Read Navajo PROVERBS 19 Bible Online

PROVERBS 19 - Navajo bible

PROVERBS 19

¹Diné nahagizgo yáłti'ii áádóó doo áhályáanii biláahgo diné baa hojoobá'ígo doo bina'adlo'góó naagháii agháago yá'át'ééh.

²Náá'áłdó' ił ééhózin bee ádinii doo yá'át'éeh da, áádóó tsxį́į́ł nízingo naagháii ádił ni'iilzííh.

³Diné bidoo áháyą' atiin ts'ábílóós, áko bijéí yee Bóhólníihii yik'íhá'áah łeh.

⁴At'į́ éí ak'is t'óó ahayóí á ádeile', nidi hahojoobá'íii éí hak'is doo haa nidantáa da.

⁵Diné t'áá ádzaagóó halne'ii éí ts'ídá atíbidi'doolnííł doo yaa dáádidoogáał da, áádóó hayooch'íidii éí doo yisdázhdínóochéeł da.

⁶Diné t'óó ahayóí éí bił hadlee'ii shich'odooniił danízingo łídeidilchí, áádóó diné t'áadoo le'é t'áá jíík'eh nijiniihígíí binahjį' diné t'ááłá'í nítínígo hak'is danilį́.

⁷Diné bahojoobá'íii yił háájéé' t'áá ałtso dabijoołxá, áádóó t'ah nááyówehígo hak'isóó danilíinii yóó'adahodeez'ą́. Ch'ééh bíni' bá áhojiléehgo t'óó hats'ą́ą́' dah diijah.

⁸Diné hódzą́ shójoost'e'ii t'áá hó hwii' sizíinii ayóó'ájó'ní; bee ak'i'diitįįhii t'áá jótą'ii yá'át'éehii shóizhdoołt'eeł.

⁹Diné t'áá ádzaagóó halne'ii éí ts'ídá atíbidi'doolnííł doo yaa dáádidoogáał da, áádóó hayooch'íidii éí áhodi'dooldįįł.

¹⁰Diné doo áhályáanii t'áá áłdįįh hoołt'éego hináanii doo beełt'ée da, áádóó naalte' éí naat'áanii yinant'áago tsík'eh doo beełt'ée da.

¹¹Diné hóyą́ągo nitsíkeesii doo hah báháchįįh da, áádóó doo ákǫ́ǫ́ ábi'dil'íinii doo yaa ná'áhodílt'ínígíí bee bił ídlį́.

¹²Aláahgo naat'áanii báháchįįhgo náshdóítsoh bitsiijį' ditł'ooígíí biyi' nahodi'ni'go ánínígíí nahalin, nidi yee ach'ooníinii éí dahtoo' ch'il bąąh haleehígíí nahalin.

¹³Aye' doo áhályáanii bizhé'é yide ánáhool'įįhgo atííł'į́, áádóó e'asdzą́ą́ saad hółóonii éí t'áá áłahjį' kin bighą́ą́'dę́ę́' wóne'jį' tó nahidilch'ą́łígíí nahalin.

¹⁴Kin índa at'į́ éí azhé'é danilíinii bits'ą́ą́dóó ee nidahwiileeh, nidi e'asdzą́ą́ hóyáanii éí Bóhólníihii bits'ą́ą́dóó ee nihwiileeh.

¹⁵Ił hóyéé' t'áá íiyisí hwi'iiłhosh, áádóó bił hóyée'ii dichin yik'ee ti'hoonííh.

¹⁶Diné éí bik'eh ó'oo'níiłii yik'eh hół'íinii éí bii' sizíinii yaa jé'ólná, nidi Diyin God bihonít'i' jidiláshígíí dazdootsaał.

¹⁷T'áá háiida bahojoobá'íii baa jijooba'ígíí éí Bóhólníihii t'áadoo le'é baa jiiníiłgo át'é, áádóó yá'át'éehii baa nijiyáhígíí bik'é Bóhólníihii hach'į' niná'doodlééł.

¹⁸Niye' t'ah t'áá bá chohoo'ínídą́ą́' nínáníłtsxis, nidi dadootsaał t'áadoo níníziní.

¹⁹Diné ayóó át'éego bánáháchįįhii yik'ee bich'į' nahwii'náa doo, áko bá k'ééhosíníłdǫǫdgo háadida bá k'énínáhodííłdǫǫł.

²⁰Náásínílį́į'di honíyą́ą doo biniyé kót'éego nidi'nínígíí yíísíníłts'ą́ą́' áádóó bínandi'niltinígíí náhidiilé.

²¹Diné bijéí biyi'di t'óó ahayóígóó naha'á, nidi Bóhólníihii kót'éego nínígíí éí bohoníłdzilgo ahool'á.

²²Diné jooba'ii éí diné dabinízin, áádóó diné biyooch'íidii biláahgo diné bahojoobá'íjígo yá'át'ééh.

²³Bóhólníihii jidósingo éí iiná yaa halóós, áádóó éí hwee hólǫ́ǫgo t'áadoo anáhóót'i'í jiináa doo, áádóó doo yá'ádaat'éehii doo hainít'į́į da doo.

²⁴Bił hóyée'ii t'óó bich'ááyah dées'nii'ii áza'dookááł nidi yídiiłgis.

²⁵Diné ánahałt'i'ii nídiiłts'in, áko diné doo hóyáanii hódzą́ yíhwiidooł'ááł, áádóó bee ak'i'diitįįh bee hólóonii bich'ahoshíníké, áko ił ééhózin yik'idi'dootį́į́ł.

²⁶Diné ła' hazhé'é t'áá na'níle'dii ájooł'įįłgo áádóó hamá yóó'azhnííłchą́ą'go éí aye' jílíinii hazhé'é áádóó hamá t'óó baa yáhásinígi ájiilaa áádóó biniinaa diné bá nidahałt'i' doo.

²⁷Shiye', bínda'niltinii doo yísíníłts'ą́ą́'góó saad bee ił ééhózinii yits'ándínóo'ah.

²⁸Diné t'áadoo yą́ą́h nilínígóó oo'į́ k'ehgo halne'ii éí t'áá ákogi ádaat'éii t'óó yánahałt'i', áádóó diné doo yá'áshóonii bąąhági át'éii ayiimaał.

²⁹Ándahałt'i'ii bee baa nídahódóot'įįłii bá hasht'edaalyaa, áádóó diné doo ádahalyáanii dabíígháándę́ę́' bee nídadínóoltsxisii hasht'edaalyaa.