Read Navajo PROVERBS 30 Bible Online

PROVERBS 30 - Navajo bible

PROVERBS 30

¹Jéíkeh biye' Éíger saad bee hódzáanii: Éí Íthiyel áádóó Yúkal yee yich'į' haadzíi'ii:

²T'áá aaníí diné biláahgo doo ak'idi'yiitįįhígi ánísht'é, áádóó diné ak'i'dadi'yiitįįhígi át'éego doo ak'i'diishtįįh da.

³Hódzą́ t'áadoo bóhooł'ą́ą' da; t'ááłá'í Diyin God nilíinii át'éegi doo bééhasin da.

⁴Háísh yá'ąąsh góde naayá áádóó áádę́ę́' hadanáádzá? Háísh níyol áłah áyiilaago yiyiiłtsood? Háísh éé' biyi' góne' tó áłah áyiilaa? Háísh nidahonees'ą́ąjį' nahasdzáán niłdzilgo áyiilaa? Nił bééhózingoshą' haa wolyé? Áádóó biye'shą' haa wolyé?

⁵Diyin God bizaad t'ááłá'í ní'ánígo danéél'į́į'go yá'ádaat'éehgo bééhoozin; baa dadzólíii éí yá naagé nilį́.

⁶Doo nididooteh da áádóó doo niyooch'ííd dííleełígíí biniyé bizaad t'áadoo bíhiiníłí.

⁷Bóhólníihii nílíinii, t'ah doo daastsaahgóó naakigo haz'ą́ nííníshkeed; éí shaa díínił:

⁸T'áá ádzaagóó hane' áádóó wooch'ííd nízaadgóó shits'ádiní'aah; té'é'į́ áádóó jit'íinii shaa dóó'ááł lágo; t'áá ákónéehee ch'iyáán danilíinii shiyísą́.

⁹Éí doodaléi' hwiih nishłį́įgo doo shídíínít'i'góó ándeeshłíiłgo ádideeshniił, Háísh éí Bóhólníihii nilį́? Éí doodaii' shahojoobá'ígo adínéesh'į́įłgo shiDiyin God bízhi' doo ílį́į́góó ádeeshłííł.

¹⁰Doo nidí'dóodzihígíí biniyé áádóó doo ádihodinilt'i'góó nééhodoozįįłígíí biniyé naal'a'í binanit'a'í doo t'áá ádzaagóó bił hólne' da dooleeł.

¹¹Ła' ahijoolchííł éí hazhé'é dadzódziih áádóó dahamá doo bik'ideijidlíi da.

¹²Ła' ahijoolchííł t'áá hó ádaa nitsídadzikeesgo yá'ádaniit'ééh daznízin, áko t'óó baa'ihii hwii' dahólóonii t'áadoo hąąh táádaasgiz da.

¹³Ła' ahijoolchííł dooládó' hwee áshodahódli'go dah dazhnéet'aahgo háhgóó shį́į́ nidajighal.

¹⁴Ła' ahijoolchííł éí bide ádahólzinii nahasdzáán bikáá'góó kéédahat'íinii áádóó diné bitahgóó t'áadoo le'é bee ádaadingo kéédahat'íinii deildeeł dooleeł biniyé dabiwoo' diltłish nidahalin, áádóó dabiwoo'ígíí éí béésh deeníinii nidahalin.

¹⁵Ch'osh éí dił hadayiits'ǫǫsii biyázhí naaki, Ła' nááná, ła' nááná, níigo yicha łeh. Táa'go, t'áá aaníí, díí dį́į'go haz'ą́: T'ah doo hwiih yishłeeh da, ní.

¹⁶Jishcháá' lá, áádóó doo achíii, áádóó kédaayah tó bąąh áńdaadįįhii, índa kǫ' éí ání, Ts'ídá t'ah doo hwiih yishłeeh da.

¹⁷Diné bizhé'é t'óó yánahałt'i'ii, áádóó bimá doo yik'eh hół'į́į́góó t'óó yi'íinii, éí gáagii hanáá' hadeidiyoonił, áádóó atsáyáázh hanáá' deidooldił.

¹⁸Táa'go, t'áá aaníí, díí dį́į'go haz'ą́, éí shił ayóó ádanóolnin, nidi ádaat'éegi doo bik'ida'diishtįįh da:

¹⁹Wót'áahdi atsá naat'a'ígíí, áádóó tsé'éłkáá'góó tł'iish naa'na'ígíí, áádóó tónteel bikáá'góó na'a'eełígíí, áádóó diné éí ch'ikę́ę́h yił ahiniidzįįhígíí.

²⁰Asdzání adiléii éí ayį́į́h áádóó bizábąąh yé'éł jołgo ániih, Doo ádił asésiih da.

²¹Táa'go, t'áá aaníí, díí dį́į'go haz'ánígíí bik'ee nihokáá' dine'é bił daayée'go doo yídaníłdzil da:

²²Naalte' naat'áanii yileehii, áádóó diné doo áhályáanii ch'iyáán ádił haidilbį́įhii,

²³áádóó asdzání doo nidzinii bahastiin haleehii, índa asdzání naal'a'í asdzání yá naalnishii yitsásk'ehjį' iigháahii.

²⁴Dį́į'go haz'ánígíí éí nahasdzáán bikáa'gi ádaałts'íísí yee', nidi ts'ídá doo chohoo'į́į́góó dahóyą́:

²⁵Wóláchíí' éí doo dabidziil da, nidi shį́įgo ch'iyáán áłah áńdayiil'įįh.

²⁶Dlǫ́'ii nahalinígíí éí doo dahayói da, nidi tsék'izgóó bighan ádahale'.

²⁷Nahachagiitsoh éí aláahgo naat'áanii bee ádin, nidi t'áá át'é t'áá ła' yinéeł łeh.

²⁸Na'ashjé'ii éí hála' bee bił jididił, nidi aláahgo naat'áanii bighan yiih yighááh.

²⁹Táa'go, t'áá aaníí, díí dį́į'go haz'ą́ éí ayóó ádanoolningo ahikááh:

³⁰Náshdóítsoh bitsiijį' ditł'ooígíí, éí naaldlooshii bitahdóó aláahgo ábóodziilii áádóó ha'át'íhída doo yik'ee dah diilyeedii,

³¹łééchąą'í łigaii lá, tł'ízíchǫǫh lá, índa aláahgo naat'áanii éí diné ił nilį́įgo yigáałii.

³²Doo honíyą́ą́góó alą́ąjį' ni'ádííníltį́įgo áádóó doo yá'áshǫ́ǫ́góó tsídííníkéezgo nizéé' dáádidíílnih.

³³Háálá abe' bikáá' nilk'įhígíí tózis bii' naaldzidgo mandagíiya yileeh, áádóó ła' háchį́į́h néígisgo hané'ádił yiiltał; t'áá ákót'éego diné hashké diniidzįįhgo diné yił ahinídiiltłi'.