Read Navajo PSALMS 94 Bible Online

PSALMS 94 - Navajo bible

PSALMS 94

¹Bóhólníihii Diyin God, k'éédidíí'níiłii nílíinii, Diyin God k'éédidíí'níiłii nílíinii, ííshjání í'dílnééh!

²Nihokáá' dine'é yá nihwii'aahii nílíinii, díldzíiłgo diné ádaa daha'niihii k'éédahodídle'!

³Bóhólníihii nílíinii, haa nízahjį'shą' diné doo yá'ádaashóonii bił dahózhǫ́ǫgo ádaa daha'niih doo?

⁴Áshohódli' yee hadahadziih índa diné doo ákwii ádaaníiłii t'áá ałtso ádaa daha'niih.

⁵Bóhólníihii nílíinii, éí nidine'é yik'i naajeeh áádóó diné níí' danilíinii yide ádahósin.

⁶Asdzání bąąh áhásdįįdii áádóó dé'éyóní índa áłchíní bizhé'é ádinii nideiłtseed.

⁷Nidi nida'ałtseedii ádaaní, Bóhólníihii díí doo yizdoołtséeł da; Jéíkab biDiyin God nidi díí doo baa ákozdínóozįįł da.

⁸Diné bitahgi doo nitsíkeesii nohłíinii, ak'ida'doohtįįh! Doo ádaho łyáanii, hahgo lá dahodoosąął?

⁹Ajaa' adiits'a'go áyiilaii, éí adiits'a'. Anáá' áyiilaii, éí oo'į́.

¹⁰Ał'ąą dine'é yich'ahashkéego neinitinii k'éhézdon niná'iidlóós. Ił ééhózin diné yee neinitinii bił ééhózin.

¹¹Bóhólníihii éí nihokáá' dine'é bintsíkees danilíinii t'áadoo nánídlínígóó bił bééhózin.

¹²Bóhólníihii nílíinii, diné nanítinii áádóó bee hosíníł'áanii bínabiníłtinii, éí bik'ihojidlí.

¹³Áko diné doo yá'ádaashóonii bá hahwiis'niljį', bik'ijiinídlíii éí ach'į' nahwii'ná yits'ą́ą́dóó hanályį́įhgo ádíílííł.

¹⁴Háálá Bóhólníihii bidine'é doo yóó'iidoołkał da áádóó diné hóó' danilíinii doo yóó'azhdidoo'áał da.

¹⁵Jó, bee nihodiit'aahii t'áá ákogi át'é nídoodleeł, áko bijéí yee t'áá ákogi ádaat'éii yik'ehgóó ádaaníił doo.

¹⁶Diné ádił da'ílzíihiishą' háí shá yich'į' náádii'nah? Doo ákwii ádaaníiłiishą' háí shá yich'ą́ą́h sizį́į doo?

¹⁷Bóhólníihii doo shíká eelwodgóogo shii' sizíinii t'áadoo hodíína'í bił hodiiyeel doo nít'éé'.

¹⁸Kodi ałtádiisghaas, dííniidgo, Bóhólníihii nílíinii, aa a'ááh nínízinii bee de áshíínísin.

¹⁹Shijéí bi'diił'áhígíí lą'í yileehgo nits'ą́ą́dóó bee hada'ahóníinii shii' sizíinii t'áá íiyisí yił náhooshǫǫł.

²⁰Naat'áanii doo yá'áshóonii, éí bee haz'áanii yee doo yá'át'éehii yinaha'áii, da' éísh t'áá bił ałch'odíí'niił?

²¹Diné t'áá ákogi át'éego hináanii yiniyé ałhínéikah, índa diné doo ádihodiilt'i'ii dadootsaałgo bidił doonahjį' yá nídahwii'aah.

²²Nidi Bóhólníihii bine' nehesdzíihii nilį́; shiDiyin God éí tsé bine' ahinishchéehii nilį́.

²³T'áá bí doo ákwii ádáát'įįdii bik'ijį' nídadoodleełgo íidoolííł áádóó t'áá bí doo yá'áshónígi ádáát'įįdii biniinaa ábidi'dooldįįł. T'áá aaníí Bóhólníihii nihiDiyin God ábidoołdįįł.