Read Navajo PSALMS 97 Bible Online

PSALMS 97 - Navajo bible

PSALMS 97

¹Bóhólníihii nant'á, nahasdzáán bił nihoozhǫǫh le'! Táyi'dę́ę́' kéyah lą'í hadaaz'áhígíí bił dahózhǫ́ǫ le'!

²Binaagóó k'os índa chahałheeł hólǫ́. T'áá ákogi át'éii áádóó doo haada yit'éii bee bibikáá'dóó nahat'áii bohoníłdzilgo si'ą́.

³Kǫ' bilą́ąjį' doonałgo binaagóó bi'ana'í iidiyiiłk'ą́ą́h.

⁴Bits'ą́ą́dóó nída'iilgęshii nahasdzáán bikáá'góó bee nídahool'įįh; nahasdzáán éí yiyiiłtsą́ągo yik'ee ditłid nít'éé'.

⁵Nahasdzáán t'áá si'ą́ą́ nít'éé' bee Bóhólníihii honíle'go bik'ee ak'ah dííłhį́'ígi át'éego dził dadííłhį́į́'.

⁶Yádiłhił éí Bóhólníihii t'áá ákogi át'éhígíí yaa halne' áádóó ał'ąą dine'é t'áá ałtso bee ayóó ájít'éii dayoo'į́.

⁷Be'elyaii yich'į' nidahałáii, be'elyaii yee ádaa daha'niihii t'óó ádaa yádandzin le'. Diyin danihidi'níinii t'áá ánółtso, Bóhólníihii bich'į' nidahohłá.

⁸Záíyan adiizts'ą́ą'go bił hóózhǫǫd. Bóhólníihii nílíinii, ánihoyí'aahígíí binahjį' Júdah bitsi'ké t'áá íiyisí bił dahóózhǫǫd.

⁹Háálá ni, Bóhólníihii nílíinii, nahasdzáán t'áá si'ą́ą́ nít'éé' biláahgo ayóó ánít'é. Diyin dabidi'níinii t'áá ałtso biláahgo ayóó át'éii nílį́.

¹⁰Bóhólníihii ayóó'ádeínóhnínígíí, doo yá'át'éehii dajiinohłá; Bóhólníihii éí bidiyį́į́' danilíinii bii' naazíinii yá yaa áhályą́. Diné doo yá'ádaashóonii yits'ą́ąjį' yisdáyiinííł.

¹¹Diyin God éí diné t'áá ákogi ádaaníiłii yá adiníłdíín. Diné bijéí t'áá ákogi ádaat'éii bił nídahoojǫǫłgo áyósin.

¹²Diné t'áá ákogi ádanoht'éii, Bóhólníihii baa nihił nidahoozhǫǫh! Jidiyinígíí béédaałniihgo bich'į' ahééh danohsin!