Read Navajo PSALMS 68 Bible Online

PSALMS 68 - Navajo bible

PSALMS 68

¹Háni'dii Diyin God dildzííł! Háni'dii bi'ana'í danilíinii tabidi'nooskaad! Háni'dii bik'ee dadiniihii bits'ą́ąjį' yóó'iijeeh!

²Łid bił yóó'iiyołígi át'éego yóó'abí'dísooł! Ak'ah konibąąhgóó diłhįhígi át'éego Diyin God binááł háni'dii diné doo yá'ádaashóonii ádabi'dildįįh!

³Nidi bíni'dii t'áá ákogi ádaat'éii bił dahózhǫ́! Bíni'dii Diyin God binááł bił nidahoozhǫǫh! T'áá aaníí, t'áá íiyisí bił nidahoozhǫǫh le'!

⁴Diyin God bich'į' dahohtaał; bízhi' baa dahohniihgo dahohtaał! Éí yót'ááh hiníláii yikáá' náhodididleehii yéego bich'į' dahohtaał! Bízhi' éí Jiihóvah wolyé, éí bidááhdóó nihił nidahoozhǫǫh le'!

⁵Diyin God éí áłchíní bizhé'é ádaadinii yiTaa' nilį́ áádóó hodiyingo kééhat'į́įgi asdzání bąąh ádahasdįįdii yá ánihwii'aahii nilį́.

⁶T'áá bita'ígóó naagháii bighan hólǫ́ǫ doogo Diyin God baidiyii'aah. Awáalyaa naazhjé'ígíí ch'íyii'éésh. Nidi nidaalteehii t'éiyá kéyah dahóółtseiigi kéédahat'į́.

⁷Diyin God nílíinii, nidine'é bilą́ąjį' dah diniyáago honoojíí góne' bá ch'íhwííníle'. Síilah.

⁸Áko ni' nahaas'náá', Diyin God hólóonii binááł, wót'ááhdę́ę́' t'áá íiyisí nahóółtą́, Ízrel biDiyin God nilíinii binááł Dził Sáínai nahaas'náá'.

⁹Diyin God nílíinii, nik'ehgo t'óó ahayóí nahóółtą́. Nidine'é kéyah bíí' dooleełígíí nídínéesdzáago hasht'éinidlaa.

¹⁰Ákwii nidine'é kéédahat'į́į́ nít'éé'. Diyin God nílíinii, baa dahojoobá'íii nidi jiiníba'ígíí binahjį' baa áhosínílyąąd.

¹¹Bóhólníihii haadzíí'. Sáanii t'óó ahayóí dahalne'go kódaaní,

¹²Ana'í dah deínéehii éí aláahgo bindanit'a'í t'áá bił yóó'adahinichééh! Hooghandi asdzání nidaazdáhígíí éí ana'í binaalye'é daasnáanii nideiniih.

¹³Dibé naazhjéé' bitahgóó danohjahgo hasbídí bit'a' béésh łigaii bik'ésti' nahalinígíí, áádóó bits'os nineezígíí éí óola łitsoii bik' ésti' nahalinígíí nidahonohłin.

¹⁴Aláahgo Ayóó'ábóodziilii éí aláahgo naat'áanii danilíinii yik'eh deesdlį́į́'dóó tainooskaadgo yas nahalingo Dził Zálman bąąh yígai.

¹⁵Diyin God bidził ła' Béíshan wolyé; Béíshan éí dził deelzhaaígi át'é.

¹⁶Dził dah dahats'osii nohłíinii, ha'át'íísh biniyé dziłghą́ą'gi Bóhólníihii kééhasht'į́į doo nízingi deinołch'į́į́d? T'áá aaníí, ákwe'é Bóhólníihii hool'áágóó kééhat'į́į dooleeł!

¹⁷Tsindaabąąs bijáád naakiígíí yee dah deínéehii éí diyingo naal'a'í naadiindi mííl, áádóó míildi ałk'i náámíilgo ánéelą́ą́'. Dził Sáínaigi Bóhólníihii diyingo hólónígi át'éego éí bitahgi hólǫ́.

