Read Navajo PSALMS 91 Bible Online

PSALMS 91 - Navajo bible

PSALMS 91

¹T'áá háiida Aláahgo Ayóó'át'éii binahont'ingo haz'ą́ągi kééhojit'ínígíí éí Aláahgo Ayóó'ábóodziilii bichaha'ohgi hojílǫ́ǫ doo.

²Bóhólníihii éí bine' ahinishchéehii áádóó bine' yisdziihii, shiDiyin God baa jííníshłíii nilį́, dideeshniił.

³Háálá éí tsídii ahiyiileehii índa ts'ííh niidóóh ooghą́ąłii bits'ą́ą́dóó yisdándoołtééł.

⁴Diyin God bits'os nineezígíí nik'íidoołtih áádóó bit'a' biyaajį' yisdádínííchééł. Yee ba'ahódlíii éí naagé índa béésh téél ách'ą́ą́h dah yit'áałii nihá nilį́.

⁵Tł'ée'go báhádzidii índa jį́įgo k'aa' yee da'diłt'ohígíí doo bééníldzid da doo.

⁶Chahałheełgóó naałniihii índa ałné'é'áahgo até'éł'į́įgo nida'ałtseedii doo bééníldzid da doo.

⁷T'ááłáhídi mííl níighahgi naa'adínóodah índa neeznáadi mííl ninish'náájígo naa'adínóodah, nidi doo nit'áahjį' dadookah da.

⁸Diné doo yá'ádaashóonii k'éédabidi'doolníłígíí nináá' bee t'óó yidííłtsééł.

⁹Bóhólníihii Aláahgo Ayóó'át'éii bine' anáníshchéehii éí bii' nighan áhwiinilaaígíí bąą

¹⁰doo yá'át'éehii doo ła' nik'i hwiidooleeł da índa naałniih doo ła' niníbaal yit'áahjį' doołnih da.

¹¹Háálá yínááłgóó bidiyingo nidaal'a'í naa ádahalyą́ągo íidoolííł.

¹²Bíla' yee dah daníłteehgo doo tsé bik'ą́ą́h didííltał da.

¹³Náshdóítsoh bitsiijį' daditł'ooígíí índa tł'iish báhádzidii bikáá'góó ch'ídíínááł. Náshdóí yáázh bitsiijį' daditł'ooígíí índa tł'iish bik'i nidíínaał.

¹⁴Ayóó'áshó'nínígíí bąą yisdádeeshtééł. Shízhi' yééhósinígíí bąą nidziidzííh dooleełgi nihodeeshtééł.

¹⁵Shich'į' sodoolzingo bich'į' énáhodeesįįł; bich'į' nahwii'náago bił honishłǫ́ǫ doo. Yisdádeeshtééł áádóó shił nilį́į doo.

¹⁶Iiná nineezgo há ádeeshłíiłgo bee nízh'dooldįįł áádóó shibee yisdá'iildéehii hach'į' ííshjání ádeeshłííł.