Read Navajo PSALMS 95 Bible Online

PSALMS 95 - Navajo bible

PSALMS 95

¹Haa'íshą', Bóhólníihii bich'į' dahwiitaał! Baa nihił dahózhǫ́ǫgo tsé bee yisdéiikaii bich'į' yéego dahwiitaał!

²Bich'į' ahééh daniidzingo bidááhdóó nihidiikah, áádóó nihił dahózhǫ́ǫgo sin bee bich'į' yéego dahwiitaał doo!

³Háálá Bóhólníihii éí Diyin God ayóó át'éii nilį́; diyin dabidi'níinii t'áá ałtso biláahgo Aláahgo Naat'áanii ayóó át'éii nilį́.

⁴Nahasdzáán bii'góó ayóó ádahonízádígíí bílák'ee silá. Dził aghádahaz'áhígíí ałdó' bí.

⁵Tónteel ałdó' bí, háálá bí áyiilaa áádóó ni' yíłtseii áyiilaa.

⁶Haa'íyee', bich'į' yaa ádadii'níiłgo bich'į' nidahodiidlaał, Bóhólníihii ánihiilaii bich'į' nitsidadidiigoh!

⁷Háálá bí nihiDiyin God nilį́, áádóó bikéyah hootsogi bidine'é naakaígíí niidlį́. Jó, bidibé dah yooléełii daniidlį́. Díí jį́ Diyin God biinéé' dadoohts'a'go,

⁸shą́ą́', honoojíidi ałghadazhdit'ááh yę́ędą́ą́' áádóó Diyin God nabídazhnitaahgo yoołkááł yę́ędą́ą́' t'ą́ą́zh'neezhjé'ígi át'éego t'áadoo nihijéí dantł'izí.

⁹Áadi shinaanish dayoo'į́į́ nít'éé' nidi, danihizhé'é yę́ę shíkada'iisxilgo nashídaneeztą́ą́'.

¹⁰Dízdiin nááhaijį' éí oochíłígíí bich'į' doo shił hóózhǫǫdgóó ádííniid, Diné t'áá bí bijéí yee ádił nida'ílzííh. Ánísht'éii doo bił béédahoozį́į́' ádaat'ée da.

¹¹Áko t'óó báhádzidgo atí'ésh'íinii binahjį' ádee hadeesdzíi'go ádííniid, Háá'áyį́į́h bee hooł'a'ígíí ts'ídá doo biih dazhdookah da.