Read Navajo PSALMS 76 Bible Online

PSALMS 76 - Navajo bible

PSALMS 76

¹Júdah kéyahgi Diyin God béého'dílzin; Ízrel kéyahgi bízhi' ayóó át'é.

²Séílemgi biníbaal bii' hodílzinii bii' si'ą́; Záíyangi éí kééhat'į́.

³Ákwii k'aa' áádóó naagé, diltłish índa bee na'abaahii yiyiizti'. Síilah.

⁴Ayóó át'éego nits'ádi'nílííd; dziłdi ana'í binaalye'é nidadeeztąądígíí biláahgo ayóó ánít'é.

⁵Bijéí hada'ólnínígíí bik'eh hodeesdlį́į́'; aniné yił ada'iishhaazh; diné nidaabaah yę́ę t'áá ałtso dabíla' t'áadoo chonáádayoos'įįd da.

⁶Jéíkab biDiyin God nílíinii, adíínítehgo tsinaabąąs bijáád naakiígíí nideiłbąąsii índa dabilį́į́' nidabi'diztseed.

⁷Nidi ni éí nits'ąą hasti' doo nít'éé'! Náháchįįhgo háishą' nidááhdóó yidoozįįł?

⁸Yá'ąąshdę́ę́' ánihwiit'aah dazdiizts'ą́ą'go íinilaa, áko nihokáá' dine'é nídaasdzíidgo hodiiyeel.

⁹Nahasdzáán bikáá'góó diné ádaa dahojoolbá'íii t'áá ałtso yisdéidoonił biniyé Diyin God deesdzilgo na'ak'íyáshti' yę́ędą́ą́' ákódzaa. Síilah.

¹⁰T'áá aaníí nihokáá' dine'é bádahachį'go hózhǫ́ naa ha'niih doo. Bádahachį' daadzíi'ii t'ą́ą́' kwíínísin doo.

¹¹Bóhólníihii nihiDiyin God nilíinii bich'į' ádee hadahidoohdzí'ígíí bida'ohłééh. Binaagóó nidaakaii t'áá ałtso Diyin God dólzin dooleełígíí éí aa doolyéełii yaa dayiiníił le'.

¹²Naat'áanii danilíinii yee ádaa daha'niihii yąąh nahwiiłkaad. Nahasdzáán bikáá'góó aláahgo naat'áanii t'áá íiyisí bits'ąą daasti'.