Read Navajo PSALMS 77 Bible Online

PSALMS 77 - Navajo bible

PSALMS 77

¹Diyin God bich'į' yéego ádíshní. T'áá shí shiinéé' bee bich'į' hadeesdzihgo shididoots'į́į́ł.

²Shich'į' hodiis'náá' yę́ędą́ą́' Bóhólníihii bíká íít'įįd; tł'ée'go dah deeshnihgo doo díníshnéeh da nít'éé'. Shii' sizíinii habidi'yóolniiłgi doo yinízin da nít'éé'.

³Diyin God bénáshniihgo dinish'níí nít'éé'; nitséskeesgo shii' sizíinii yéego bąąh nááháka'. Síilah.

⁴Shináá' shá ąą íínísin; t'áá íiyisí shide áhoot'éhígíí bąą hadeesdzih yę́ęgi doo bíneesh'ą́ą da.

⁵Ałk'idą́ą́' yę́ęgóó baa nitsínísíkééz; ałk'idą́ą́' nináháhááh yę́ęgóó baa nitsínísíkééz.

⁶Tł'ée'go bee hóótáalii bénáshniih; shijéí biyi'di nabik'ítsískees; nitséskeesgo níłch'i shii' sizíinii haleebee niná'ádílkaah.

⁷Hool'áágóósh Bóhólníihii doo nihidínóozįįł da? Índa doósh nihich'ijí náánídlį́į da doo?

⁸Aa a'ááh níziniísh hool'áágóó nihaa ánéísįįd? Yee nihoní'áaniísh hool'áágóó doo bohodoolníił da?

⁹Diyin God bibee ajooba'ásh yaa yooznah? Báháchį'goósh aa a'ááh nízinii yidádi'níłkaal? Síilah.

¹⁰Áko ádíshní, Díí bee shąąh dahaz'ą́: Aláahgo Ayóó'át'éii bigaan nish'náájí łahgo ádzaa nisin.

¹¹Bóhólníihii áát'įįdii bénáshniih doo; ałk'idą́ą́' t'óó bik'eda'ayóigo íínít'įįdii bénáshniih doo.

¹²Ninaanish nilíinii ałdó' t'áá ałtso nabik'ítséskees doo, áádóó baa nisíníyáhígíí bee ádił yáshti' doo.

¹³Diyin God nílíinii, bee ánít'éii éí diyin. Háí diyin dabidi'níí shį́įshą' nihiDiyin Godgi át'éego ayóó át'é?

¹⁴Diyin God nílíinii, t'óó bik'eda'ayóigo baa nanináii nílį́. Dadine'é bitahgóó nidziilígíí yit'íní íínísin.

¹⁵Jéíkab áádóó Jóseph ba'áłchíní náás ahoolchíiłii éí nidine'é danilį́įgo nigaan bee bik'éniná'íínídlá. Síilah.

¹⁶Diyin God nílíinii, tó daniiłtsą́; tó daniiłtsą́ągo nídaasdzííd; tónteel ayóó íídéetą́'ígíí ałdó' dahidees'náá'.

¹⁷K'os tó yadayiinil; yá bits'ą́ą́dóó dahodiists'ą́ą́'; nik'a' ałdó' t'áá ałtsogóó adahalnood.

¹⁸K'os diłhił bii'di ne'ii'ni' biinéé' dadiists'ą́ą́'; nahasdzáán bikáá'góó atsiniltł'ish bee ni'deezdláád; nahasdzáán dahidees'náá'.

¹⁹Tónteel biyi'góó nik'eh honít'i'; tó ayóó át'éii bii'góó ne'atiin, nidi nikék'eh hashchíín doo bééhózin da.

²⁰Dibé joo'ish nahalingo Mózes áádóó Éran bíla' bee nidine'é yíní'eezh.