Read Navajo PROVERBS 6 Bible Online

PROVERBS 6 - Navajo bible

PROVERBS 6

¹Shiye' nílíinii, bił kééhót'íinii béeso ba'í'nilgo t'áá aaníí niná' doodléełgo bá nízhi' íinilaago, dé'éyóní nilíinii bił ahíláłk'ee díínílnii'go,

²saad bee háínídzíi'ii nizlohgo, saad bee háínídzíi'ii bee ni'disdlohgo,

³k'ad kónínééh, shiye', bił kééhót'íinii bílák'éínítłizhígíí biniinaa bits'ánílyeed; nílááh, ádaa hojiinílba'ígo bił kééhót'íinii bich'į' dínáahgo áadi ádaa ná'iinikąąh.

⁴T'áadoo íłhoshí; t'áadoo nínílch'ilí.

⁵Naalzheehii éí jádí bits'áhályeedígi át'éego bits'ánílyeed, índa tsídii yá nináda'a'niłii bits'ą́ąjį' tsídii bits'áhát'ahígi át'éego bits'ánílyeed.

⁶Nił hóyée'ii, nílááh, wóláchíí' bich'į' dínáahgo yaa naagháhígíí nabik'ítsíníłkees áádóó honíyą́ą le'.

⁷Wóláchíí' náás boo'ishii ádin, áádóó aláahgo bik'i déez'į́į́' dooleełii ádin índa binanit'a'í ádin.

⁸Yiyíłkiin dooleełii shį́įgo náyiiláa łeh, áádóó da'agizhjį' ahalzhishgo éí bich'iyą' áłah áyiił'įįh.

⁹Nił hóyée'ii, haa nízáadgishą' adíníłhaazh? Hahgoshą' índa ch'éédíídziłgo nídidíí'nah?

¹⁰T'óó kónígháníjį' náá'iideeshhosh, t'óó kónígháníjį' anáádínéeshyił, t'óó kónígháníjį' shijaat'ah díníshnii'go adínéeshyił, diníinii,

¹¹ákónít'į́įgo agha'ii'níiłii nahalingo té'é'į́ nik'i hwiidooleeł, áádóó té'é'į́ éí diné bee na'abaahii neijaahgo haatįįh yíyá nahalin doo.

¹²Be'ádíláahgo doo yá'áshǫ́ǫ́góó naagháii ák'eh hal'į́įgo yáłti'.

¹³Éí diné bináák'is ánáyiil'įįh; bikee' yee na'é'égizh, bíla' yee naałchid;

¹⁴bijéí tł'áahdi ák'eh ha'į́ hólǫ́; t'áá áłahíjį' doo yá'át'ééh áhodoonííł yinaha'á; diné yił dahodiiłtáahgo naaghá.

¹⁵Éí diné t'áadoo hooyání atídoolnííł; t'áadoo hooyání doo hasht'éého'dólne' át'éedi atíhodi'doolnííł.

¹⁶Hastą́ągo t'áá aaníí díí tsosts'idgo haz'ą́ Bóhólníihii yijoołxáago doo yíłdin da:

¹⁷ádaa dzódlíii, biyooch'íidgo yáłti'ii, t'áadoo át'éhígóó naagháii neiłtsxeedgo bidił dahidinéehii,

¹⁸diné bijéí tł'ááhdę́ę́' doo yá'áshǫ́ǫ́góó hahwii'aahii, haneetehee ádílááh yíkadilts'i'ii,

¹⁹aa hwiinít'į́įgi t'áá ádzaagóó ak'ihodii'aahii, índa ałk'isgóó dandlíinii yił hááhoniłcha'ii éí Bóhólníihii bijoołxá.

²⁰Shiye', nizhé'é bibik'eh ó'oo'níiłii bik'eh honíł'į́, áádóó nimá naninitinii yóó'adóó'ááł lágo.

²¹T'áá áłahjį' nijéí tł'áahgi hólǫ́ǫgo íínísin, áádóó nizééneelzhee'go ánílééh.

²²Yínáałgo noolóos doo; íłhoshgo nik'i déez'į́į' doo; ch'ééhídzíidgo nich'į' yáłti' doo.

²³Háálá bik'eh ó'oo'níiłii éí bee hool'iní át'é, áádóó bee haz'áanii éí adinídíín át'é, áádóó nich'ahodishkéego nandi'nitinii éí iiná bá honít'i'ii át'é.

²⁴Áko asdzání doo yá'áshóonii, asdzání doo bééhonísinii bizaad łikango yáłti'ii yits'ąą naa áhályą́ą doo.

²⁵Ayóó ánoolnin nidi nijéí biyi'dóó t'áadoo bidáninilníní, índa bináá' yee nółnééł lágo.

²⁶Háálá diné ła' ałjiłnii bíkazhnigo'go hahojoobá'í áhodoolííł, áádóó asdzání adiléii iiná ílíinii deeshchxǫǫł nízingo haintá.

²⁷Dinéésh ła' kǫ' ádíiyiiltsoodgo bi'éé' doo didoolił da?

²⁸Éí doodaii' dinéésh ła' tsííd bikáá' nijiyáago doo hakee' jididoołił da?

²⁹Diné ła' bił kééhojit'íinii be'asdzą́ą́ bił yah ajííyáago ákóhodi'doolnííł; t'áá háiida éí asdzání baa nídzíst'įįdgo atíhodi'doolnííł.

³⁰Ani'įįhii dichin nilį́įgo, hwiih dooleeł biniyé aneez'į́į'go diné doo dabiiłkóoh da,

³¹nidi bééhoozįįhgo tsosts'idi ahą́ą́h nániilá bíighahgo niná'doodlééł; bighan góne' hólóonii t'áá ałtso eidoonił.

³²Nidi diné ła' azhdííláago bee ak'i'diitįįhii hwee ádin; t'áá hó shii' sizíinii deeshchǫǫł nízinii ákót' į́.

³³Tíhodi'doolnííł áádóó doo ił jílį́į da dooleeł, índa t'óó bee haa yáhóósįįdii doo baa hodiyoo'nah da.

³⁴Háálá ahastiin nilíinii łe'dí'nóozįįłgo báhodoochįįł; éí bąągo bainíłką́ągo doo haisti'góó k'ééhodidoodlííł.

³⁵Nályééh doo bił sih da doo, índa azhą́ bee naho'diiniihii daashíínéelą́ą́' baa nínííł nidi doo k'é nándidoo'niił da.