Read Navajo PROVERBS 4 Bible Online

PROVERBS 4 - Navajo bible

PROVERBS 4

¹Áłchíní danohłíinii, nihizhé'é nanihinitinígíí deísínółts'ą́ą́', áádóó bik'idi'dootį́įłii nihił béédahodoozįįł biniyé bíndahołtsaad.

²Háálá yá'át'éehgo bee na'nitinii bee nanihinítą́ą́'; bee nanihinítą́ą'ii yóó'adadooh'ááł lágo.

³Jó, shí ałdó' shizhé'é biye' nishłį́įgo, t'ah dinisht'ódígo t'áá shí t'éí shimá ayóó'áshó'níí nít'ée'go,

⁴shizhé'é nashineeztą́ą'go áshidííniid, Háni'dii nijéí éí shizaad ádíyóltą'; shibik'eh ó'oo'níiłii bik'eh honíł'į́, áko hinínáa doo.

⁵Hódzą́ shóiníłt'eeh; bee ak'i'diitįįhii shóiníłt'eehgo doo beidiyíínah da; shizaad disíníts'ą́ą'ii doo bits'ádíínáał da.

⁶Yóó'adóó'ááł lágo, áádóó hódzą́ áá nidoosįįł; ayóó'ííní'níi doo, índa naa áhályą́ą doo.

⁷Díí hódzą́ bee deezt'i'ii át'é: bee hódzáanii shóiníłt'eeh, índa t'áá át'é nishóhoołt'eehii bee ak'idi'yiitįįhii atah shóiníłt'eeh.

⁸Ił nilį́įgo ánílééh, áádóó ił nílį́įgo ándoolííł; hódzą́ bizéésínínii'go diné ílíinii nílį́įgo ándoolííł.

⁹Ajooba' nitsiinázt'i'go ándoolííł; naat'á ch'ah ayóó ánóolninii neidoo'ááł.

¹⁰Shoo, shiye' nílíinii, ádíshníinii diits'į́įhgo bee ádiih tsíníkees, áko t'óó ahayóí néédoohah.

¹¹Hódzą́ át'éii bínaniníłtą́ą́'; t'áá ákogi át'éego da'nítiingóó ná tádííyá.

¹²Hidínááhgóó doo díníítł'ah da, áádóó náhidiilyeedgo doo didíígoh da.

¹³Bínaniníłtą́ą'ii ts'ídá yéego yiiłtsóód; bidóóchííd lágo, baa áhólyą́, háálá bee hinínáanii át'é.

¹⁴Doo yá'ádaashóonii bikék'edóoya' lágo, áádóó diné doo yá'ádaat'éehii yaa nidaakaii bikék'edóoya' lágo.

¹⁵Bits'ąą ádaa áhólyą́; doo bíighah dah didíínáał da; bits'ánínááh, áádóó t'áá náás yínáał doo.

¹⁶Háálá doo da'oołháásh át'ée da, doo ákǫ́ǫ́ ádaat'įįhgóó índa da'iiłhosh; ła'da ádił asiihgo ádayiił'įįhgo índa da'iiłhosh, éí doodaléi' doo da'ałhosh da.

¹⁷Háálá bááh deiyą́ nahalingo doo yá'áshóonii bił daalkan áádóó wáin deidlą́ nahalingo doo ats'ííd adeisłį́.

¹⁸Nidi diné t'áá ákogi ádaat'éii deíkáahgo éí hool'įįhdóó jį́įgo adidi'áhígíí nidahalin yileeh.

¹⁹Diné doo yá'ádaashóonii chahałheełgóó deíkáahgo yik'ee dahidigeehii doo bił béédahózin da.

²⁰Shiye', shizaad nabíhíłtsaad; ádíshnínígíí yíníłts'ą́ą́'.

²¹Yóó'adóó'ááł lágo; nijéí tł'áahdi hasht'e'nihidí'nííł.

²²Háálá yik'ídahakáahii t'áá ałtso iiná bá át'é, índa dabits'íís t'áá át'é nídeiłdziihgo doo bąąh daatééhgóó áyósin.

²³Ts'ídá haleebee nijéí baa áhólyą́, háálá éí biyi'dóó iiná dahidit'ééh.

²⁴Nahagizgo yáníłti'ígíí nahjį' nidiní'aah, índa t'áá naaki nahwiiláago yáníłti'ígíí doo deeghánígóó áts'ádinít'aah.

²⁵Háni'dii t'áá náás díní'į́į́' índa t'áadoo nanighalí; náásgóó k'éhézdon díní'į́į́'.

²⁶Yínááłgóó hazhó'ó bik'ítsííłkos, áádóó t'áá ałtsogóó hidínáahgo t'áá ákóne' nané'éłniih doo.

²⁷Nish'náajigo dah doóya' lágo, doodaii' nishtł'ajigo dah doóya' lágo; doo yá'át'éehii bits'ánínááh.