Read Navajo PROVERBS 15 Bible Online

PROVERBS 15 - Navajo bible

PROVERBS 15

¹Áháchį' bich'į' hazhó'ó háá'iidziihgo éí áni' náyooshǫǫł, nidi t'áá na'níle'dii ha'iidziih éí t'óó yówehda diné yáháłchįįh.

²Hóyáanii yáłti'go ił ééhózin t'áá ákogi át'éego choyooł'į́, nidi doo ádahalyáanii éí doo áháyą' yee yádaałti'.

³Bóhólníihii éí t'áadoo bínii'ohígóó doo yá'áshóonii áádóó yá'át'éehii haisííd.

⁴Jooba'go yáti' éí iiná tsin sikaadii át'é, nidi nahagizgo yáti' éí yik'ee diné doo ákódaane' da.

⁵Doo áhályáanii éí bizhé'é yínabiniłtinii yik'ee diniih, nidi bich'aho'dishkéii bił nilíinii éí hóyą́.

⁶Diné t'áá ákogi át'éii bikin si'ánígíí bii' yódí t'óó ahayóí hólǫ́, nidi diné doo yá'áshóonii bich'į' i'iideełígíí éí ach'į' nahwii'ná bił hólǫ́.

⁷Dahóyáanii ił ééhózin t'áá ałtsogóó yaa dahwéelnííh, nidi doo ádahalyáanii éí bijéí biyi'dóó doo yee ákódaat'į́į da.

⁸Bóhólníihii éí diné doo yá'ádaashóonii náádayiiłniihígíí doo yíłdin da, nidi t'áá ákogi ádaat'éii bisodizin éí t'áá íiyisí yaa bił hózhǫ́.

⁹Bóhólníihii éí doo yá'ádajíshóonii dajíkááhgóó doo yíłdin da, nidi t'áá ákogi át'éii bik'ehgo joogáałii éí ayóó'áhó'ní.

¹⁰Yá'át'éehgo iiná doo jinízinii hasht'e'nináho'deedlóozgo bik'ee ti'hwiizhdoonih áádóó hach'aho'dishkéii jijoołxáii éí dazdootsaał.

¹¹Bóhólníihii éí ch'į́įdiitah áádóó hool'áágóó ti'hoo'nííh hólǫ́ǫgo yoo'į́, áko t'ah nááyówehgo dine'é danilíinii bijéí ádaat'éegi bił bééhózin.

¹²Ánahałt'i'ii bich'ahashkéii doo ayóó'áyó'níi da, índa diné hóyáanii doo yaa doogáał da.

¹³Ajéí bił hózhóonii hoł hózhǫ́ joolnii' áyiił'įįh, nidi ajéí yínííł nilíinii bąąh nahwiikaad.

¹⁴Bijéí ak'i'diyiitįįhii ił ééhózin hát'į́, nidi diné doo ádahalyáanii doo áháyą' bił daalkan.

¹⁵Diné bich'į' nahwii'náago bee i'ii'aahígíí t'áá ałtso doo yá'át'éeh da, nidi diné bijéí bił hózhóonii t'áá áłahíjį' bá áda'azįįd.

¹⁶Naalye'é t'óó ahayóí hwee hólǫ́ǫgo ach'į' nahwii'ná bił naazt'i'ígíí biláahgo naalye'é áłch'į́į́dígo dah yilyéełii áádóó Bóhólníihii dílzinjígo agháago yá'át'ééh.

¹⁷Béégashii aałk'eego nidahaazt'éii bee áda'azįįdgo ałk'ee dadi'niihii bił da'jilghałígíí biláahgo diné bił ayóó'áda'ahijó'níinii haza'aleeh bii' ool'éelgo bił dajiyą́ą́jí agháago yá'át'ééh.

¹⁸Diné báháchįįhii ahinídiijeeh áyiił'įįh, nidi diné doo hah báháchįįhii ahiní'diijé'ígíí hasht'éididoołt'eeł.

¹⁹Hoł hóyée'ii hwee áhoot'éii éí hosh binázt'i' nahalin, nidi diné t'áá ákogi át'éii éí azdoolkǫ'góó yigááł.

²⁰Aye' hóyáanii bizhé'é yił hóshǫ́, nidi diné doo áhályáanii bimá yi'į́į łeh.

²¹Ak'i'diitįįh bee ádinii éí doo hóshkał yaa bił hózhǫ́, nidi diné ak'i'diitįįhii éí yigááłgóó k'íhoołdǫǫł.

²²Kót'éego níinii ádingi biniyé ádahat'íinii t'óó ąąh nidahwiiłkaad, nidi kót'éego daaníinii t'óó adahayóigi biniyé ádahat'íinii dabidziilgo hasht'edaalne'.

²³Diné yá'át'éehgo ił ééhoosįįdii éí yaa bił hózhǫ́, áádóó t'áá bá át'éé góne' ha'oodzí'ígíí dooládó' yá'át'éeh da.

²⁴Hool'áágóó ti'hoo'nííh bił haz'ą́ bits'ą́ąjį' dashdidoogáłígíí biniyé hojíyáanii dego iiná hólǫ́ǫjį' há e'etiin.

²⁵Bóhólníihii éí diné ádaa ha'niihii ba'áłchíní t'áá bił yidoołchǫǫł, nidi asdzání bąąh áhásdįįdii bikéyah doo biyaa haot'ááł át'éégóó íidoolííł.

²⁶Bóhólníihii éí diné doo yá'ádaashóonii bintsíkees doo yíłdin da, nidi saad ił hóshóonii éí chin bąąh ádin.

²⁷Ayóogo áchą́yídéelni'ii bighan yich'į' nahwiiłná, nidi a'ídeeł yijoołxáii éí hináa dooleeł.

²⁸T'áá ákogi át'éii yee háádoodzihii t'áá biyi'ídi yaa nitsékos, nidi diné doo yá'áshóonii éí saad nichǫ́'í bizéé'dę́ę́' háálį́.

²⁹Bóhólníihii éí diné doo yá'ádaashóonii nízaadi yits'ą́ądi hólǫ́, nidi diné t'áá ákogi ádaat'éii bisodizin yidiits'a'.

³⁰Diné bił nihoozhǫǫhii jiníł'į́įgo éí hajéí yił hóshǫ́ǫ łeh, áádóó yá'át'éehgo hane'ii éí bee hatah yá'áhoot'éeh łeh.

³¹Diné iiná biniyé bich'aho'dishkéego hazhó'ó yiyíists'ą́ą'ii éí dahóyáanii yitah kééhat'į́į doo.

³²Diné bínabidi'niltinii doo yinízingóó doo yiyíists'ą́ą'ii t'áá bí bii' sizíinii yidiláásh, nidi diné bich'aho'dishkéego hazhó'ó yiyíists'ą́ą'ii éí bee ak'i'diitįįhii bee nihwiileeh.

³³Bóhólníihii dólzin éí hódzą́ bína'niltin át'é, áádóó a'ohgo ádaa nitsídzíkeesii éí ił ídlį́ bitsé siláii át'é.