Read Navajo PROVERBS 24 Bible Online

PROVERBS 24 - Navajo bible

PROVERBS 24

¹Diné doo yá'ádaashóonii t'áadoo yiníłch'į́dí; bił nijildeeh laanaa t'áadoo níníziní.

²Háálá doo ats'ííd bijéí bii' dahólǫ́ǫgo yindaha'á, áádóó ádílááh yaa yádaałti'.

³Hódzą́ bee kin niit'ááh, áádóó bee ak'idi'yiitįįhii bee niłdzilgo niit'ááh.

⁴Éí bii' ahą́ą́h dahodí'nilgóó ił ééhózin bee jit'íinii da'ílíinii índa ts'ídá danizhóníii hadadilbį́į́h.

⁵Diné hóyáanii bidziil; t'áá aaníí, diné bił ééhózinii bidziil bá náás áániił.

⁶Háálá hódzą́ bee nandi'neestą́ą'go bíninil'ą́ągo dííbah, áádóó t'óó ahayóí kót'éego daaníinii hólǫ́ǫgi hasih haz'ą́.

⁷Doo áhályáanii éí hódzą́ yi'oh nitsíkos; dáń'dítį́įhgi doo yáłti' da doo.

⁸Doo yá'áshǫ' ádeeshnííł nízingo naha'áii éí bee ádíláhí bidi'níi doo.

⁹Doo áháyą́ bee nitsáhákees bąąhági át'éii át'é, áádóó diné ánahałt'i'ii éí diné doo bił nida'íłdįįh da.

¹⁰Bik'ee ti'hoo'níihii nik'iildogo nąąh nááháka'go ts'ídá doo nidziil da.

¹¹Dadínóonééłgóó dabi'déet'éeshii yisdáhínííł áádóó k'adę́ę nidabidi'tseedii t'ą́ą́' ádeínísin.

¹²Shoo, díí doo nihił bééhózin da lá, diníigo, Da' Diyin God éí diné bijéí haisíidiísh doo yaa nitsíkees da? Áádóó Diyin God éí nii' sizíinii yaa áhályáaniísh doo bił bééhózin da? Éí diné t'ááłá'í jinítínígo baa nidadziskaii bik'ehgo hach'į' ninádi'yoodlééł.

¹³Shiye', tsés'ná bitł'izh niyą́, háálá éí yá'át'ééh, áádóó tsés'ná bitł'izh bits'a' bąąhdę́ę́' tsés'ná bitł'izh nidahidilch'ą́łígíí éí niyą́; jó, éí nił łikan.

¹⁴Éigi át'éego nii' sizíinii bá hódzą́ nił bééhózin doo, hódzą́ bik'ííníyáago náás ná honít'i' doo, áádóó nił chohoo'íinii doo nahjį' kódoolníił da.

¹⁵Diné doo yá'áshóonii nílíinii, diné t'áá ákogi ádaaníiłgo kéédahat'ínígíí t'áadoo baa hínítíní; bighan t'áadoo bits'ą́ą́' nihíłchǫǫhí.

¹⁶Háálá diné t'áá ákogi át'éii tsosts'idi naa'iigoh, nidi t'áá bíighahdi nídii'nah, nidi diné doo yá'ádaashóonii bich'į' hodii'náahgo dahidigeeh.

¹⁷Ni'ana'í bide áhoodzaago t'áadoo baa nił nihoozhǫǫhí; bik'eh hodidleehgo nijéí t'áadoo baa bił hózhóní.

¹⁸Éí doodaléi' Bóhólníihii niidoołtsééł, áko doo bił hodííshǫǫł da áádóó t'óó báhádzidgo yee até'éł'íinii yits'ą́ąjį' kónéidoodlííł.

¹⁹Doo yá'át'ééh ádaaníiłii biniinaa t'áadoo bik'ee ádił náhodílchiłí, índa diné doo yá'ádaashóonii t'áadoo yiníł ch'į́dí.

²⁰Háálá diné doo yá'áshóonii doo náás bá honít'i' da doo, diné doo yá'áshóonii bibee hool'iní diltłi'ii dínóoltsis.

²¹Shiye', Bóhólníihii áádóó aláahgo naat'áanii díínísin; nahat'á łahgo ándayoodlíiłii t'áadoo béédiilwo'í.

²²Háálá t'áá hoo'neehee báhádzidgo áhooníiłii hak'iidoot'ih; éí t'áá áłah bits'ą́ą́dóó atídahodi'doolníłígíí háísh bił bééhózin?

²³Díí ałdó' diné dahóyáanii dabizaad. Diné ał'oh át'éego baa nízhdóot'įįłgo doo yá'át'éeh da.

²⁴Diné doo yá'áshóonii, T'áá ákogi ánít'é, yi łníinii éí diné dahódziih doo; diné t'áá kééhat'į́į́ nít'éé' t'óó haa'ih danízin doo.

²⁵Nidi diné doo yá'áshóonii deideeztehii bił dahózhǫ́ǫ doo, áádóó yá'át'éehii bee bik'idahozhdoodliił.

²⁶T'áá ákogi át'éego hááhádziihii éí adaa' deizts'ǫs nahalin.

²⁷Dá'ák'ehdi ninaanish dooleełii t'áá áłdįįłt'éego hasht'edíílííł, áko índída kin nidíí'ááł.

²⁸Bił kééhót'íinii t'áadoo át'éégóó doo baa ch'íhodíí'áał da, índa doo niyooch'íídgóó baa hodíílnih da.

²⁹Áshijiilaaígi át'éego shí ałdó' t'áá ákóhodeeshłííł; ájíít' įįdii t'áá éí bik'ehgo k'ééhodideeshdlííł, doo didííniił da.

³⁰Bił hóyée'ii bidá'ák'eh áádóó diné doo ak'i'dootą́ą́ át'éii bich'il na'atł'o'ii yíl'áago bíighahgóó ch'íníyá.

³¹Áko, shoo, bidá'ák'ehgóó t'áá át'é hosh t'éí yíl'á, áádóó ch'il deeníní t'áá át' é bił yíl'á, índa tsé binaagóó ahénátł'inii naa'ahineezkaad lá.

³²Áko éí yiiłtsą́ągo baa nitsísékééz, áádóó nééł'į́į'go nashineeztą́ą́'.

³³T'óó kónígháníjį' náá'iideeshhosh; t'óó kónígháníjį' ánáádínéeshyił; t'óó kónígháníjį' shijaat'ah díníshnii'go adínéeshyił.

³⁴Ákónít'į́įgo agha'ii'níiłii nahalingo té'é'į́ nik'i hwiidooleeł, áádóó té'é'į́ éí diné bee na'abaahii neijaahgo haatįįh yíyá nahalin doo.