Read Navajo PSALMS 71 Bible Online

PSALMS 71 - Navajo bible

PSALMS 71

¹Bóhólníihii nílíinii, naa jííníshłí. Ts'ídá t'ááká t'óó shaa yáhásinígi áshi'dólnééh yíila'!

²T'áá ákogi ánít'éii binahjį' yisdáshíłteeh; yóó'adínéesht'į́įłgi shá ahóót'i'go ánílééh áádóó shich'į' dah díníit'aahgo yisdáshíłteeh!

³Binahjį' bidziilgo kééhasht'íinii t'áá áłahjį' áajį' bine' ahinishchéehii shá nílį́į le'. Yisdáshidííłtéełgo bee háínídzíí', háálá tsé índa bine' naasdzi'ii shá nílį́.

⁴ShiDiyin God nílíinii, diné doo yá'áshóonii ts'ídá doo ákwii áánííłgóó doo yits'íidii bílák'eedóó hááshíłteeh.

⁵Háálá, Bóhólníihii Diyin God nílíinii, ni t'éiyá nee shił chohoo'į́. Bóhólníihii nílíinii, t'áá ániid naasháádą́ą́' naa jííníshłí.

⁶T'áá shi'dizhchį́į́dą́ą́' nee nisdzil. Shimá biishch'id biyi'dę́ę́' hashííníłtíinii ánít'į́. T'áá áłahjį' naa hashniih.

⁷Diné t'óó ahayóí shiniinaa t'óó bił adahayóigo hoolzhish. Jó, ni t'éí bidziilgo bine' ahinishchéehii nílį́.

⁸Ayóó át'éego naa hashniih áádóó ayóó ánít'éego bee ił nílíinii shá bíighah bee naa hashne'.

⁹Są́ baa'níłdįįdgo t'ááká nahjį' kóshólééh yíila'. Doo shidziil da sélį́į'go yóó'ashidóó'ááł lágo.

¹⁰Háálá shi'ana'í shik'ijį' yádaałti'; dashidiyoołhéełii shindaha'áago

¹¹kódaaní, Diyin God yóó'abidíí'ą́; bikéé' dohjeehgo bił dadohdeeł, háálá t'áadoo yisdánábółtéłí da.

¹²Diyin God nílíinii, t'áadoo nízaadi shits'ąą honílóní! ShiDiyin God nílíinii, tsį́įłgo shíká anilyeed!

¹³Shii' sizíinii bi'ana'í danilíinii t'óó baa yáhásinígi ádabi'dólne' áádóó ádabi'dóldįįh. Atídahodiilnííł dashó'níinii t'óó bá nidahat'i' le' áádóó doo bił dajílį́į́góó ádabi'dólne'.

¹⁴Nidi shí éí áłahjį' shił chohoo'į́į doo áádóó t'ah yówehgo hózhǫ́ naa hashniih doo.

¹⁵T'áá ákogi ááníiłii índa nibee yisdá'iildéehii t'áá ákwíí jį́ baa hashne' doo, háálá ákónéelą́'ígíí doo shił bééhózin da.

¹⁶Bóhólníihii Diyin God nilíinii bibee adziilii bee yisháał doo. Ni t'éiyá t'áá ákogi ánít'éhígíí baa yáshti' doo.

¹⁷Diyin God nílíinii, t'áá ániid naasháádą́ą́' nashinínítą́ą́' áádóó t'óó bik'eda'ayóigo baa nisíníyáhígíí t'ahdii ná baa táhodishnííh.

¹⁸Diyin God nílíinii, t'áá są́ baa'níłdįįdjį' áádóó shitsii' yiigaiijį' t'ááká yóó'ashidóó'ááł lágo. K'ad oochíłígíí áádóó náás oochííłgóó t'áá ałtso bitahgóó nidziilígíí áádóó nibee adziilígíí baa táhodeeshni'jį' t'ááká yóó'ashidóó'ááł lágo.

¹⁹Diyin God nílíinii, t'áá ákogi ááníłígíí ałdó' yá'ąąsh bíneel'ą́. Ayóó ádaat'éii baa nisíníyá. Diyin God nílíinii, háishą' nigi át'é?

²⁰Bik'e'ashch'íi'go bee shich'į' nahwii'náanii lą'í shił bééhózingo áshiinilaii hááshidi'yííłdįįł índa nahasdzáán bii'dę́ę́' hááshidííłtééł.

²¹T'ah yówehígo ayóó ánísht'éego áshidíílííł, áádóó ha'ííníshníigo ánáshidíídlííł.

²²ShiDiyin God nílíinii, t'áá aaníinii nihígíí biniinaa ałdó' tsin tł'óół neeznáá bąąh daneelzhee'go bee nida'a'néii bee naa hashniih doo. Ízrel dine'é biDiyin nílíinii, tsin tł'óół naakits'áadah bąąh daneelzhee'go bee nida'a'néii bee naashnéego nich'į' hashtaał doo.

²³Ayóó át'éego shił nihoozhǫǫhgo nich'į' hashtaałgo naa hashniih doo. Shii' sizíinii yisdéíníłtíinii ałdó' ayóó át'éego bił hózhǫ́ǫgo hataał doo.

²⁴T'áá ákogi ánít'éhígíí shá bíighah baa yáshti' doo. Háálá atídahodiilnííł dashó'níinii t'óó baa yáhásinígi ádaalyaa áádóó t'óó ádaa yádaniidzį́į́'.