¹⁸Aghánáhóó'áajį' hahosíníle'. Yisnááh t'áadoo bee néelą́'ígóó hashíní'eezh. Áádóó ákwii Bóhólníihii kééhat'į́į doo biniyé diné bitahgi aa deet'áanii naa dayiiznil; nidaalteehii nidi bitahgi ałdó' naa da'iiznil.

¹⁹Bóhólníihii éí t'áá ákwíí jį́ nihiyéél nihá yooyéełii, t'áá éí Diyin God yisdánihiiníiłii baa ha'niih. Síilah.

²⁰NihiDiyin God éí bee yisdá'iildéehii nilį́. Áádóó Bóhólníihii Diyin God éí anoonééł bik'ee'ąą hodeezt'i'ii nilį́.

²¹Nidi Diyin God éí bi'ana'í danilíinii dabitsiits'iin yidoołjish. Bitsii' t'óó ahayóii ádaa ha'niihii ádihodiilt'i'go naagháii bitsiits'iin yidoołjish.

²²Bóhólníihii ání, Éí Béíshandę́ę́' nídeesh'ish; tónteel tá łtł'ááhdę́ę́' hahideeshnił.

²³Áko ni'ana'í bidił bii'góó ch'ídíínááł, áádóó nilééchąą'í éí da'doołch'ał.

²⁴Diyin God nílíinii, hodílzingo ná da'ínéehii dayoo'į́. ShiDiyin God aláahgo shinanit'a'í, hodiyingo haz'ání bii'jį' bá da'ínéehii dayoo'į́.

²⁵Dahataa łígíí alą́ąjį' yikah. Akéédę́ę́' bibee na'a'néhí sin yee nidaanéhígíí yikah. Bita' góne' éí ch'ikéí ásaa' daagádígíí yee nidaanéego yikah.

²⁶Diné t'óó ahayóí áłah danilį́įgi Diyin God baa dahohniih. Nihí Ízrel bits'ą́ą́dóó dahosoolį́į'ii, Bóhólníihii baa dahohniih.

²⁷Bénjamin lą́ą, akéédę́ę́' naagháhígíí éí alą́ąjį' oo'ish; Júdah dine'é yá aląąjį' naazíinii yił yinéełii bił, áádóó Zébyulan dine'é yá aląąjį' naazíinii, Náftalai dine'é yá aląąjį' naazíinii ałdó' akéé' yinééł.

²⁸Ayóó ánóodziil doogo niDiyin God ná haadzíí'. Diyin God nílíinii, nihá binishínílnishii niłdzilgo ánílééh.

²⁹Jerúsalem kin haal'áagi nikin bii' sohodizin si'ánígíí hoł danilį́įgo aláahgo naat'áanii dajílíinii aa yílyáii naa dajiiníił doo.

³⁰Lók'aa'tahgóó naaldlooshii ałchinii áádóó dóola índa diné bibéégashii yáázh deíl'áhígíí nidahojílinii nidahodíteehgo béésh łigaii baa dajidlee'go naa dahizhdoojih. Anaa' baa bił nidahoozhǫǫhii tanoołkaad.

³¹Ííjip kéyahdę́ę́' naat'áanii danilíinii ch'ídookah; Iithiyópiya dine'é tsxį́įłgo Diyin God yich'į' k'ídidoolchiłgo náyookąąh doo.

³²Ał'ąą dine'é nihił dah nahaz'ą́ą́dę́ę́' Diyin God bich'į' dahohtaał; Bóhólníihii baa dahohniihgo dahohtaał. Síilah.

³³T'áá shiidą́ą'dii yót'áahdi hiníláii yikáá' náhodididleehii bich'į' dahohtaał. Jó'akon, hahadziihgo biinéé' ayóó íits'a'.

³⁴Diyin God bidziil dadohníigo baa dahohniih. Aláahgo yee ayóó át'éii yee Ízrel yaa áhályą́ áádóó bidziilígíí éí wót'áahdi hólǫ́.

³⁵Diyin God nílíinii, nikin bii' sohodizin góne' ayóó át'éego nits'ąą hasti'go ni'dólzin. Ízrel biDiyin God éí bidine'é dziil áádóó bibee adziilii yeidii'aah. Diyin God baa dahohniih!