Read Navajo PSALMS 74 Bible Online

PSALMS 74 - Navajo bible

PSALMS 74

¹Diyin God nílíinii, ha'át'íísh biniinaa hool'áágóó yóó'anihiníníłkaad? Ha'át'íísh biniinaa náhóóchįįdígíí łid nahalingo nidibé hootsogóó naakaígíí bik'ijį' nítsxaaz?

²Nidine'é áłah nádleehii ałk'idą́ą́' nahíníłnii'ígíí níí' dooleeł biniyé háíní'nilii béénílniih! Díí Dził Záíyangi kééhót'į́į́ nít'éé' yę́ęgi béénílniih.

³Kints'iil hazlį́'ígóó ch'ídíínááł, áadi kin bii' sohodizin góne' ana'í t'áá ałtsoní nidayiishchxǫ'!

⁴Naa áłah ná'ádleeh yę́ę góne' ni'ana'í danilíinii nidahodeesdláád; t'áá bí yik'ehgo naaldeehii yadeidíníishin.

⁵Tsin yíl'áagi diné da'íítséél nahalin silį́į́'.

⁶Áádóó tsin nidaask'ęę'ígíí t'áá ałtso tsénił áádóó bee atsidítsoh yee adah ayídadziisne'.

⁷Nikin bii' sohodizin yidahodeeznilgo adeideesk'ą́ą́'; nízhi' bee wójíigo si'ą́ą́ nít'éé' yę́ę ahiih nídayiiskaadgo doo hodiyingóó ádahoolaa.

⁸T'áá biyi'ídi ádaaní, Haa'íyee' Bóhólníihii bidine'é ałtso ádadiildįįł. Kéyah bikáá'góó Diyin God bikin bii' áłah nída'adleehgo naaznilii t'áá át'é adeideesk'ą́ą́'.

⁹Bik'ehgo neiildeeh yę́ę doo deiit'į́į da; Diyin God yá dahalne'ii doo ła' naagháa da, áádóó haa nízahjį' kót'ée dooleełígíí éí nihitahdóó doo ła' bił bééhóziní da.

¹⁰Diyin God nílíinii, haa nízáágóoshą' nihi'ana'í nihá nidahałt'i' doo? Da' ana'íísh hool'áágóó nízhi' doo ílį́į́góó yaa yádaałti' doo?

¹¹Ha'át'íísh biniyé níla' nish'náájí t'ą́ą́' kwíínísin? Nich'éíyahdę́ę́' hadílníihgo ana'í áníłdįįh.

¹²Áko Diyin God t'áá náshiinídą́ą'dii aláahgo shinanit'a'í nilį́; éí nahasdzáán bikáa'gi yisdá'iinííł.

¹³Nidziil bee tónteel aháíníłk'ol. Tónteel biyi'góó ayóó ádaníldíilgo nidaaldeehii bitsiits'iin dashíníłjizh.

¹⁴Łóó'tsoh Liiváíyathan wolyéii dabitsiits'iin dashíníłjizhgo honoojíidi naaldeehii dabich'iyą' biniyé baa dííní'ą́.

¹⁵Tó hadaazlį́į doo biniyé áádóó tó danílį́į doo biniyé ąą bídazdííníłhaal, áádóó tooh ayóó ánéelą́ą́' danílį́į́ nít'éé' yę́ę nídéíníłtsei.

¹⁶Jínígíí áádóó tł'é'ígíí ałdó' ni. Adinídínígíí áádóó jį́honaa'éí íinilaago dah sínínil.

¹⁷Nahasdzáán t'áá át'é nidanees'ą́ągo íinilaa. Nináháshį́įhgo índa nináháháahgo íinilaa.

¹⁸Bóhólníihii nílíinii, ana'í nándahałt'i' yę́ę índa diné doo ádahalyáanii nízhi' doo ílį́į́góó ádeił'į́į́ nít'éé' yę́ę béénílniih.

¹⁹Hasbídí nahalingo diné ayóó'ííní'níinii bii' sizíinii t'ááká naaldlooshii dahashkéii baa dóó'ááł lágo. Nidine'é badahojoobá'íígíí hool'áágóó doo beidiyíínah da.

²⁰Bee aha'deet'áanii béénílniih, háálá nahasdzáán bikáa'gi chadahałheełgóó ádílááh hadadeezbin.

²¹Diné t'óó bik'i na'aldeehii ádaa yádandzingo t'ą́ą́' hahakáah dooígíí doo bee hwiidííł'aał da. Badahojoobá'íii áádóó hojooba' nahas'áanii éí bíni'dii nízhi' yaa dahaniih.

²²Diyin God nílíinii, díldzííł, ádá yánílti'! Diné doo áhályáanii shá bíighah ná nahałt'i'ii béénílniih!

²³Ni'ana'í danilíinii hahóół'áago hahosiyiilts'įįhígíí áádóó nik'ijį' nídahidiikáahii t'áá áłahjį' t'óó honaałgo nidahodiłdlaadígíí doo beidiyíínah da!