Read Navajo PSALMS 89 Bible Online

PSALMS 89 - Navajo bible

PSALMS 89

¹Bóhólníihii aa a'ááh nízinii hool'áágóó baa hashtaał doo; náás oochííłgóó na'ahódlíigo ná baa hashne' doo.

²Háálá ádííniid, Aa a'ááh hasin hool'áágóó hasht'edoolnííł; yót'áahdi hiníláii daniłdzilígi át'éego na'ahódlíii hasht'edíílííł.

³Nídiiłtíinii bił ałhadi'nisht'ą́. Shá naal'a'í David bich'į' ádee hadeesdzíí'.

⁴Nits'ą́ą́dóó oochíiłii hool'áágóó hasht'edeeshłííł; t'áá éí oochíłígíí ni'níchį́įjį' dahwée'aahgo ádeeshłííł. Síilah.

⁵Bóhólníihii nílíinii, yót'áahdi hiníláii éí t'óó bik'e'ayóigo ánít'éii áádóó na'ahódlíii ałdó' nidiyį́į́' áłah nilį́įgi naa dahaniih doo!

⁶Yádiłhił biyi'di naaldeehiishą' háidíígíí Bóhólníihii bił ałhąąh nijóníłígi át'é? Yá'ąąshdę́ę́' ayóó ábóotsxe'ii biye'ké danilíinii bitahdóó háishą' Bóhólníihii nahalin?

⁷Éí Diyin God nilíinii bidiyį́į́' áłah nídaadleehgi t'áá íiyisí bits'ąą daasti'go ádabósin, áádóó binaagóó naaldeehii t'áá ałtso t'áá íiyisí bits'ąą daasti'go ádabósin.

⁸T'áá ałtsoní bee Bóhólníihii Diyin God nílíinii, háishą' nigi át'éego ayóó ábóodziil? Bóhólníihii, t'áá áłahjį' naa hodzódlíhígíí nináhaazlá.

⁹Tónteel ádá náhálchįįhgo bee nóhólnííh; bíígháán náádadiidáahgo hasht'ééhííłt'eeł.

¹⁰Seesyínígíí nahalingo Réíhab shíníłjizh. Nigaan ayóó ábóodziilii bee ni'ana'í taisíníghaz.

¹¹Yádiłhił áádóó yá'ąąsh éí níí', nahasdzáán ałdó' níí'; nahasdzáán áádóó bii' dahólóonii t'áá ałtso íinilaago nííní'ą́.

¹²Náhookǫs índa shádi'ááh íinilaa, Dził Téíbor áádóó Dził Hérman bił hózhǫ́ǫgo nízhi' yaa haniih.

¹³Nigaan bee ayóó ánóodziil, níla' ałdó' bee nidziil, dego níla' nish'náájí bee dah díílnih.

¹⁴T'áá ákogi át'éii áádóó doo haada yit'éii nibikáá'dóó nahat'áii bee niłdzil; aa a'ááh hasin áádóó t'áá aaníinii nilą́ąjį' nahalne'.

¹⁵Hane' baa hózhóonii bił béédahózinii bik'idahojidlí. Bóhólníihii nílíinii, éí ninii' bee i'díídííngóó hool'ingo deíkááh.

¹⁶Shá bíighah nízhi' baa bił nidahoozhǫǫh; nits'ą́ą́dóó t'áá ákogi át'éii yee ayóó ádaat'éego ádabi'doolniił.

¹⁷Háálá dabidziilgo íínísinígíí yee naa dahaniih. Áádóó nihich'oní'nínígíí bee nihinahat'a' bidziil.

¹⁸Háálá nihich'ą́ą́h hojílóonii Bóhólníihii bíí' jílį́; aláahgo nihinanit'a'í éí Ízrel dine'é biDiyin nilíinii bíí' jílį́.

¹⁹Nidiyį́į́' nilíinii łah ił áhát'į́ bee bich'į' háínídzíi'go ádííníniid, Ayóó ábóodziilii bíká eeshwod. Diné bitahdóó nídiiłtíinii binahat'a' bidziilgo íishłaa.

²⁰Shá naal'a'í, David bik'íninítą́ą́'. She'ak'ah dílzinii bik'i yaaziidgo yísį́į́'.

²¹Éí shíla' bee bíká anáshwo'ígíí ts'ídá doo bits'ą́ąjį' kódooníił da. Shigaan ałdó' bidziilgo ábósin doo.

²²Ana'í nilíinii doo biya'iidooloh da. Diné doo yá'áshóonii doo atíbidoolíił da.

²³Bidáahjį' bi'ana'í danilíinii bik'eh dideeshdleeł, índa bik'ee dadiniihii naa'abízhdiyeeshxal.

²⁴Sha'ahódlíii áádóó haa a'ááh nisinii bił hólǫ́ǫ doo. Shízhi' binahjį' hanahat'a' bidziil dooleeł.

²⁵Tónteel ałdó' bee hóhólníihgo áhodeeshłííł áádóó hála' nish'náájí bee tooh danílínígíí bee hóhólníih doo.

²⁶ShiTaa' nílį́, shiDiyin God, tsé bee yisdéíyáii nílį́, níigo shich'į' hadoodzih.

