Read Navajo PROVERBS 21 Bible Online

PROVERBS 21 - Navajo bible

PROVERBS 21

¹Bóhólníihii tooh nílį́ áyósinígíigi át'éego Bóhólníihii íinízinígíí bik'ehgo aláahgo naat'áanii bijéí nayiiłnáago hoo'áałgo áyósin.

²T'áá ałtso t'áá ákogi ásht'į́ danízingo diné deíkááh, nidi Bóhólníihii éí ajéí neiłkaah.

³Náá'jiiłniihígíí biláahgo t'áá ákogi át'éii áádóó doo haada yit'éégóó ájooníiłgo bee Bóhólníihii bił hojíshǫ́.

⁴Ádeijódlí joolnáa'ii áádóó ádaa dzódlíigo nitsíkeesii éí diné doo yá'áshóonii bee adinídíinii át'éego ádił ni'iidzíihii át'é.

⁵Haleebee naalnishii naalye'é bee áda'azįįdjį' bá dahodiit'i', nidi doo hodina' naalnishii tsxį́įłgo té'é'į́ yileeh.

⁶Wooch'ííd bee yódí shóozt'e'ii éí siil áádįįłii nahalin, áko éí ákót'éego hádajit'íinii aniné hádajit'į́.

⁷Diné doo yá'ádaashóonii yee atída'ał'íinii t'áá éí atínídabidoodlííł, háálá t'áá ákogi át'éego ádadooníłígíí ts'ídá doo deinízin da.

⁸Diné ádihodiilt'i'ii éí nahagiz bił honít'i'góó yigááł, nidi diné yá'át'éehii ááníiłii t'áá da'áko.

⁹Asdzání saad biiłhéii hótsaa góne' bił haghanjí doo yá'át'éeh da; kin bighą́ą'di bee nástł'ahdi t'áá sáhí haghanjí agháago yá'át'ééh.

¹⁰Diné doo yá'áshóonii bąąhági át'éii t'éí yinízin, áko doo jooba'góó yił kééhat'íinii baa ákonízin.

¹¹Ánahałt'i'ii atíbi'diilyaago diné doo hóyáanii éí hodooyąął, áádóó diné hóyáanii naneestą́ą'go ił ééhózin bee hodooleeł.

¹²Diné t'áá ákogi át'éii éí doo yá'ádajíshóonii hoł nahaz'ánígíí yaa nitsíkeesgo ádił nida'dziilzíhígíí biniinaa Diyin God áhoołdįįł, yó'ní.

¹³Badahojoobá'íii daachago bich'į' jé'áhozhdilkałii t'áá hó ałdó' jicha doo, nidi t'áadoo hodidoots'į́łí da.

¹⁴T'áá nahont'inee ha'alyéehgo bee doo háháchįįh da, áádóó aa neel'į́'ígíí át'ajoo'nilgo t'áá íiyisí áháchį' néidooshǫǫł.

¹⁵Doo haada yit'éii áál'įįhgo t'áá ákogi ádaat'éii bił dahózhǫ́, nidi doo yá'ádaashǫ́ǫ́góó ádaaníiłii nidabiiłchxǫǫh.

¹⁶Diné bee ak'i'diitįįhii yits'áníyáii éí diné daneeznáanii bitahgi hojílǫ́.

¹⁷Diné neeni bi ł ayóó áhoot'éii bahojoobá'í doo; diné éí wáin áádóó ak'ah bił ch'iyáán ádaal'íinii bił ayóó áhoot'éii doo ajit'į́į da doo.

¹⁸Diné doo yá'ádaashóonii éí diné t'áá ákogi ádaat'éii yá nályééh danilį́, áádóó diné nináda'dii'aahii éí diné t'áá ákogi ádaat'éii yá náályééh danilį́.

¹⁹Asdzání saad hal'į́įgo báháchį'ii bits'ą́ądi honoojíidi kééhojit'į́į́jígo agháago yá'át'ééh.

²⁰Diné hóyáanii kééhat'į́įgi yódí áádóó ak'ah da'ílíinii hólǫ́, nidi diné doo hóyáanii éí t'áá ałtso t'óó yee nidooneełgo íidoołdįįł.

²¹T'áá ákogi é'ét'éii índa aa a'ááh hwiindzin yik'ehgo yigáałii éí iiná áádóó t'áá ákogi é'ét'é índa ił ídlį́ yik'éghááh.

²²Diné hóyáanii éí diné dahayóii bikin haal'áhígíí yik'eh didleeh, áádóó bine' adziihii yaa dadzólíhígíí yits'ą́ą́' naa'ayiiłka'.

²³T'áá háiida t' áadoo ha'óotahí naagháii áádóó hazaad baa áhojilyáanii éí ach'į' nahwii'ná bits'ąą hwii' sizíinii baa áhojilyą́.

²⁴Diné ayóogo bee ádaa dzódli'ii éí diné ádaa ha'niihii áádóó ádaa dzódlíigo ánahałt'i'ii bee bi'dójí.

²⁵Bił hóyée'ii yinízinii biiłhééh, háálá bíla' yee doo t'áá k'ad deeshnish da.

²⁶Éí shá bíighah bee áchą́hwíídéeni'go adánoolní, nidi diné t'áá ákogi át'éii doo aa nichį'góó bił hadlee'.

²⁷Diné doo yá'áshóonii nááyiiłniihígíí doo yildin da; doo yá'áshǫ́ǫ́góó nitsíkeesgo náá'iiłniihgo t'ah nááyówehgo doo yildin da.

²⁸Diné biyooch'íidgo halne'ii dadootsaał, nidi diné íists'ą́ą'ii ak'eh hół'į́įgo as'ahgóó yáłti' doo.

²⁹Diné doo yá'áshóonii doo yisti' da noolningo í'diil'įįh, nidi diné t'áá ákogi át'éii yigááł dooleełgóó nayik'ítsíłkees.

³⁰Hódzą́ áádóó bee ak'i'diitįįhii índa na'nitin doo ła' Bóhólníihii yik'ijį' nilį́į da.

³¹Ałk'i iidoojah biniyé łį́į́' hasht'eel'įįh, nidi ak'eh hodeesdlį́į́' éí Bóhólníihii bí.