Read Navajo PSALMS 78 Bible Online

PSALMS 78 - Navajo bible

PSALMS 78

¹Shidine'é danohłíinii, shina'nitinii bee nihich'į' yáshti'go deísółts'ą́ą́'! Saad bee hahasdziihígíí hazhó'ó deísółts'ą́ą́'!

²Hane' bee ak'idi'dootį́įłii bee hahideesdzih; ałk'idą́ą́' bee nida'nitinii doo bééhózin da yę́ę bee hadeesdzih;

³danihizhé'é yee nihił dahoolne' áádóó dasidiits'ą́ą'go nihił béédahózin yę́ę bee hadeesdzih.

⁴Bada'áłchíní doo bits'ąą dadíníil'į́įł da, nidi Bóhólníihii bee baa ha'niihii áádóó bibee adziilii índa naanish ayóó ádaat'éii yaa naayáhígíí akéédę́ę́' hanínááhinoot'į́įłii bee bił nidahodiilnih.

⁵Háálá Jéíkab dine'é bitahgi bee bééhániihii hasht'eyiilaa, áádóó Ízrel dine'é bitahgi bee haz'áanii niinílá. Éí danihizhé'é yę́ę bada'áłchíní bił béédahózingo ádayoolíił doo, yiłníigo yich'į' haadzíí'.

⁶Áko hanínáánoot'áanii bił béédahózin doo áádóó áłchíní náádadoochíiłii náádaneeyą́ągo ba'áłchíní éí yee yił nínáádahodoolnih.

⁷Áko Diyin God binahjį' bił chodahoo'į́į doo áádóó Diyin God binaanish nilíinii doo yaa deidiyoonah da, nidi bibik'eh ó'oo'níiłii yik'eh dahół'į́į doo.

⁸Áádóó ałk'idą́ą́' dahazhé'é ádaat'éé nít'éé' yę́ęgi doo ákódajít'ée da doo; jó, éí nidaachxǫ' áádóó nidaastee' nít'éé' áádóó éí oochíiłii Diyin God yich'į' doo bijéí hasht'edayósin da nít'éé' índa Diyin God yich'į' bii' naazíinii yee doo bada'ahódlíi da nít'éé'.

⁹Íífreiyim dine'é ałtį́į́' yee anaa' dayiichįįhii ałk'iijée'go t'ą́ą́' dah nídiijéé'.

¹⁰Diyin God bibee aha'deet'áanii doo yik'eh dahóół'įįd da, áádóó bibee haz'áanii yik'eh deíkáah dooleełígíí doo deiniizį́į' da.

¹¹Áát'įįdii áádóó t'óó bik'eda'ayóii bich'į' yit'íní áyiilaii yaa dayooznah.

¹²Dabizhé'é yę́ę binááł, Ííjip kéyahdi Zówan hoolyéegi Diyin God t'óó bik'eda'ayóii áyiilaa.

¹³Tónteel aháíyííłk'olgo ákóne' tsé'naa ho'níłnii', áádóó tó ałts'ą́ą́hjí ní'áago áyiilaa.

¹⁴Jį́įgo k'os yee honí'eezh; tł'ée'go kǫ' bee hool'ingo yee honí'eezh.

¹⁵Honoojíidi tsé deisk'isgo áádę́ę́' tó dazhdoodlį́įłii tónteelgi át'éego t'óó ahayóí haidiní'ą́.

¹⁶Tsé biyi'dę́ę́' tó dadeezlį́įgo áádóó tooh danílínígi át'éego áyiilaa.

¹⁷Ákondi honoojíidi Aláahgo Ayóó'át'éii t'óó tsé'édinda yich'į' ádił nida'iisíihgo nidaalteeh.

¹⁸Ch'iyáán t'áá íiyisí jóyą́ą́' danízingo dayííkeedígíí yee dabijéí biyi'di Diyin God yídaneeztą́ą́'.

¹⁹Diyin God yidadiilkaalgo hadahaasdzíi'go ádaaní, Honoojíidiísh Diyin God éí ch'iyáán nihá áłdįįłt'éego íidoolíiłgo yíneel'ą́?

²⁰Tsé néidííłhaalgo tó hadzííłhaal, áádóó tó danílį́ daazlį́'ígíí wó'ądaazna'. Da' bááhásh ałdó' a'doołtsołgo yíneel'ą́, índa bidine'ésh atsį' t'áá ííłdįįdgo yá áyósin doo?

²¹Éí bąą díí Bóhólníihii yidiizts'ą́ą'go t'áá íiyisí báhóóchįįdgo didooljé'ígi át'éego Jéíkab dine'é yich'į' hashké niidzį́į́' áádóó t'óó yówehda Ízrel dine'é yich'į' báhóóchįįd.

²²Háálá Diyin God doo dayoodlą́ą da, índa dziil yee yisdá'iiníiłii doo yaa dadzólíi da nít'éé'.

²³Azhą́ wót'áahdi k'os yich'į' haadzíí' nidi, áádóó yádiłhił bidáádadilkał ąą ádayiilaa nidi, bich'į' ákódajíít'įįd.

