Read Navajo PROVERBS 29 Bible Online

PROVERBS 29 - Navajo bible

PROVERBS 29

¹Diné ła' t'áá ahą́ą́h hach'anáhodishkeehgo áádóó t'óó tsé'édinda doo adzíists'ą́ą' da dzizlį́į'go t'áadoo hooyání atíhodi'doolnííł, áko éí t'áadoo bidééłníní da.

²Diné t'áá ákogi ádaat'éii náás dikahgo diné baa bił nidahoozhǫǫh doo, nidi diné doo yá'áshóonii bóhólníihgo éí diné yínííł danilį́į łeh.

³T'áá háiida hódzą́ ayóó'ájó'níinii éí hazhé'é bił hojíshǫ́, nidi diné éí ałjiłnii bił ahéézhdiilwo'ii hanaalye'é t'óó bee nijiné.

⁴Aláahgo naat'áanii t'áá ákogi ááníłígíí bee diné kéyah yikáá'góó kééhat'ínígíí hasht'e'niijih, nidi naat'áanii éí bee naho'diiniihii yókeedii éí t'óó hoł tani'doogish.

⁵Bił kééhojit'íinii bich'į' ájíníigo baa hojiniihgo éí łoh ádá ninájít'ááh.

⁶Diné doo yá'áshóonii bee haz'áanii k'íiníti'go łoh yiih yighááh, nidi diné t'áá ákogi át'éii hataałgo bił nihoozhǫǫh łeh.

⁷Diné t'áá ákogi át'éii éí badahojoobá'íii bee bá nahaz'áanii yee yaa nitsíkees, nidi diné doo yá'áshóonii doo t'áá k'ad bił bééhoozin da.

⁸Diné ándahałt'i'ii éí kin haal'áagi kéédahat'íinii yá nídahałchįįhgo áyiił'įįh, nidi diné dahóyáanii éí áháchį' nahjį' kódeile'.

⁹Diné hóyáanii éí diné doo áhályáanii yił ałghadit'áahgo doo áhályáanii báháchį'go, doodaii' anádlohgoda ałghadit'áhígíí doo niit'éeh da.

¹⁰Diné nideiłtseedgo dił ats'ádaazlį́įgo ádeile'ii éí diné ba'át'e' ádinii yik'ee dadiniih, nidi diné t'áá ákogi ádaat'éii éí diné ba'át'e' ádinii yá atídaat'į́.

¹¹Diné doo áhályáanii t'áá bánáháchįįh bik'eh t'áá ákǫ́ǫ́ t'áá ałtso yaa halne', nidi diné hóyáanii éí t'óó yił déesxéél.

¹²Naat'áanii nilíinii wooch'ííd yiyíists'ą́ą'go diné bá nidaal'a'ígíí t'áá ałtso doo yá'ádaashǫ́ǫ da daaleeh.

¹³Diné bahojoobá'íii áádóó diné ade áhósinii díí yee ahéédiit'ash: éí t'áá ájíłah Bóhólníihii hoł ch'í'diiłdlaad.

¹⁴Aláahgo naat'áanii ba'ahódlíigo diné badahojoobá'íii yá nihodiyii'aahgo hool'áágóó bohoníłdzilgo nant'áago ádoolnííł.

¹⁵Náhodi'nilghałgo áádóó nahodi'ditehgo bee hojiyąąh, nidi áłchíní doo baa hwiinít'į́į́góó t'áá bí nízinígi ááníi łgo bimá baa yánízin łeh.

¹⁶Diné doo yá'ádaashóonii łą́ yileełgo bee haz'áanii hitíihii ałdó' k'ee'ąą dilzhish, nidi hak'eh dahodeesdlį́į'go diné t'áá ákogi ádaat'éii dahoníł'į́į doo.

¹⁷Niye' hasht'e'nináhídlóós, áko bee háánílyį́įh doo, t'áá aaníí nii' sizíinii bił hózhǫ́ǫgo íidoolííł.

¹⁸Bik'ehgo dooleełii ádingo diné t'áá áhoodzaagóó dildah, nidi Diyin God yee has'áanii bik'eh hojíł'íinii éí hoł hózhǫ́.

¹⁹Naal'a'í éí doo saad t'éiyá bee hasht'e'ninádoodlóos da; azhą́ ak'idi'yiitįįh nidi, doo kót'é níi da.

²⁰Diné t'áadoo nitsíhodeeskézí hahadziihiísh bééhonísin? Jó, diné doo áhályáanii haláahgo bá chohoo'į́.

²¹Diné há naal'a'í t'áá áłchíní nilį́į́dą́ą́' baa jé'jólnáago neeyą́ągo haye' ídidoolnííł.

²²Diné bánáháchįįhii diné ahinéidiiłjah łeh, áádóó diné hashké nídzinii bee haz'áanii hitíihii bii' hadeezbin.

²³Diné bibee ádaa hodzódli' akéédę́ę́' nibidoołt'eeł, nidi diné a'ohgo ádaa nitsíkeesii diné bił jílį́į doo.

²⁴T'áá háiida ani'įįhii bił ałch'ojí'níinii éí hwii' sizíinii bik'eezhdiniih; ádee ha'didziih yidiits'a', nidi t'áadoo haadzíi' da.

²⁵Diné bił yée'ii éí yee łoh ádá nii'ááh, nidi diné éí Bóhólníihii yaa dzólíii bá hasih haz'ą́ą doo.

²⁶T'óó ahojíyóí éí naat'áanii shich'ijí astą́ą doo daznízin, nidi diné t'áá ałtso doo haada yit'éégóó bá nihodiit'aahígíí éí Bóhólníihii bits'ą́ą́dę́ę́' nihwiileeh.

²⁷Diné doo ákwii át'éii éí diné t'áá ákogi ádaat'éii doo dabíłdin da, áádóó diné k'éhézdongo yigáłígíí éí diné doo yá'ádaashóonii doo dabíłdin da.