Read Navajo PROVERBS 31 Bible Online

PROVERBS 31 - Navajo bible

PROVERBS 31

¹Aláahgo naat'áanii Lémyu'el bimá saad bee hódzáanii yee nabineeztą́ą'ii:

²Ha'át'íí lá shiyáázh? Nishíłchíinii nílíinii, ha'át'íí lá? Ádee hadeesdzíí'dóó bik'ijį' nishíłchį́įgo, shiyáázh nílíinii, ha'át'íísh bee nandínéeshtįįł?

³Asdzání danilíinii nidziil baa dóó'ááł lágo índa aláahgo naat'áanii nidabiiłchǫǫhii t'áadoo baa nanináago hinínání.

⁴Lémyu'el yinílyéii, aláahgo naat'áanii danilíinii wáin deidlánígíí doo bá át'ée da; t'áá aaníí, doo bá át'ée da, índa naat'áanii danilíinii tó diłhił deidlánígíí doo bá át'ée da.

⁵Éí doodaléi' da'doodlį́į́ł áádóó Diyin God yee has'áanii yaa deidiyoonah índa atídabi'dil'íinii doo ákót'éégóó yaa nídadóot'įįł.

⁶Bi'niitsáanii tó diłhił bidádidííkááł, áádóó ts'ídá yéego bich'į' nidahwii'náanii wáin baa dííkááł.

⁷Bíni'dii adlą́, áádóó té'é'į́ bi'niiłhíinii yeidiyoonah, áádóó bich'į' nahwii'náanii ts'ídá doo yénínáádoolnih da.

⁸Ádabi'niidįįdgo doo ák'idadóóldzííł ádaat'éii t'áá ałtso bá yáníłti' dooleeł.

⁹Bide ádahólzinii índa hojooba' nahas'áanii bá na'ak'íyáníłti'go t'áá ákogi át'éego bá baa nánít'į́.

¹⁰Háísh asdzání ílíinii yik'ídoogááł? Jó, asdzání ílíinii éí nitł'iz ał taas'éí da'ílíinii biláahgo ílíinii óolyé.

¹¹Bahastiin bijéí t'áá át'é yee t'áádóo nídí baa dzólí, áko bá bilááh násdlį́į'ii doo ła' bi'oh da doo.

¹²Ni'níłdįįd bijį́įjį' bahastiin yaa jooba', áádóó yich'į' doo ákǫ́ǫ́ ááníił da dooleełígíí éí dooda.

¹³Aghaa' áádóó nidik'ą' dits'idígíí hát'į́, áádóó yíneedlį́įgo binaanish áyósin.

¹⁴Tsinaa'eeł bee naalyéhé tsé'naa nídadigéhígíí nahalingo doo deeghánídę́ę́' ch'iyáán nináyiijááh.

¹⁵Yikáíhdą́ą́' t'ah ni' halzhingo náádii'nah áádóó ba'áłchíní yá ch'iyáán ánáyiil'įįh índa asdzání bá nidaal'a'í naanish yitaa néidi'aah.

¹⁶Kéyah yaa nitsízkéezgo nayiisnii' áádóó t'áá bí ákǫ́ǫ́ ch'il na'atł'o'ii k'iidíílá.

¹⁷Biníí' gónaa bidziilgo áyiił'įįh, áádóó bigaan ałdó' bidziilgo áyiił'įįh.

¹⁸Binaalye'é bą́ą́h ílíinii bił bééhózin; bibee hool'iní doo yiniłtséésgóó háagi shį́į́ ayiiłkaah.

¹⁹Ákohgo adiz łeh áádóó néiniishah.

²⁰Diné badahojoobá'íii t'áadoo le'é yaa yiinííł, t'áá aaníí, hojooba' nahas'áanii yaa jooba'go t'áadoo le'é yich'į' kódeile'.

²¹Yas biniinaa ba'áłchíní doo yá nitseedáa da, háálá ba'áłchíní t'áá ałtso éé' łichxí'í bii' dahoneezílígíí yá ádeile'.

²²T'áá bí yii' sitínígíí ałdó' ádá ííł'į́; bi'éé' áłts'óózígo yisdizígíí bee na'at'ą́hí łigaii dits'idgo ályaii áádóó tsídídééh nahalingo łichí'ígíí bił bee ályaa.

²³Dáń'dítį́įhgi bahastiin éí kéyahdóó hastóí danilíinii yił nidaháaztą́ągo béého'dílzin.

²⁴Áłts'óózígo yisdizígíí bee na'at'ą́hí łigaii dits'idgo ályaii yee éé' ádeile'go baa nahaniih, áádóó bee áká da'aszaazígíí naalyéhé yá sidáhí baa nayiiłniih.

²⁵Adziil áádóó ił ídlį́ yee hadít'é, áádóó náás hoolzhishgóó yaa bił nihoozhǫǫh doo.

²⁶Hóyą́ągo hahadziih áádóó ajooba' bii' hólǫ́ǫgo éí k'ehgo yáłti'.

²⁷Ba'áłchíní nizhónígo yaa áhályą́, áádóó t'áadoo baa na'ódza'í da nahalingo doo t'óó sidáa da.

²⁸Ba'áłchíní nídiijahgo bił jílį́įgo hach'į' yádaałti' łeh; hahastiin ałdó' ákót'éego haa haniih łeh.

²⁹Nihokáá'góó asdzání t'óó ahayóí yá'át'éehgo ádaadzaa, nidi ni t'éiyá biláahgo ánít'é.

³⁰Baa dzólníinii éí na'adlo' át'é, índa ayóó ánóolninii éí t'áadoo biniyéhí da, nidi asdzání éí Bóhólníihii yidósinígíí baa ha'niih doo.

³¹Bíla' yee yaa naayáhígíí bee baa hóniih áádóó t'áá bí binaanish áyoolíłígíí yah ada'iiztiingóó bee baa ha'niih le'.