągo Bóhólníihii doo shididoots'į́įł da.

¹⁹Nidi t'áá aaníí Diyin God shidiizts'ą́ą́'. Shisodizin shá yidiizts'ą́ą́'.

²⁰Diyin God baa dahohniih, háálá shisodizin t'áadoo nahjį' kóyiilaa da. Índa aa a'ááh nízinii t'áadoo shits'éidiní'ą́ą da!