Read Navajo PSALMS 84 Bible Online

PSALMS 84 - Navajo bible

PSALMS 84

¹T'áá ałtsoní bee Bóhólníihii nílíinii, dooládó' hózhónígi kééhót'į́į da!

²Shii' sizíinii éí Bóhólníihii bikin bii' sohodizin yinízingo yídin ánééh. Shijéí áádóó shits'íís t'áá chaałda Diyin God hináanii yich'į' hataał.

³T'áá ałtsoní bee Bóhólníihii nílíinii, aláahgo shinanit'a'í áádóó shiDiyin God nílíinii, nibikáá' náá'iiniihí si'ą́ągi tsídiiłbáhí nidi bighan yik'éghááh áádóó táshchozhii biyázhí niidooniłgi bit'oh yik'éghááh.

⁴Nikin yii' kéédahat'íinii éí bik'idahojidlí! Éí áłahjį' naa dahaniihgo dahataał. Síilah.

⁵Diné ninahjį' bidziilii, Záíyangóó da'nítiinii bijéí biyi'di bíni' danilíinii éí bik'idahojidlí.

⁶Béíka bokoohgóó deíkáahgo tó hadaazlį́įgo ádahale'; áłtsé nahałtį́hígíí ałdó' tó nídeigeehgóó tó háádadibį́į́h.

⁷Bidziil dahooleełgo náásgóó deíkááh. T'ááłá'í nítínígo Záíyandi Diyin God yidááhdę́ę́' nihidookah.

⁸T'áá ałtsoní bee Bóhólníihii Diyin God nílíinii, shisodizin diits'į́į́h! Jéíkab biDiyin God nílíinii, íísíníłts'ą́ą́'! Síilah.

⁹Shoo, Diyin God naagé nihá nílíinii, ak'ah bik'i yeiniziidgo yínísį́į'ii binii' níníł'į́!

¹⁰Jó, t'áá háadida t'ááłáhídi míildi hwee i'íí'ą́ biláhídi át'éego nikin bii' sohodizingi hwee i'íí'ą́ą́jí agháago yá'át'ééh. Diné doo yá'ádaashóonii dabiníbaal bii'góó kééhasht'į́į dooleełígíí biláhídi át'éego shiDiyin God bikin bidáádílkał baa áháshyą́ą dooleełjígo shił yá'át'ééh.

¹¹Háálá Bóhólníihii Diyin God éí jį́honaa'éí áádóó naagé nihá nilį́. Bóhólníihii bee ajooba' índa bits'ą́ą́dóó bee ił ídlíinii eidii'aah. T'áá ákóne' át'éego deíkáahii éí yá'ádaat'éehii łá'í nidi doo yits'ą́ąjį' hwííléeh da.

¹²T'áá ałtsoní bee Bóhólníihii nílíinii, diné naa dzólíii éí bik'ihojidlí!