Read Navajo PROVERBS 12 Bible Online

PROVERBS 12 - Navajo bible

PROVERBS 12

¹T'áá háiida hasht'eninábi'diidlóosii ayóó'áyó'nínígíí éí ił ééhózin ałdó' ayóó'áyó'ní, nidi adidooteh jijoołáii éí doo áhojilyą́ą da.

²Diné yá'át'éehii éí Bóhólníihii bits'ą́ą́dę́ę́' ach'oha'né shóyoołt'eeh, nidi diné doo yá'áshǫ́ǫ́góó binahagizii Bóhólníihii baa nídóot'įįł.

³Diné éí doo yá'áshóonii doo yee doołdził da, nidi diné t'áá ákogi ááníiłii behétł'óól doo hidólnááł át'ée da.

⁴Asdzání t'áá íiyisí hóyáanii éí hahastiin bił jílį́įgo ájósin, nidi asdzání baa yáhásinii áyoolíłígíí éí bahastiin bits'in biyi'di hodiłdzid nahalingo áyósin.

⁵Diné t'áá ákogi ááníiłii éí t'áá ákogi át'éego nitsíkees, nidi diné doo yá'áshóonii binahat'a' éí na'adlo' ádaat'é.

⁶Diné doo yá'áshóonii éí diné diyoolyééł t'éí yeinít'į́, nidi diné t'áá ákogi ádaat'éii éí bizaad yisdábidoonił.

⁷Diné doo yá'ádaashóonii bik'eh hodeesdlį́į'go doo náádahódlǫ́ǫ da łeh, nidi diné t'áá ákogi ááníiłii bighan haz'ą́ągi bidziilgo dah yikah.

⁸Diné hóyą́ągo nitsíkeesii bik'ehgo yá'át'éehgo bá yáti', nidi diné bijéí biyi'di bąąhági át'éego nitsíkeesii éí diné dabi'į́į łeh.

⁹Diné bi'dit'íinii bá naal'a'í hólóonii éí diné ayóó ánísht'é jinízinii haghangi hodichinígíí yiláahdi át'é.

¹⁰Diné t'áá ákogi ááníiłii bilį́į́' bił nilį́įgo yaa áhályą́, nidi diné doo yá'áshóonii aa a'ááh hasin shee hólǫ́ nízin, nidi doo yits'íid da.

¹¹Dá'ák'ehgi nináhojiiłdla'ii éí hach'iyą' bee hwiih jílį́į doo, nidi diné t'áadoo biniyéhígóó nidaakaii bikéé' naaníjoolwołii éí bee ak'izh'di'dootį́łígíí hwee ádin.

¹²Diné doo yá'áshóonii éí diné doo yá'ádaashóonii deineez'į́į'ii yídin nilį́, nidi diné t'áá ákogi ááníiłii éí behétł'óól nooséełgo bineest'ą' haleeh.

¹³Diné doo yá'áshóonii bąąhági át'éego yáłti'go yee azanádááh, nidi diné t'áá ákogi ááníiłii ach'į' nahwii'ná yii' haaghááh.

¹⁴Diné yee yáłti'ígíí bits'ą́ą́dóó yá'át'éehii yee hwiih nilį́, áádóó diné bíla' yee yinaashnishii t'áá éí bich'į' niná'iidlé.

¹⁵Diné doo áhályáanii yee át'éii éí t'áá ákóne' ásht'į́ nízingo yaa nitsíkees, nidi diné kót'é bidi'níinii yiyíists'ą́ą'ii éí hóyą́.

¹⁶Diné doo áhályáanii t'áá áko báháchįįhgo bééhoozįįh, nidi diné hóyáanii éí baa yáhásinii t'óó yik'i hoozi'.

¹⁷T'áá aaníígóó yáłti'ii éí t'áá ákogi át'éii ííshją́ą́ áyósin, nidi t'áá ádzaagóó halne'ii éí bina'adlo'.

¹⁸Ła' diltłish aa aalgeedígíí nahalingo yáłti', nidi diné hóyáanii bizaad éí chánah áná'oodlííł.

¹⁹T'áá aaníinii bee ha'iidziihii éí hool'áágóó bohoníłdzil, nidi wooch'ííd yee hahadziihii éí doo bee hodina' da.

²⁰Doo yá'áshóonii yindaha'áii éí bijéí biyi'di na'adlo' dahólǫ́, nidi kót'éego k'é hwiindzin daaníinii éí bił dahózhǫ́.

²¹Diné t'áá ákogi ááníiłii doo yá'át'éehii doo bik'i hwiidooleeł da, nidi diné doo yá'ádaashóonii éí bich'į' nidahwii'ná.

²²Bóhólníihii éí wooch'ííd bee yáti' doo yíłdin da, nidi t'áá aaníígóó ádaat'íinii éí yaa bił hózhǫ́.

²³Diné hóyáanii bił bééhózinígíí doo t'áá át'é yaa halne' da, nidi diné doo ádahalyáanii dabijéí yee ádeinízinii yíní ádin yee yaa nidahodiłdlaad.

²⁴Haleebee bigaan yee naalnishii éí bóhólníih doo, nidi bił hóyée'ii éí naanish bídidi'nilchéeh doo.

²⁵Diné bijéí bii' bi'diił'áii hólǫ́ǫgo éí yik'ee yínííł sidáa łeh, nidi saad yá'át'éehii bee bich'į' ha'adzihgo éí bił náhooshǫǫł.

²⁶Diné t'áá ákogi ááníiłii yił kééhat'íinii yá'át'éehgo yoo'ish, nidi diné doo yá'ádaashóonii éí yił kéédahat'íinii nida'iisíihgo ádeile'.

²⁷Bił hóyée'ii naalzheehgo yiyiiłhéehii t'áadoo yiłt'is da, nidi diné haleeyee át'į́įgo da'ílíinii nishóyiyoołt'eeh.

²⁸T'áá ákogi át'éego áhoot'éégóó iiná hólǫ́, áádóó éí honít'i'góó ałdó' aniné ádin.