²⁴Bááh mána wolyéii dazhdooyį́į́ł biniyé hak'ijį' nináłtį́įhgo áyiilaa índa yá'ąąshdę́ę́' bááh ha'níłtsood.

²⁵Diné éí diyingo nidaal'a'í bich'iyą' dayííyą́ą́'. Ch'iyáán t'óó ahayóí hach'į' ííł'į́į́ nít'éé'.

²⁶Ha'a'aahdę́ę́' wót'áahdi níyolgo ííł'į́į́ nít'éé', áádóó bidziil yee shádi'ááhdę́ę́' níyolgo áyiilaa.

²⁷Łeezh łibáhígi át'éego hak'ijį' atsį' ayóó ánéelą́ą́' nayííłtą́. Tónteel bibąąhgóó séí ánéelą́'ígi át'éego hak'ijį' tsídii nidaat'a'ígíí nayííłtą́.

²⁸Nidadziiznánígi dahatahgóó áádóó dahaníbaal binaagóó hadah ahineezdee'.

²⁹Áádóó da'joolghalgo hwiih dadzizlį́į́' áádóó jóyą́ą́' danízinígíí baazhdiní'ą́.

³⁰Nidi t'ah doo hwiih dajileehgóó ch'iyáán t'ahdii hazéé' nidajił'aałgo,

³¹Diyin God hach'į' báhóóchįįdgo, agháago dahóóyisii nahastseed áádóó Ízrel dine'é bitah haasdlá'ígíí neistseed.

³²Azhą́ kóhóót'įįd nidi, t'áá ádił da'ílzííh nít'éé'; azhą́ t'óó bik'eda'ayóii áyiilaa nidi, t'áadoo dahoosdląąd da.

³³Éí bąą bídayéełkaahii t'áadoo nánídlínígóó áádįįłgo áyiilaa, áádóó bee ninádahaháhígíí bik'eda'íyée'go yił áádįįłgo áyiilaa.

³⁴Ła' nidzistseed nidi, daadzíi'ii háká daat'į́įgo t'ą́ą́' ninákaigo Diyin God t'áá íiyisí há daat'į́į́ nít'éé'.

³⁵Diyin God éí tsé bine' na'adzi'ii há nilį́įgo áádóó Diyin God Aláahgo Ayóó'át'éii náádabiisnii'ii yéédaasnii'.

³⁶Ákót'ée nidi, t'áá bizábąąhídóó t'éí łikango hach'į' yádaałti'go dahoníí'aa'.

³⁷Dabijéí yee doo hódadínéelnáágóó habee aha'deet'áanii doo ts'ídá yik'eh dahóół'įįd da.

³⁸Nidi hó baa a'ááh jinízingo doo ákwii ádáát'įįdii bits'ádahizdeez'ą́ áádóó t'áadoo ádzísdįįd da; háháchį'ígíí t'áá ahą́ą́h t'ą́ą́' kóníjiil'įįh nít'éé' áádóó hashkéznídzinígíí t'ah yówehgo t'áadoo hashké náázniidzį́į' da.

³⁹Háálá t'óó ats'íís ádaat'é índa níyol iiyołgo doo t'ą́ą́' náyóoł daígi át'éego bééjoolnii'.

⁴⁰Dooládó' honoojíidi t'áá ahą́ą́h hach'į' nidaalteeh da nít'éé' áádóó halgaidi háni' nídayiił'aah nít'éé'!

⁴¹Ízrel dine'é yóó'anáhákáahgo biDiyin God nilíinii nayínídantah nít'éé' áádóó Ízrel dine'é biDiyin nilíinii t'áadoo yá dahooł'a' da.

⁴²Diyin God bigaan yee ana'í yighááhó'nilii t'áadoo béédajoolnii' da.

⁴³Éí Ííjip kéyahdi bee éédahózinii áyiilaa índa Zówan hoolyéedi t'óó bik'eda'ayóii yaa naayá.

⁴⁴Dabitooh diłgo áyiilaa, áko doo dayódlą́ą́' át'ée da nít'éé'.

⁴⁵Náá'ákóne' tsé'édǫ́'ii hatah yiníłnii'go hoł dinííyił áádóó ch'ał ałdó' hatahjį' yi'níłnii'go bik'ee ti'dahodzooznii'.

⁴⁶Bikédaayahgóó nideiniłt'ą'ígíí ch'osh ditł'ooí yeidiní'ą́ áádóó yindaalnishgo hazlį́'ígíí nahachagiitsoh yeidiní'ą́.

⁴⁷Bich'il na'atł'o'ii deíl'áhígíí níló yee íísdįįd, áádóó síkamor naazkaadgo deíl'áhígíí shoh yee íísdįįd.

⁴⁸Dabibéégashii nílótsoh yee íísdįįd áádóó dabidibé atsiniltł'ish yee íísdįįd.

