Read Navajo PROVERBS 14 Bible Online

PROVERBS 14 - Navajo bible

PROVERBS 14

¹Asdzání dahóyáanii t'ááłá'í nítínígo ba'áłchíní deinisééh, nidi asdzání doo áhályáanii ba'áłchíní ła'ayóí yé'éts'ihgo tainoołka'.

²Diné t'áá ákogi át'éego yigáałii Bóhólníihii yidósin, nidi diné nahagizgo hináanii éí Bóhólníihii yik'ee diniih.

³Diné doo áhályáanii ádaa ha'niihgo yáłti'ii éí bee nínábidi'nilghał, nidi diné dahóyáanii yádaałti'go éí baa ádahalyą́ą doo.

⁴Béégashii bee nihwiildlaadii ádingo nooh ná'áchííh góne' t'áadoo siláhí da łeh, nidi béégashii bee nihwiildlaadgo bits'ą́ą́dóó t'óó ahayóí níná'nít'į́į́h.

⁵Ba'ahódlíigo halne'ii doo biyooch'íid da, nidi t'áá ádzaagóó halne'ii éí biyooch'íidgo yáłti'.

⁶Diné ánahałt'i'ii hódzą́ haintáago t'áadoo yik'ídoogáał da, nidi ak'idi'yiitįįhii doo bá nantł'agóó bił ni'ééhwiizįįh.

⁷Diné doo áhályáanii bits'ánínááh, háálá éí saad bee hódzáanii bee ádin.

⁸Diné hóyáanii hóyą́ągo éí hináanii át'éii yee ak'idi'yiitįįhii bibee hódzą' át'é, nidi diné doo ádahalyáanii doo hóshkał yaa nidaakaígíí éí na'adlo' át'é.

⁹Diné doo ádahalyáanii éí bąąhági át'éii t'óó yándahałt'i', nidi diné t'áá ákogi ádaat'éii bitahgóó ach'oha'né yá'át'éehii dahólǫ́.

¹⁰Diné bijéí doo yits'ídígíí t'áá bí ádá bił bééhózin, áádóó díí diné bił hózhónígíí dé'éyóní doo bił ałts'ą́ą́' adzíłk'iiz da doo.

¹¹Diné doo yá'áshóonii kin yii' bighan nidi, ba'áłchíní ábidi'dooldįįł, nidi diné t'áá ákogi át'éii azhą́ níbaal yii' bighan nidi, ba'áłchíní náás noot'į́įł doo.

¹²T'áá ákǫ́ǫ́ áhoot'éégóó hinishná diné nízin, nidi hool'áágóó aniné biyi'jį' bá dah dahodiit'i'.

¹³Azhą́ joodloh nidi, hajéí yínííł nilį́, áádóó ił hózhǫ́ nihiniłnéehdi yínííł nánídlį́.

¹⁴Yóó'anáádzáii t'áá bí nitsékeesii yee hwiih yileehgo ti'nábiyoołnih, nidi yá'át'éehgo hináanii t'áá éí yee hwiih nilį́.

¹⁵Diné doo hóyáanii éí saad t'áá ałtso yoodlą́, nidi diné hóyáanii éí yigááłgóó álą́ąjį' déez'į́į́'.

¹⁶Diné hóyáanii ádaa yisdzidgo doo yá'áshóonii yits'áhághááh, nidi diné doo áhályáanii éí t'áá bizááká náás dahi'nahgo t'áá ákogi ásht'į́ nízin.

¹⁷Diné t'áadoo hodina'í báháchįįhii t' áadoo ájóne'gi áánííł, áádóó diné doo yá'áshǫ́ǫ́góó nahoji'áii hak'ee hodi'niih.

¹⁸Diné doo dahóyáanii doo hóshkał nishódayoołt'eeh, nidi diné dahóyáanii éí ił ééhózin nishódayoołt'eehgo yee ił danilį́.

¹⁹Diné doo yá'ádajíshóonii éí diné yá'ádaat'éehii bich'į' yaa anídajiit'įįh doo, áádóó diné doo yá'ádaashóonii éí diné t'áá ákogi ádaat'éii bił yah ada'iiztiingi yaa anídajiit'įįh doo.

²⁰Bahojoobá'íii yił kééhat'íinii nidi, bá doolnih, nidi diné at'íinii éí bik'isóó t'óó ahayóí.

²¹Diné bił kééhojit'íinii jijoołxáii ádił ni'jiilzííh, nidi diné bahojoobá'íii baa jijooba'ii éí hoł hózhǫ́.

²²Da' doo yá'áshóonii yindaha'áiísh doo nida'iisíih da? Nidi yá'át'éehii yindaha'áii aa a'ááh hwiindzin áádóó t'áá aaníinii bee dahólǫ́.

²³Yéego na'anish t'áá ałtso bee íná'iideełii át'é, nidi t'óó yáti'ígíí éí té'é'į́ áhwiił'įįh.

²⁴Diné dahóyáanii éí deit'íinii bee baa daha'niih, nidi doo dahóyáanii bidoo áháyą' éí doo hóshkał t'éiyá ádaat'é.

²⁵T'áá aaníígóó hane'ii ayi' sizíinii yisdáyiinííł, nidi hayooch'íidii éí hona'adlo'go hojilne'.

²⁶Bóhólníihii jidósinii éí doo náznílyées da áádóó ha'áłchíní yine' ahidínóochéełii bá hólǫ́ǫ doo.

²⁷Bóhólníihii jidósingo éí iiná háálíinii át'é, áko éí bee anoonééł biloh bits'ą́ąjį' dashdidoogááł.

²⁸Aláahgo naat'áanii bidine'é t' óó ahayóígíí bee baa ha'niih, nidi diné bi'oh nádleehgo éí naat'áanii atííł'į́.

²⁹Doo hah háháchįįhii éí t'áá íiyisí ak'izhdi'yiitįįh, nidi t'áadoo hodina'í háháchįįhii éí doo áháyą' aláahgo áyiił'įįh.

³⁰Ajéí hasht'edít'éii bee ats'íís doo bąąh téeh da, nidi ooch'į́į́d éí hats'in deidiłdzid.

³¹Diné badahojoobá'íii bide áhojósinii éí Ábiilaii doo hoł nilį́į da, nidi diné jooba' nahas'áanii baa jijooba'ii éí Áhoolaii hoł nilį́.

³²Diné doo yá'áshóonii doo yá'át'éehii baa nijigháhígíí biniinaa nahgóó kóhodi'doolnííł, nidi diné t'áá ákogi át'éii t'áá bił chohoo'į́įgo dadootsaał.

³³Diné ła' bee ak'idi'yiitįįh bee hólóonii éí bijéí yee hóyą́, nidi diné doo ádahalyáanii yaa nitsídaakeesii bééhózingo áálnííł.

³⁴T'áá ákogi át'éii éí dadine'é ił danilį́įgo áyoolííł, nidi bąąhági át'éii éí dadine'é yáhásin yénéínił.

³⁵Naal'a'í hóyáanii éí aláahgo naat'áanii bich'ijí astą́, nidi t'óó haa yáhásinígi ádziidzaii éí aláahgo naat'áanii hach'į' doo bił hózhǫ́ǫ da.