²⁷Alą́ąjį' yizhchíinii shíí' jílį́įgo ałdó' áhodeeshłííł. Nahasdzáán bikáa'gi aláahgo naat'áanii danilíinii bitisdi aláahgo naat'áanii jílį́įgo áhodeeshłííł.

²⁸Haa a'ááh nisinígíí hool'áágóó bee haa áháshyą́ą doo áádóó hoł ahadi'nisht'áanii bidziilgo hoł íínísin doo.

²⁹Hats'ą́ą́dóó oochíłígíí hool'áágóó hólǫ́ǫgo ádeeshłííł áádóó yót'ááh bił yoołkáłígi át'éego hool'áágóó hojoo'áałgo áhodeeshłííł.

³⁰Ha'áłchíní éí shibee haz'áanii yóó'adeideez'ą́ągo áádóó bee nihodiish'aahii doo yik'ehgo deíkááhgóó,

³¹bee nihoyí'áanii doo bił dáálįįdgóó índa shibik'eh ó'oo'níiłii doo yik'eh dahół'į́į́góó,

³²áko bee haz'áanii nidajiitíihii biniinaa tsin bee náhodínéeshxał; doo ákwii ádáát'įįdii biniinaa be'atsxis bee atídadeeshłííł.

³³Ákondi t'áadoo ánásįįhí haa a'ááh nisin doo; bee shaa hodzódlíhígíí doo bee shiyooch'íid da.

³⁴Shibee aha'deet'áanii ts'ídá bi'deeshłííł, índa saad bee hahásdzíi'ii doo łahgo áńdeeshdlíił da.

³⁵Diyin nishłínígíí binahjį' t'áá aaníí ádíshníigo David doo dínéesh'ahgóó t'ááłáhídi bee ádee hadeesdzíí'.

³⁶Bits'ą́ą́dóó oochíłígíí hool'áágóó hólǫ́ǫ doo. Jį́honaa'éí yigáłígi át'éego hojoo'áał doo.

³⁷Ooljéé' nahalingo hool'áágóó bibikáá'dóó nahat'áii hasht'eilyaa doo. Éí yá'ąąshdi t'áá aaníígóó halne'ígíí nahalingo bibikáá'dóó nahat'áii niłdzilgo si'ą́ą doo. Síilah.

³⁸Nidi k'ad ak'ah bik'i yeiniziidgo yínísį́į'ii nahjį' ahoyíníłhango doo honinizį́į' da áádóó hach'į' t'áá íiyisí t'óó báhádzidgo bee atí'éł'íinii bee hach'į' atsííníkééz.

³⁹Ná naal'a'í bee bił aha'díínít'áanii nahjį' kwíinilaa. Binaat'á ch'ah baa náádini'ą́ągo łeeshtahjį' ahííníłhango doo ílį́į́góó íinilaa.

⁴⁰Tsé ahéédaastł'in bí nít'éé' yę́ę ałtso nahíníłkaad. Bee dabidziilgo nahaz'ánígóó déíníłchxǫ'.

⁴¹Bą́ą́h hidikáhígíí t'áá ałtso bighada'ii'nííł. Yił kééhat'íinii t'óó bá nidahałt'i' silį́į́'.

⁴²Bi'ana'í danilíinii bigaan nish'náájí dabidziilgo íinilaa. Bi'ana'í t'áá ałtso t'áá íiyisí bił dahózhǫ́ǫgo íinilaa.

⁴³Bidiltłish bik'ą́ą́h ííníłchxąą' áádóó na'abaah doo yíneel'ą́ą́góó íinilaa.

⁴⁴Yee ayóó át'éii bits'ą́ą́' náádindlá; bibikáá'dóó nahat'áii ni'jį' naa'ahíníłhan.

⁴⁵Tsíłkéí nilį́įgo bíyoołkáłígíí bits'ą́ą́' áłts'ísígo íinilaa; t'áá ałtsogóó t'óó haa yáhásingo áhwiinilaa. Síilah.

⁴⁶Bóhólníihii nílíinii, haa nízáágóoshą' ákót'ée doo? Hool'áágóósh nídidíít'į́į́ł? Da' t'óó báhádzidgo atí'éł'íiniísh kǫ' nahalingo diltłi' doo?

⁴⁷She'iina' áníłtsogi béénílniih! T'áadoo biniyéhígóósh diné ádeinilaa?

⁴⁸Háí diné shį́įshą' doo dadootsaał da? Háishą' jishcháá' bits'ą́ąjį' bii' sizíinii háidoołtééł? Síilah.

⁴⁹Bóhólníihii nílíinii, t'áá shiidą́ą'dii aa a'ááh nínízinii David bich'į' bee na'ahódlíii bee hahíínídzíi'iishą' háájí?

⁵⁰Bóhólníihii nílíinii, ná naal'a'í danilíinii bá nidahat'i'ígíí béénílniih; dadine'é ayóó ádabóodziilii t'áá ałtso shí da'ats'ihgo shi'diił'á.

⁵¹Bóhólníihii nílíinii, éidí yee ni'ana'í ándahałt'i' áádóó ak'ah bik'i yeiniziidgo yínísį́į'ii bikék'eh hashchį́į́góó yigáałgo t'áá éí ałdó' yee yaa daadloh.

⁵²Bóhólníihii hool'áágóó baa dahohniih! T'áá ákót' ée le' áádóó t'áá ákót'ée doo.