Read Navajo PSALMS 79 Bible Online

PSALMS 79 - Navajo bible

PSALMS 79

¹Diyin God nílíinii, níí' nilíinii bitahjį' ał'ąą dine'é anáásą́ągo nidahaazná; nikin bii' hodílzinii dayííłchǫ'; Jerúsalem kints'iil ádayiilaa.

²Ná nidaal'a'í dabits'íís éí tsídii wódahgo nidaat'a'ii dabich'iyą' doogo yaa deideez'ą́; nidiyį́į́' danilíinii bits'íís nihokáa'gi naaldlooshii da'aldeełii yaa deideez'ą́.

³Dabidił tó yajiinilígi át'éego Jerúsalem binaagóó nihidadílį́įgo ádayiilaa, áko t'áadoo yóó'ádabóle'í da nít'éé'.

⁴Bił kéédahwiit'íinii bich'į'go bá nahat'i'ii dasiidlį́į́'; nihinaagóó nidaakaii t'óó nihá nidahałt'i' áádóó t'óó nihaa daadloh nít'éé'.

⁵Bóhólníihii nílíinii, haa nízáágóoshą' kóhoot'ée doo? Da' hool'áágóósh náháchį' dooleeł? Łe'nínízinígíísh kǫ' nahalingo diltłi' dooleeł?

⁶Ał'ąą dine'é doo néédahósinii índa dadine'é bił dah nahaz'ą́ą́góó doo nízhi' dayózhíigo sodadilzinii éí t'óó báhádzidgo bee atí'éł'íinii bik'i yaanííł.

⁷Háálá éí Jéíkab dine'é yaa nahodeeskai áádóó kééhat'į́į́ nít'éé' yę́ęgi doo siláhígóó ádahoolaa.

⁸Danihizhé'é doo ákwii ádáát'įįdii t'áadoo nihik'ijį' si'ą́ągo béénílniihí, nidi tsxį́įłgo nihaa a'ááh niizįįh, háálá t'áá íiyisí yínííł dasiidlį́į́'.

⁹Diyin God nílíinii, yisdánihíínínilii nízhi' baa ha'niih doo biniyé nihíká anilyeed; nízhi' binahjį' yisdánihínííł áádóó ádił nida'ayeelzíi'ii nihá yóó'adí'aah.

¹⁰Ha'át'íísh biniinaa ał'ąą dine'é kódaaníi doo, Háájíshą' biDiyin God? Ná nidaal'a'í bidił dadeezna'ii biniinaa k'éédidíí'níłígíí bíni'dii nihinááł ał'ąą dine'é bił béédahózingo ánílééh!

¹¹Awáalyaaí dadi'nínígíí naa hosiilts'įįh le'; dadínóonéełjį' baa dadeest'áanii nidziil ayóó át'éii bik'ehgo áánísįįh!

¹²Bóhólníihii nílíinii, bił kéédahwiit'íinii t'óó ná nidahałt'i' yę́ę tsosts'idi ahą́ą́h nániilá bíighahgo bijéí deidíłniihgo bee bá nináhółt'i'.

¹³Áko nidine'é niidlíinii nikéyah hootsogóó dibé naakaígíí nahoniidlingo hool'áágóó nich'į' ahééh daniidzin doo; náás oochííłgóó bee naa ha'niihii baa nidahwiilne' doo.