Read Navajo PROVERBS 27 Bible Online

PROVERBS 27 - Navajo bible

PROVERBS 27

¹Yiską́ągo kót'ée dooleeł, diníigo nahó'áago t'áadoo bee ádaa hó'niihí, háálá yiską́ągo ádahodooníłígíí doo nił bééhózin da.

²Ni éí t'áadoo ádaa hó'niihí, nidi náánáła' naa haniih le'; t'áá ni éí dooda, nidi ayóní nilíinii éí t'áá áko.

³Tsé éí nidaaz áádóó séí ałdó' nidaaz, nidi doo áhályáanii áháłchįįhígíí éí tsé áádóó séí biláahgo áníłdáás.

⁴T'áá íiyisí áháchį' éí doo ats'ííd át'é; áháchį' éí t'áá biláahgo k'ee'ąą dzoołhał, nidi háísh éí łe'hasin yíníłdzil doo?

⁵Ayóó'ó'ó'ní nanil'inii biláahgo aditeh yit'íní óolzinjí agháago yá'át'ééh.

⁶Hak'is adahodiłnih nidi éí ba'ahódlí, nidi hwe'ana'í náhoots'ǫsgo éí na'adlo' ádaat'é.

⁷Diné hwiih silį́į'ii éí tsés'ná bitł'izh doo yinádízįįh da, nidi diné dichin nilíinii éí dadích'íi'ii t'áá ałtso bił łikan.

⁸Diné kééhat'į́į́dóó dah diiyáhígíí éí tsídii bit'oh yik'i sidáhídóó dah diit'a'ígíí nahalin.

⁹Ak'ah áádóó łikání dahalchinii ajéí yił nihooshǫǫh; diné bik'is nizhónígo kót'é bidííniidii ałdó' t'áá ákót'é.

¹⁰T'áá ni nik'is índa nizhé'é bik'is yóó'adóó'ááł lágo; báhádzidgo nich'į' áhooníiłgo bił háíní'áázh bił yah óoya' lágo. Bił háíní'áázh doo deeghánídi kééhat'ínígíí bilááh át'éego bił kééhót'íinii béíníyáájí yá'át'ééh.

¹¹Shiye', honíyą́ áádóó shijéí bił hózhǫ́ǫgo ánílééh, áko t'óó baa yáhásinígi át'éego shá nahałt'i'ígíí bich'į' hááhásdziih doo.

¹²Diné hóyáanii éí doo yá'áshóonii yiyiiłtséehgo yits'ąą nídít'į́į́h, nidi doo hóyą́ą́góó naagháii éí yich'į' t'áá háoghááh, áádóó yik'ee ti'hoonih.

¹³Dé'éyóní bá sézį́į dooleeł, níigo naaltsoos bikáá' bízhi' áyiilaii ííshją́ą́ bi'éétsoh nídidííłtsos, áádóó ałjiłnii bá ákójít'į́įgo bee nihozhní'ánígíí binahjį' hwíínítą' doo.

¹⁴T'óó haiłkááhdą́ą́' diné náádii'nahii ayóó íits'a'go bik'is yik'ijidlíigo yich'į' yáłti'ii éí t'óó báhádzidgo yá haadzíi'go át'é.

¹⁵Nahałtingo t'áá áłahjį' hóne'jį' tó nahidilch'ą́łígíí éí asdzání saad biiłhéii bił t'áá aheełt'é.

¹⁶Áko éí asdzání doo saad biiłhéégóó ádzósingo bízhneel'áanii doo níyolgóó ádzósingo ałdó' bízhneel'ą́ą doo, áádóó nish'náájí hála' bee ak'ah tó nahalinígíí dziiłtsoodgo hálágiizhdę́ę́' doo hadadeesxį́į́góó ádzósingo bízhneel'ą́ą doo.

¹⁷Béésh éí náánáła' béésh deeníigo áyiił'įįhígi át'éego diné ałdó' bik'is hazhó'ógo nitsíkeesgo áyiił'įįh.

¹⁸T'áá háiida fig sikaadii yaa áhályáanii éí yąąhdóó adooyį́į́ł áádóó diné binanit'a'í yaa áhályáanii bił ídlį́į doo.

¹⁹Tó siką́ągo bii'jį' ádizhníl'įįhgo t'áá hó ázdiiltséhígi át'éego hak'is hajéí át'éegi yee hwééhósin doo.

²⁰Hool'áágóó ti'hoo'nííh áádóó até'él'į́ ts'ídá doo hwiih yileeh daígi át'éego diné bináá' yee dayiiłtse'ii ts'ídá doo hwiih daaleeh da.

²¹Ásaa' bii' béésh łigaii bąąh hadilyį́hí béésh łigaii bá át'é, áádóó déédíljah bii' góne' óola dilyį́hí óola bá át'éhígi át'éego diné t'áá ha'át'íí shį́į́ bee haa ha'niihígíí bee bééhózin.

²²Azhą́ diné doo áhályáanii tsé daashjéé' bikáa'gi tł'oh naadą́ą́' bił tsé daashch'íní bee yíník'ą́ą nidi, bidoo áháyą' doo bits'áhodooleeł da.

²³Nidibé dah danéelkaadígíí t'áá íiyisí nił bééhózin, áádóó nilį́į́' nidanilkaadígíí hazhó'ó bitaa nighalgo hanisííd,

²⁴háálá jit'íinii doo hool'áágóó hólǫ́ǫ da áádóó t'ááłá'í jinít'i'ii ahijoolchííłgóó naat'á ch'ah doo hatah yilts'ił da doo.

²⁵Tł'oh nááháashjoolii áádóó bikéédę́ę́' tł'oh náánéitsoh índa dziłdę́ę́' nanise' bąąh da'adáanii áłah ádaalyaago yah adahaasgį́.

²⁶Dibé yázhí bee nik'i adilkǫǫhii át'é, áádóó tł'ízí bą́ą́h ílínígíí éí kéyah bik'é nehelyé.

²⁷Áko ni lá, na'áłchíní lá índa ch'ikéí ná nidaal'a'í bił tł'ízí bibe' nihíneel'ą́ą doo.