Read Navajo PROVERBS 17 Bible Online

PROVERBS 17 - Navajo bible

PROVERBS 17

¹Haghangi áda'azįįdgo saad hólóonii biláahgo bááh t'áá bízhání jiyą́ągo t'áadoo íits'a'í dzizdáájí agháago yá'át'ééh.

²Aye' baa yáhásinii áyoolíiłii éí naal'a'í hóyáanii binant'áa dooleeł, áko éí aye' bik'isóó danilíinii bíí' dadooleełii naal'a'í yił ałts'ą́ą́' da'íłk'iiz doo.

³Ásaa' bii' béésh łigaii bąąh hadilyį́hí béésh łigaii bá át'é, áádóó déédíljah góne' óola bii' dilyį́hí óola bá át'é, nidi Bóhólníihii éí ajéí nayínítaah.

⁴Diné doo yá'ájíshóonii éí diné doo yá'áshǫ́ǫ́góó yáłti'ii ayóo jíists'ą́ą́', áádóó hayooch'íidii éí diné bee ádíláahgo yáłti'ii ayóo jíists'ą́ą́'.

⁵Diné ła' éí bahojoobá'íii bá nahojiłt'i'go Áhoolaii doo hoł nilį́į da áádóó diné ła' báádahadzidgo ádahooníiłii baa hoł hózhónígíí éí ts'ídá atíhodi'doolnííł doo baa dáázhdidoogáał da.

⁶Hastóí danilíinii análíké índa atsóóké baa bił dahózhǫ́, áádóó áłchíní danilíinii dabizhé'é baa bił dahózhǫ́.

⁷Diné doo áhályáanii aizdoo'į́įgo niyáháłtéehgo doo beełt'ée da, áádóó t'ah nááyówehígo naat'áanii biyooch'íidgo doo beełt'ée da.

⁸Bee naho'diiznii'ii éí nahwiiłniihígíí nitł'iz ílíinii nahalingo yaa nitsíkees; éí bee naho'diiznii'ii dah yooléełii bee yá'át'éehgo bá áhooníił doo.

⁹Diné ła' bee haz'áanii hetíihii neinił'ingo éí ayóó'ó'ó'ní hólǫ́ǫ dooleełgo át'į́, nidi diné yeinít'íinii éí diné ałch'odaa'níinii ałch'į' yidiiłk'ąąh.

¹⁰Diné hóyáanii bich'aho'dooshkeedgo bidídóołniił, nidi doo áhályáanii neeznádiindi nábi'dooltsxas nidi, doo bidídóołniił da.

¹¹Diné ádił naalteehgo naagháii éí doo yá'áshóonii hát'į́; éí bąą doo yits'íídgóó hane' nei'áii hach'į' dool'aał.

¹²Diné doo áhályáanii bidoo hóshkał t'áá náás yoołt'ihgo bidááshníyáii biláahgo shashtsa'ii biyázhí bee neest'į́į'ii bidááshníyáájí agháago yá'át'ééh.

¹³T'áá háiida yá'át'éhígi áát'įįdgo bidiníná doo yá'áshónígi áńjíít'įįdgo haghan haz'ą́ą́dóó doo yá'áshóonii doo dah hodidooleeł da.

¹⁴Diné ła' t'óó ahinídiiltłahígo tó didlaadígíí bił ałk'eh; éí bąą t'ah doo ahinídoołtł áádgóó ałch'į' naałdzilígíí nídinoołtłóohgo nahjį' nidinoh'aah.

¹⁵T'áá háiida diné doo yá'áshóonii yá'át'éehgo yá yáłti'ii áádóó diné t'áá ákogi át'éii baa níjít'íinii t'áá ájíłah Bóhólníihii doo hółdin da.

¹⁶Ha'át'íí lá biniyé diné doo hóyáanii yee ak'ididootį́įłii bee ádingo bee hódzáanii nahashniih níigo dah doolnih?

¹⁷Ak'is éí t'áá áłahjį' bił ayóó'áhijó'níi łeh, áádóó hade áhoot'įįhgo t'áá ła' bił hajíí'áázh yileeh.

¹⁸Diné ak'i'diitįįh bee ádinii éí yił kééhat'íinii binááł diné ła' béeso ba'í'níiłgo shí bá sézį́į dooleeł níigo naaltsoos bikáá' bízhi' áyiił'įįh.

¹⁹Ahinídiiltłáád ayóó'áyó'níinii éí bee haz'áanii hetííh ayóó'áyó'ní, áádóó dooládó' shída nízingo bidáádílkał naashch'ąą'go yee ádoot'íinii éí atíbidi'doolnííł hát'į́.

²⁰Diné bijéí bii' nahagiz hólóonii yá'át'éehgo doo bá áhooníił da doo, áádóó doo yá'áshǫ́ǫ́góó yáłti'ii bich'į' hodii'nááh.

²¹Diné éí haye' há yizhchíinii doo hóyą́ą́góó deeyáii yínííł yiih hóółt'e', áádóó diné doo áhályáanii hazhé'é doo hąą bił hózhǫ́ǫ da.

²²Ajéí bił hózhóonii éí azee' idééłnínígíí nahalingo yá'át'ééh, nidi yínííł hade át'įįhgo hatah doo ákóhooł'įįh da.

²³Diné doo yá'áshóonii éí t'áá ákót'éego dahonít'i'ii łahgo át'éego ádeidoolííł biniyé t'áá nahont'inee t'áadoo le'é beilyééh.

²⁴Bee ak'i'diitįįhii bee hólóonii bidááhgóó hódzą́ hólǫ́, nidi diné doo hóyáanii nahasdzáán nidahonees'ą́ąjį' déez'į́į́'.

²⁵Aye' doo hóyą́ą́góó naagháii bizhé'é bąąh bíni', áádóó bimá bijéí yineesgai.

²⁶Náá'áłdó' diné t'áá ákogi ádaat'éii atíjíł'íinii índa diné bídahólníihii t'áá ákogi át'éego deíkáahii biniinaa názníłts'ingo doo yá'át'éeh da.

²⁷Diné ił ééhózin bee hólǫ́ǫgo éí bizaad ááyoosįįł, áádóó diné ak'idi'yiitįįhii doo ádił nídiiltéeh da.

²⁸Azhą́ diné doo hóyáanii nidi, doo yáłti'góó hóyą́ągo baa nitsáhákees, doo yádíłtihgóó diné ak'i'diitą́ą́ lá bidi'niih.