Read Navajo PROVERBS 28 Bible Online

PROVERBS 28 - Navajo bible

PROVERBS 28

¹Diné doo yá'ádaashóonii doo ła' binoołchéeł da nidi dadíníchééh, nidi diné t'áá ákogi át'éii éí náshdóítsoh bitsiijį' ditł'ooígíí doo yist'i'ii át'é.

²Kéyahgi dine'é éí bee haz'áanii nidayiitíihgo binanit'a'í t'óó ahayóí yileeh łeh, nidi naat'áanii bee ak'i'diitįįhii áádóó ił ééhózin bee hólóonii bik'ehgo diné t'áá kééhat'ínígi át'éego yá'át'éehgo náás yildah doo.

³Diné bahojoobá'íii éí diné doo dabidziilii yide áhósinii éí t'óó báhádzidígi át'éego nahóółtą́ągo dá'ák'ehgóó ch'iyáán íísdįįdígíí nahalin.

⁴Diyin God bibee haz'áanii yóó'adeidii'aahii éí diné doo yá'ádaashóonii yaa dahaniih, nidi Diyin God bibee haz'áanii yik'eh dahół'íinii hoł ahaa naakai.

⁵Diné doo yá'ádaashóonii éí doo haada yit'éii doo yik'ida'diitįįh da, nidi Bóhólníihii há daat'íinii éí t'áá ałtsoní yik'idadi'yiitįįh.

⁶Azhą́ diné ajit'į́į nidi, bąąhági át'éii bii' joogáałgo éí ní'jíí'oh; diné bahojoobá'ígo t'áá ákogi át'éego yigááłjí éí agháago yá'át'ééh.

⁷T'áá háiida Diyin God bibee haz'áanii bik'eh hojíł'íinii éí aye' hóyáanii jílį́, nidi diné ła' diné dadibidii béézhdiilwo'go bił nijikaii éí hazhé'é haa yánízin.

⁸Diné ła' naalye'é bik'é nahalyéii t'áá biláahgo hach'į' nahalyéego há bilááh silį́į́', nidi áłah ájiilaii náánáła' diné éí badahojoobá'íii yitaidoonihii bá át'é.

⁹Diné ła' Diyin God yee has'áanii doo dzididoots'į́į́łgóó bits'ą́ąjį' ájít'éego hasodizinígíí nidi doo yildin da doo.

¹⁰Diné ła' t'áá ákogi át'éii bąąhági ááníił doo biniyé yóó'azhníí'aa'go éí t'áá hó hwe'a'áán góyaa azhdootłish, nidi diné t'áá ałtsojį' t'áá ákogi ááníiłii éí yá'át'éehii shóidoołt'eeł.

¹¹Diné at'íinii honisą́ nízingo nitsíkees, nidi diné bahojoobá'íii ak'idi'yiitįįhgo diné at'íinii neiłkaahgo ájít'éhígíí bił bééhózin.

¹²Diné t'áá ákogi ádaaníiłii bídahólníihgo ayóó át'éego baa hózhǫ́ǫ łeh, nidi diné doo yá'ádaashóonii bídahólnííh yileehgo diné nida'ádinil'in haleeh.

¹³T'áá háiida bee haz'áanii k'íiníti'ii yik'i hooziidii doo náás doogáał da, nidi t'áá háiida bee haz'áanii k'ízhníti'ii bee ádaa hojoolne'ii áádóó yóó'azhdíí'áanii Diyin God bibee aa a'ááh hasinii shóizhdoołt'eeł.

¹⁴Diné adoosih t'áá áłahjį' yaa yisti'ii éí bił hózhǫ́, nidi diné bijéí yiłtł'isii éí ach'į' nahwii'ná yiih yitłish.

¹⁵Náshdóítsoh bitsiijį' ditł'ooígíí ánínígi át'éego áádóó shash anoołchéłígi át'éego naat'áanii doo yá'áshóonii éí t'áadoo yee ák'idadóldziłígíí yinant'áa łeh.

¹⁶Naat'áanii ak'i'diitįįh bee ádinii ayóó át'éego ałdó' ade áhósin, nidi adáhonooní yik'ee diniihii éí as'ahgóó naat'áanii nilį́į doo.

¹⁷Diné ła' diné dziisxį́įgo bidił bee ádihozhdiilt'i'ii hojishcháá' dooleełjį' azhdínóochééł; t'ááká diné ła' t'ą́ą́' kónáhódle' lágo.

¹⁸T'áá háiida t'áá ákóne' ájít'į́įgo joogáałii yisdáhodi'dooltééł, nidi diné t'óó áhodil'į́įgo yigáałii t'áá hooshch'į' azhdootłish.

¹⁹Hadá'ák'ehgóó nináhojiiłdla'ii éí ch'iyáán t'óó ahayóí hwee hólǫ́ǫ doo, nidi t'áadoo yaa nidaokaaígóó dahináanii béézhdiilwo'ii éí té'é'į́ hade ádoonííł.

²⁰Diné ba'ahódlíii éí bee bik'ihojidlíii t'óó ahayói doo, nidi diné adoot'įįłígíí yaa tsxį́į́ł niizį́į'ii éí t'áá atíbidi'doolníłí.

²¹Diné ał'oh át'éego baa nitsídzíkeesgo éí doo yá'át'éeh da, háálá diné éí bááh bizéí shóidoołt'eełígíí yiniinaa bee haz'áanii k'íidootih.

²²Diné doo ákwáálnáa'ii éí tsxį́įłgo adeesht'įįł nízin, nidi té'é'į́ bik'i hwiidooleełígíí doo bił bééhózin da.

²³Diné ła' diné jideeztehdóó bik'ijį' diné náánáła' t'óó áníigo aa haniihii biláahgo bił ałch'ozhdoo'neeł.

²⁴T'áá háiida bizhé'é, doodaii' bimáda yee ani'įįhgo, Díí éí bee haz'áanii doo hitíihii át'ée da, jiníigo ni'iiłchǫǫhii bik'is jílį́.

²⁵Diné ádaa dzódlíii éí diné ahinéidiiłtłi', nidi diné éí Bóhólníihii yaa dzólíii éí baa dzólníigo ábidi'doolnííł.

²⁶Diné t'áá hó hajéí baijólíii éí doo áhojilyą́ą da, nidi t'áá háiida hóyą́ągo hináanii éí yisdádooltééł.

²⁷Diné badahojoobá'íii baa jijooba'ii doo hwee áhádin da doo, nidi diné badahojoobá'íii doo t'áá k'ad dazhnééł'į́į'ii éí t'óó ahayóí bee hóyée'go há hadi'yoodzih.

²⁸Diné doo yá'ádaashóonii bídahólnííh yileehgo diné nídadit'į́į́h, nidi daninéehgo diné t'áá ákogi ádaat'éii náás dikah.