Read Navajo PSALMS 98 Bible Online

PSALMS 98 - Navajo bible

PSALMS 98

¹Sin ániidíii bee Bóhólníihii bich' į' dahohtaał, háálá t'óó bik'eda'ayóii áyiilaa! Bíla' nish'náájí índa bigaan diyinii yee ak'eh deesdlį́į́'!

²Bóhólníihii bibee yisdá'iildéehii bééhózingo áyiilaa; ał'ąą dine'é binááł t'áadoo bahat'aadí bit'áá ákogi át'éii yit'íní áyiilaa.

³Aa a'ááh nízinii índa yee ba'ahódlíii Ízrel dine'é yee yénáálnii'. Nahasdzáán nidanees'ą́ą́dę́ę́' ał'ąą dine'é t'áá ałtso nihiDiyin God bibee yisdá'iildéehii dayiiłtsą́.

⁴Nahasdzáán t'áá náhwiiz'ą́ą́ nít'éé' bikáá'góó kéédahoht'íinii, nihił nidahoozhǫǫhgo Bóhólníihii bich'į' yéego dahohtaał. Ayóó íits'a'go dahohtaał! Nihił dahózhǫ́ǫgo baa dahohniihgo dahohtaał!

⁵Tsin tł'óół bąąh daneelzhee'go bee nida'a'néii bee Bóhólníihii bich'į' dahohtaał! Éí bee na'a'néego sin bee bich'į' dahohtaał!

⁶Bóhólníihii, Aláahgo Naat'áanii nilíinii bidááhdóó nihił nidahoozhǫǫhgo béésh dilní bee í'dílzoołí índa deenásts'aa' bidee' bee í'dílzoołí dadiits'a'go ádeínóhsin!

⁷Tónteel áádóó bii' dahólóonii t'áá ałtso índa nahasdzáán áádóó bikáá' kéédahat'íinii ayóó íits'a'go hahodidoołdlał!

⁸Ahídajikadígi át'éego tooh ahínídadiilk'ołgo índa dził t'áá ahąąh bił nidahoozhǫǫhgo

⁹Bóhólníihii yidááhdóó dahataał le', háálá nahasdzáán yaa nídóot'įįł biniyé yíghááh. T'áá ákogi át'éii yee nahasdzáán yaa nídóot'įįł; nihokáá' dine'é t'áá aheełt'éego baa nízhdóot' įįł.