Read Navajo PROVERBS 13 Bible Online

PROVERBS 13 - Navajo bible

PROVERBS 13

¹Aye' hóyáanii bizhé'é yínabiniłtinii yiyíists'ą́ą́', nidi diné ánahałt'i'ii éí bich'ahojishkéego doo yiyíists'ą́ą' da.

²Diné yá'át'éehgo yáłti'ii éí yá'át'éehii yiyą́ą doo, nidi diné nináda'dii'aahii éí doo ats'ííd dabijíłkiin doo.

³T'áá háiida bizaad yaa áhályą́ągo yáłti'ii éí hináa dooleeł, nidi diné t'áá ádzaagóó yádíłtihii yee átí'ádiil'įįh.

⁴Bił hóyée'ii bii' sizíinii t'áadoo le'é yídin nilíinii doo bee haleeh da, nidi diné haleeyee át'íinii bii' sizíinii bá yá'át'éehgo áhooníił doo.

⁵Diné t'áá ákogi át'éii wooch'ííd yijoołxá, nidi diné doo yá'áshóonii éí nádį́'ídi t'óó haa'ih, áádóó t'óó haa yánáhásįįh.

⁶Diné t'áá ákogi át'éego joogáałii éí t'áá ákogi ájít'ínígíí haa áhályą́, nidi diné ádił ni'iisíihii éí doo yá'áshóonii hak'eh didleeh.

⁷Diné at'į́ á'díl'íinii hólǫ́, nidi t'áadoo bee hólóní da, áádóó diné baa hojoobá'í á'díl'íinii hólǫ́, nidi t'áá íiyisí bidziilgo dah ooléeł łeh.

⁸Diné biyódí yee hináanii ách'ą́ą́h neilyé, nidi diné baa hojoobá'ígíí t'áadoo bizéé' yidó'áłí da.

⁹Diné t'áá ákogi át'éii nizhónígo adinídínígíí nahalin, nidi diné doo yá'áshóonii bee hool'iní neeztsizii nahalin.

¹⁰Ádaa ha'niih bee ahinídiiltłáád t'éí nihwiileeh, nidi kót'é dabidi'níigo dayíists'ą́ą'ii éí hódzą́ át'é.

¹¹Jit'íinii t'áadoo bik'éna'azhnishí shóozt'e'ii t'áá áko ábi'niidįįh, nidi diné naalnishgo áłah é'éléehii éí t'ah yówehgo bá bilááh yileeh.

¹²Bíká hoł chohoo'íinii doo hah ánééhgóó hajéí bąąh nahodookał, nidi laanaa jinízinii haleehgo éí iiná tsin sikaadii át'é.

¹³T'áá háiida saad bee hódzą́ yiyíí'įįdígíí éí atíhodi'doolnííł, nidi bik'eh ó'oo'níiłii yidísinígíí bich'į' ni'doolyééł.

¹⁴Diné hóyáanii yee has'áanii éí iiná háálíinii át'é, áko éí anoonééł biloh bits'ą́ąjį' dashdidoogááł.

¹⁵Yá'át'éehgo ak'i'da'diitįįhii bich'oha'neeh, nidi nináda'dii'aahgo dahináanii éí bá nahontł'ah.

¹⁶Diné dahóyáanii t'ááłá'í nítínígo bił bééhózinígíí yaa nidaakai, nidi diné doo áhályáanii bidoo áháyą' bééhózínígo ádeile'.

¹⁷Diné doo yá'áshóonii hane' nei'áii doo yá'át'éehii yiih yilwo', nidi ba'ahódlíigo naal'a'í éí hadaałt'é áná'oodlííł.

¹⁸Diné hasht'e'nináhodi'doodlóosgo doo dziniizį́į'ii éí haa hojoobá'í áádóó t'óó haa yáhásin doo, nidi hodidooteh hoł nilíinii éí diné bich'į' ajílį́įgo áho'diilyaa doo.

¹⁹Laanaa hwiindzinii bohool'įįhgo éí ayi' sizíinii bił bik'e'ahwiih, nidi diné doo ádahalyáanii éí doo yá'áshóonii bits' á'doodááł doo deíłdin da.

²⁰Diné dahóyáanii bił jookahii éí hojíyą́ą doo, nidi diné doo ádahalyáanii béézhdiilwo'ii bik'ee ti'náhwiizhdoo'nih.

²¹Ádił nida'jiisíihii doo yá'áshóonii shódahwiidoołt'eeł biniyé nidahoniłché, nidi diné t'áá ákogi ádaat'éii éí yá'át'éehii bich'į' ninádahidoolyééł.

²²Diné yá'át'éehii binálíké bíí' dadooleełii yá ats'éidi'ááh, áádóó diné ádił nida'iisíihii binaalye'é dah yoot'įįłígíí diné t'áá ákogi ádaaníiłii bá hasht'e'nii'nił.

²³Kédaayah índa bikáá' k'i'doolyáago ákwii badahojoobá'ígíí ch'iyáán t'óó ahayóí bá hólǫ́ǫ łeh, nidi doo ákwii áhooníiłii biniinaa hats'ą́ą́' nidahachǫǫh.

²⁴Habee atsxis áádzísįįdii éí haye' jijoołxá, nidi haye' ayóó'ájó'níinii éí nínázníłtsxis doo.

²⁵Diné t'áá ákogi át'éii hwiih yileehjį' ayą́, nidi diné doo yá'áshóonii bibid dichin nilį́į łeh.