Read Navajo PSALMS 90 Bible Online

PSALMS 90 - Navajo bible

PSALMS 90

¹Bóhólníihii nílíinii, aníchį́į́dę́ę́' bine' i'niichéehii nílį́įgo hoolzhiizh.

²T'ah doo dził nihínííłdą́ą́' índa nahasdzáán áádóó nihokáá'góó dahólóonii t'ah doo ánílééhdą́ą́' hool'áádę́ę́' ahóyéel'áágóó Diyin God nílį́.

³Nihokáá' dine'é éí łeezh náádleełgo íínísin, Diné ba'áłchíní danohłíinii, t'ą́ą́' kónááh'nééh, bidiní.

⁴Háálá t'ááłáhídi mííl nááhaígíí éí adą́ą́dą́ą́' i'íí'ánígi áníłtso nahalingo, áádóó tł'éé' naagháhí t'áá díkwíí ahéé'iilkeedjį' naalnish nahalingo baa nitsíníkees.

⁵Tó yíląądgo diné adahaaz'éél nahalingo diné ááłdįįł; t'óó baa na'iigeełii nidahalin. Abínígo tł'oh háájé'ígíí nidahalin.

⁶Abínígo ániidígo hanisééh; e'e'áahgo nídanii łnahgo nídaagą́ą́h.

⁷Náháchį'ígíí bik'ee áńdeiidįįh índa t'óó báhádzidgo bee atí'éł'íinii béédeiildzidgo bik'ee náádíníidzo'.

⁸Doo ákwii ádeiit'įįdii nidááhdóó níínínil índa t'áá nahont'inee ádił nida'ayeelzíi'ii ninii' bee hool'injį' níínínil.

⁹Nihíyoo łkáłígíí t'óó báhádzidgo bee atí'éł'íinii bii' ałtso bił ahóóyá. T'óó ch'í'ít'ánígo hóóne'ígíí nahalingo nihee ninádahahááh.

¹⁰Tsosts'idiin nááhaijį' dahinii'ná, doodaii' t'ah t'áá nihidziilgo tseebídiin nááhaijį' dahinii'ná, nidi ákónízahjį' iinánígíí éí yéego naanish, áádóó yínííł t'éí bił hólǫ́. T'áadoo hodina'í ádįįh áádóó dah nídahidiikááh.

¹¹Háishą' náháchį'ígíí ábóodziilgi índa nits'ąą hasti'ígíí bik'ehgo t'óó báhádzidgo bee atí'éł'íinii bił bééhózin?

¹²Éí bąą nihijéí dahodooyąąłígíí biniyé nihí dayéełkaahii dayíníilta'go bínanihiníłtin.

¹³Bóhólníihii nílíinii, haa nízahdishą' índa nihich'į' nínádííyis? Ná nidaal'a'í daniidlíinii nihaa a'áhí nídíníídzįįł.

¹⁴Nida'ayeeldįįdjį' nihił nidahoozhǫǫh doo áádóó nihił dahózhǫ́ǫ dooleełígíí biniyé abíínígo aa a'ááh nínízinii bee hwiih daniidlį́įgo ánihílééh.

¹⁵Daashíínéelą́ą́' yiską́ąjį' atínihiinilaaígíí bik'ehgo nihił dahózhǫ́ǫgo ánihíínísin; daashíínéelą́ą́' nááhaijį' doo yá'át'éehii daníil'į́'ígíí bíighahgo nihił dahózhǫ́ǫgo ánihílééh.

¹⁶Ninaanish nilíinii ná nidaal'a'í bił ííshjání dadooleeł áádóó bada'áłchíní éí bee ayóó ánít'éhígíí bił ííshjání dadooleeł.

¹⁷Bóhólníihii nihiDiyin God yee jooba'ii nihik'igi hólǫ́ǫ le'. Áádóó nihíla' bee bindashiilnishii bohoníłdzilgo nihá ánílééh. T'áá aaníí, nihíla' bee bindashiilnishii bohoníłdzilgo ánílééh.