Read Navajo PSALMS 9 Bible Online

PSALMS 9 - Navajo bible

PSALMS 9

¹Bóhólníihii nílíinii, shijéí t'áá át'é bee nich'į' ahééh nisin doo; ninaanish bik'eda'ayóígíí t'áá ałtso bee naa hashne' doo.

²Niniit'aa shił hózhǫ́ áádóó t'áá íiyisí shił hózhǫ́ǫ doo; Aláahgo Ayóó'át'éii nílíinii, nízhi' baa hashniihgo hashtaał doo.

³Shi'ana'í danilíinii t'ą́ą́' anáájée'go nidáahjį' naa'ííłdáazgo daneezná.

⁴Háálá bee shá haz'áanii áádóó biniyé ásht'íinii baa áhólyą́ą́ nít'éé'; bikáá'dóó nahat'áii bikáá' dóó dah sínídáago t'áá ákogi át'éego aa nánít'į́.

⁵Ał'ąą dine'é dadííníteh; doo yá'ádaashóonii ádasíníłdįįd; dabízhi' k'ééda'shíníłchxǫ'go hool'áágóó ahóyéel'áágóó baa dahoyoos'nah.

⁶Ana'í hool'áágóó ádaasdįįd; éíyee' bikin hadaas'áii naa'ahííníłtł'íidgo bee bééhániih dooleeł yę́ę t'áá yił ádaasdįįd.

⁷Nidi Bóhólníihii hool'áágóó hólǫ́ǫ doo; bibikáá'dóó nahat'áii bikáá'dóó ánihwii'aah dooleeł biniyé niiní'ą́;

⁸t'áá ákogi át'éego nihokáá' dine'é yaa nídóot'įįł; ał'ąą dine'é aheełt'éego yaa nídóot'įįł.

⁹Bóhólníihii éí diné bide áńdahoo'níiłii bine' adahinichéehii yá nilį́; bich'į' nidahwii'náago bine' adahinichéehii yá nilį́.

¹⁰Bóhólníihii nílíinii, nízhi' yéédahósinii éí naa dadzólíi doo, háálá há dandéez'į́į'ii doo yóó'adííní'ą́ą da.

¹¹Záíyandi Bóhólníihii kééhat'íinii baa dahohniihgo bich'į' dahohtaał! Dadine'é bitahgóó ááníłígíí baa dahołne'!

¹²Bi'diisyíinii bidił yá k'ééhidi'néehii yénálniih; diné hojooba' ádaaníigo doo yaa yoonéeh da.

¹³Bóhólníihii nílíinii, shaa jiiníbaah! Anoonééł bich'į' yah ahóót'i'dóó hááshííníłtíinii, shik'ee dadiniihgo shich'į' nidahwiiłnáanii níníł'į́,

¹⁴áko Záíyan bich'é'é bił yah a'atiingi bee naa ha'niihii t'áá ałtso baa hashne' doo; nibee yisdá'iildéehii baa shił hózhǫ́ǫ doo.

¹⁵Ał'ąą dine'é éí ahoodzą́ągo ádahoolaaí góyaa nahodits'ǫ' ííłdááz; tł'óół bee ódleehí nídeidees'į́į'ii t'áá bí yiih nídahaaskai.

¹⁶Bóhólníihii éí aa nát'į́įgo ánihwii'aahígíí bee béého'dílzingo í'diilyaa; diné doo yá'ádaashóonii t'áá bí łoh ádayiilaii yiih hikááh. Higáíyan. Síilah.

¹⁷Diné doo yá'ádaashóonii áádóó ał'ąą dine'é Diyin God yaa dayoonéehii t'áá ałtso hool'áágóó ti'hoo'nííhgóó yi'iiłníih doo.

¹⁸Jó, hojooba' nahas'áanii doo baa náhoyoo'nah da doo, áádóó diné bich'į' naho'diilnáanii bá chohoo'íinii doo hool'áágóó ádoodįįł da.

¹⁹Bóhólníihii nílíinii, díldzííł! Diné t'áadoo ak'eh dadidlíní doo; ał'ąą dine'é t'áá ni baa nánít'į́!

²⁰Bóhólníihii nílíinii, éí bił yéé' ádahóle'! Ał'ąą dine'é danilíinii t'óó diné t'éí danilį́įgo bił béédahózingo ánílééh! Síilah.