Read Navajo PROVERBS 26 Bible Online

PROVERBS 26 - Navajo bible

PROVERBS 26

¹Shį́įgo yidzasgo doo beełt'ée daígi át'éego áádóó da'agizhgo nahałtingo doo beełt'ée daígi át'éego diné doo áhályáanii hoł danilį́į dooleełígíí ałdó' doo beełt'ée da.

²Tsídiiłbáhí naanáát'ahgo doo nidaahígíí áádóó táshchozhii yit'ahgo doo nidaahígíí nahalingo t'áadoo biniyéhígóó hóyée'go áha'oodzí'ígíí doo ak'i hwiidooleeł da.

³Łį́į́' bá bee atsxis hólǫ́, télii bá azáát'i'í hólǫ́ áádóó diné doo áhályáanii bíígháándę́ę́' bee nídínóolghałii hólǫ́.

⁴Diné doo áhályáanii doo bił ahiníłt'ée da dooleeł biniyé bidoo hóshkał bik'ehgo doo bich'į' háádíídzih da.

⁵Diné doo áhályáanii honisą́ doo nízin da doo biniyé bidoo hóshkał yee hahadziihígíí bik'ehgo bich'į' t'ą́ą́' hááhídziih.

⁶T'áá háiida diné doo áhályáanii hane' há ayíí'ą́ągo éí hakee' t'áá áłah k'ízhnígizh áádóó atíhodoolíiłii jidlą́ nahalin.

⁷Diné doo ádahalyáanii hane' bee ak'idi'dootį́įłii yaa dahalnihgo éí naaljį́į́d nilíinii bijáád t'óó nahíínilígíí nahalin.

⁸Diné doo áhályáanii hoł yílįįdii éí tsé bee aditł'į́į́h bídziistł'ónígíí nahalin.

⁹Diné doo ádahalyáanii hane' bee ak'idi'dootį́įłii yaa dahalne'ii éí adláanii bíla' hosh baa ííjilígíí nahalin.

¹⁰Adiłt'ohii éí t'áá ałtso tídeidile'ígi át'éego t'áá háiida éí doo áhályáanii, doodaii' t'óó bíighah dahidikáhígíí naanish yeidiyii'aahígíí nahojílin.

¹¹Łééchąą'í bikwi néídį́hígi át'éego doo áhályáanii bidoo hóshkał yaa náánáádáał łeh.

¹²Diné ła' honisą́ nízingo ádaa nitsíkeesígíísh yíní'į́? Hó haláahgo doo áhályáanii bá chohoo'į́.

¹³Bił hóyée'ii ání, Aají atiinjí náshdóítsoh bitsiijį' ditł'ooígíí léi' yigááł; kintah da'nítiingóó náshdóítsoh bitsiijį' ditł'ooígíí léi' naaghá.

¹⁴Dáádílkał ąą ánát'įįh áádóó dáń'dílkał t'áá éigi át'éego bił hóyée'ii bitsásk'eh yikáá' naanáhoojish.

¹⁵Bił hóyée'ii t'óó bich'ááyah dées'nii'ii áza'dookááł, nidi ch'ééh ííł'į́.

¹⁶Diné tsosts'id jilt'éego dahojíyą́ągo hadadziisdzí'ígíí éí dahaláahgo bił hóyée'ii t'áá bí yaa nitsíkeesígíí yaa hóyą́.

¹⁷Diné ahinídiiltłahii doo hódéét'i'góó t'óó bíighah ch'íjígháahii áajį' ajoolwodgo éí łééchąą'í bijaa' t'áá ałch'ijí jisiłígi ádziidzaa.

¹⁸Diné diigis silį́į'ii honooyééł áádóó k'aa' índa bee na'atseedí ayiighaas;

¹⁹t'áá ákót'éego ałdó' yił kééhat'íinii yina'alo'ii íididooniił, T'óóyee' nidlodishchíigo ásht'į́.

²⁰Chizh ádingi kǫ' ádįįh; t'áá ákót'éego diné doo ałjeeh nídanilniihgi ahináá'diiltłi' ádįįh.

²¹Tsííd éí t'eesh yidiiłtłi'ígi át'éego áádóó kǫ' bee chizh diiltłi'ígi át'éego diné saad biiłhéii ahinídiiltłáád hayiiłt'ééh.

²²Aseezį́ nidzinii bizaad ayóo łikan, áádóó ayi' góyaa ahwiileeh.

²³Diné nizhónígo yáłti'ii nidi bijéí biyi'dę́ę́' t'óó baa'ihgo nitsíkeesii éí béésh łigaii bąąh hahinilgháshígíí bee hashtł'ish łeets'aa' yishdléezhgo ályaii nahojílin.

²⁴Bizaad łikanii ak'e'diniih neinił'in, áádóó na'adlo' ádii' yinées'į́į́'.

²⁵Éí nizhónígo yáłti'go t'áadoo yinídlání, háálá bijéí bii' doo yildinii hadeezbin.

²⁶Éí ak'eezhdiniihígíí hayooch'ííd bee nazhnił'in, nidi diné áłah nilį́įgi hadoo yá'áshǫ' hats'ą́ą́' baa hodoonih.

²⁷T'áá háiida łeeh hojíígeedgo t'áá hóda ákóyaa anízhdootłish, áádóó tsé nidzismáazii hak'i néidoolts'ił.

²⁸Biyooch'íidii tídeidííłnii'ígíí yik'ee diniih, áádóó t'óó áníigo aa haniihgo ni'iiłchxǫǫh.