Read Navajo PSALMS 88 Bible Online

PSALMS 88 - Navajo bible

PSALMS 88

¹Bóhólníihii shiDiyin God yisdáshííníłtíinii, jį́įgo áádóó tł'ée'go chánahgo nánooshkąąh.

²Shisodizin naa hosiilts'įįh le'; chánahgo nánooshkąąhígíí diits'į́į́h!

³Háálá shii' sizíinii t'áá íiyisí bich'į' nahwii'ná, áádóó k'adę́ę jishcháa'jį' yishłeeh.

⁴A'áán góyaa ahikáahii bił shi'déélta'; diné doo bidziilii nahonishłin sélį́į́'.

⁵Daneeznáanii bitahjį' yóó'adoot'ánígíí áádóó naaztseedii jishcháá' góne' naazhjé'ígíí baa deisínínahii nahonishłin sélį́į́', áádóó nits'ą́ąjį' ádaasdįįd.

⁶A'áán aghá ánízáád góyaa nihoodzą́ądi nishííníłtį́, ákóyaa chahałheełgo ayóó áhonízáád.

⁷T'óó báhádzidgo bee atí'éł'íinii yéego shik'i dah siyį́; bee ti'hoo'níihii nits'ą́ą́dóó deílk'oołii t'áá ałtso shik'i diilkǫ'. Síilah.

⁸Bił ahéédahoniszinii doo deeghánídi shits'ąą nidaakaigo íinilaa, doo dashíłdingóó áshiinilaa. Doo ch'íjóya' át'éégóó shidá'deelkaal.

⁹Atíshíł'ínígíí biniinaa doo hózhǫ́ eesh'į́į da. Bóhólníihii, t'áá ákwíí jį́ nich'į' sodiszin; t'áá ałch'ijí bee nich'į' dah nídidiishnih.

¹⁰Daneeznáaniísh binááł t'óó bik'eda'ayóii ádíílííł? Da' daneeznáaniísh náádidoojahgo naa dahaniih doo? Síilah.

¹¹Aa a'ááh níníziniísh jishcháá' góne' bee ha'doodzih? Na'ahódlíhígíísh hool'áágóó ti'hoo'níihdi bee ha'doodzih?

¹²Chahałheełdiísh t'óó bik'eda'ayóigo áálíłígíí béédahózin doo? Hoyoo'néehgo haz'ą́ągiísh t'áá ákogi ánít'éhígíí bééhózin doo?

¹³Nidi, Bóhólníihii nílíinii, chánahgo nánooshkąąh; abínígo shisodizin naa hosiilts'įįh.

¹⁴Bóhólníihii, ha' át'íísh biniinaa shii' sizíinii yóó'ahíłhan? Ha'át'íísh biniinaa shits'ą́ąjį' díní'į́į́'?

¹⁵T'áá biyázhí nishłį́į́dóó wóshdę́ę́' atíshi'dil'į́į́ nít'éé' áádóó k'asdą́ą́' danástsaah nít'éé'; nits'ą́ą́dę́ę́' báádahadzidii bik'ee ti'hooshnííh; t'áadoo ánááhó'ne'góo da.

¹⁶T'óó báhádzidgo bee atí'éł'íinii shik'iildoh; nits'ą́ą́dę́ę́' báádahadzidii bee atíshiinilaa.

¹⁷Tó honáhaazyį́ nahalingo shá bíighah shinídadzis'á; t'áá ałtso áłah silį́į'go shinás'á.

¹⁸Ayóó'áshó'níinii índa shik'is nízaadgóó shits'ą́ąjį' kwíinilaa, áko bił ahéédahoniszinii éí chahałheeł biih yínínil.