⁴⁹T'áá íiyisí yich'į' báhóóchįįdígíí áádóó yee atídeidoolíiłgo yich'į' hashké niidzį́'ígíí índa yich'į' doo bił hóózhǫǫdígíí yee yich'į' nahodiyoołnaał biniyé diyingo nidaal'a'í nida'ałtseedii yik'ijį' yi'níłnii'.

⁵⁰Bánáháchįįhgo bá ahóót'i'go áyiilaa; anoonééł bits'ą́ąjį' hwii' sizíinii t'áadoo yisdáyíínil da, nidi ooghą́ąłii yaa hodiní'ą́.

⁵¹Ííjip kéyahgi áłtsé nidahaazhchíinii t'áá ałtso yizéé' deizt'įįd; Ham bidine'é bidziilii bits'ą́ą́dóó áłtsé nidaakaii biníbaal naaznilgóó yizéé' deizt'įįd.

⁵²Áko índa dibé nahalingo t'áá bí bidine'é dah yidii'eezh, áádóó honoojíidi dibé bá tázhdíghááh nahalingo yá tádííyá.

⁵³T'áadoo atíbóle'égóó yiní'eezh, áko doo nídaaldzid da nít'éé', nidi bi'ana'í danilíinii tónteel bik'i diilkǫ'.

⁵⁴Áádóó bikéyah hodiyindi bigaan nish'náájí yee dził shóyoost'e'íjį' yiní'eezh.

⁵⁵Yilą́ąjį' ał'ąą dine'é hainiiskaad, éí bikéyah daahóó' dooleeł biniyé hataizo áádóó dabiníbaal naaznilígóó Ízrel ał'ąą ádóone'é dabighango áyiilaa.

⁵⁶Azhą́ ákódzaa lá nidi, Diyin God Aláahgo Ayóó'át'éii nayídaneeztą́ą́' áádóó yich'į' nidaalteeh nít'éé', índa yee hahaasdzíi'ii doo yik'eh dahóół'įįd da.

⁵⁷Nidi bizhé'é yę́ę ádáát'įįdígi át'éego t'ą́ą́' dah náhidiikaigo binda'adlo' go ałtį́į́' doo bééhózingóó nidigęęsígíí nidahalin nít'éé'.

⁵⁸Jó, ninádahałaah doo biniyé wódah nahaz'ą́ągo ádayiilaadi nidahałáago yee hádahóółchįįd; eda'alyaii yich'į' nidahałáhígíí łe'jinízingo ádahoolaa.

⁵⁹Diyin God díí yidiizts'ą́ą'go t'áá íiyisí hashké nídzingo báhóóchįįd, áádóó ayóó át'éego Ízrel dine'é yaa'ih niizį́į́'.

⁶⁰Áko Sháílohdi diné bitahgi níbaal bii' hodílzinii niiní'ą́ągo bii' bighanígíí yóó'iidíí'ą́.

⁶¹Áádóó yee bidziilii yisnááh dooleełjį' niidiní'ą́; yee ayóó át'éii ana'í yeidiní'ą́.

⁶²Bidine'é diltłish bee nabidi'dootsiłjį' ałdó' niidiní'ą́, áádóó bíí' danilíinii yich'į' báhóóchįįd.

⁶³Bitahdóó dinééh danilíinii dadíílid áádóó bitahdóó ch'ikę́ę́h danilíinii iigehjí sin t'áadoo bá dadiists'ą́ą' da.

⁶⁴Bá nááda'iiłniihii diltłish bee naaztseed áádóó be'asdzą́ą́ bąąh ádahasdįįdii t'áadoo yínííł danilį́įgo dáácha da.

⁶⁵Áko índa diné ła' ch'ínádzid nahalingo áádóó diné ayóó ábóodziilii wáin bił honiidoigo nihidilgháásh nahalingo Bóhólníihii nídiildzil.

⁶⁶Áádóó bi'ana'í danilíinii t'ą́ą́' anéinííłkaadgo yik'eh deesdlį́į́'. Hool'áágóó bá nidahat'i'go áyiilaa.

⁶⁷Áádóó ałdó' Jóseph biníbaal doo jiniizį́į' da; Íífreiyim bidine'é t'áadoo nízhdiinil da.

⁶⁸Nidi Júdah dine'é áádóó Dził Záíyan ayóó'ájó'níinii nízhdiinil.

⁶⁹Wót'áahdi nahalingo índa nahasdzáán hool'áágóó dah yit'ááł nahalingo ákwii hakin bii' sohodizin ájiilaa.

⁷⁰Há naal'a'í David ałdó' nízhdiiłtį́, áko dibé shijé'ídóó bits'ázhníłtį́.

⁷¹Hodine'é Jéíkab, éí hwíí' dooleełii Ízrel baa áhojilyą́ą doo biniyé dibétsa'ii biyázhí yídááltsą́ągo baa áhojilyánídóó bił dashdii'áázh.

⁷²Éí bijéí t'áá ákogi át'éego yaa áhályą́ą́ nít'éé', áádóó bíla' yee doo bił nahontł'agóó yá yigááł nít'éé'.