Read Navajo PROVERBS 7 Bible Online

PROVERBS 7 - Navajo bible

PROVERBS 7

¹Shiye' nílíinii, shizaad bik'eh honíł'į́, áádóó shibik'eh ó'oo'níiłii ádííníltą'.

²Shibik'eh ó'oo'níiłii ádííníltą'go hiníná; nináá' baa áhólyánígi át'éego bee na'nishtinii éí íiyisí bik'ehgo hinínáanii át'éego íínísin.

³Éí níla' bik'ídeesdiz le'; nijéíkáa'gi bee bik'ida'íłchi'.

⁴Hódzą́ kóbidiní, Shilah nílį́, áádóó bee ak'i'diitįįhii éí asdzání nik'éí nilį́įgo yínízhí.

⁵Áko asdzání ałjiłnii éí ayóní nilíinii bizaad łikango yáłti'ii yits'ąą naa áhályą́ą doo.

⁶Háálá shikin biyi'dóó shitsésǫ'gi tsin yistł'ǫ́ǫgo dáádiníbaalígíí biníká dínísh'į́į'go

⁷diné doo dahóyáanii t'áá bita'ígi ádaat'éii yiiłtsą́; ániid nidaakaii bitahgóó dinééh léi' doo ak'i'diitįįhgóó baa ákoniizį́į́'.

⁸Éí dinééh kintahgóó yigáałgo asdzání doo bééhózinii bikin naanáz'áhígi yíighahgi deeyáago asdzání yighanjigo dah diiyá,

⁹éí nídadi'deeshchii'go, i'íí'ą́ągo, hiłiijį́į́'dóó chahóółhéelgo;

¹⁰nít'éé' asdzání éí ałjiłnii k'ehgo hadít'éii índa bijéí biyi'dóó nítséékosii hadááh níyá, jó'akon.

¹¹Ayóo yádíłtih índa t'áadoo yaa yánízinígóó bíighahígi át'é; hooghangi doo hasht'e'sidáa da;

¹²tł'óó'góó dah náánéiteeh, kintahdi nináánádáah łeh, kin naanídaaz'áágóó aa nááhéesdáah łeh.

¹³Áko éí asdzání bizajííyá, áádóó hazts'ǫs, índa t'áadoo hach'į' yáníziní áháłní,

¹⁴Hózhǫ́ǫ́jí náádahaniihii shee hólǫ́; díí jį́ ádee hadeesdzíí'.

¹⁵Éí bąągo nidááh deeshááł biniyé aadę́ę́' dah diiyá; t'áá shizááká níkanishtáá nít'éé' nik'íníyá.

¹⁶Tsásk'eh bik'ídaasti'í; éí Ííjip kéyahdę́ę́' na'at'ą́hí łigaii dits'idígíí nidaashch'ąą'ii shibikáá' dah antéhí bik'ídasíłti', na'at'ą́hí łigaii dits'idígíí bik'ídasíłti'.

¹⁷Shibikáá' dah antéhí éí jeeh łikání halchinii mir wolyéii, áádóó álooz wolyéii, índa sínaman wolyéego łikání halchinii bąąh ádaashłaa.

¹⁸Hágoshį́į́, hoos'įįjį' ahi'iiljiłgo nei'néego shiitéezh doo; haa'íshą' ahi'iiljiłgo bee ałk'i hwiilta' doo.

¹⁹Háálá hastiin doo sidáa da, nízaadgóó ííyá;

²⁰béeso ła' azis yee ayííłtsooz, áádóó hanííbą́ązgo nádááh.

²¹T'áá łą́ą́góó nizhónígo hach'į' yáłti'go t'áá tídzí'ahída íizniizį́į́'; bizaad łikango hach'į' yáłti'ígíí yee háni' áhoolaa.

²²Béégashii naatseedjį' béégashii eedlózígíí nahalingo, éí doodaléi' diné doo áhályáanii akétsíín niná'niłí biih bi'doodlózígi ádziidzaa;

²³hazid éí k'aa' bighálzi'ígi ádzaa; tsídii éí bee ódleehí yiih yíyáhígi át'éego hwe'iina' yiniyé át'į́įgo doo baa áhojilchįįh da.

²⁴Éí bąą shiyázhí danohłíinii, dashíínółts'ą́ą́'; saad bee yáshti'ígíí deísínółts'ą́ą́'.

²⁵Áádę́ę́' yee át'éii yee níni' ná'áhólééh lágo; bikék'edóoya' lágo.

²⁶Háálá diné t'óó ahayóí atíyiilaa; t'áá aaníí diné t'óó ahayóí ayóó ádabóodziilii yiyííghą́ą́'.

²⁷Bighandóó hool'áágóó ti'hoo'nííh góyaa atiin; anoonééł bá nahaz'ą́ą́ góyaa e'etiin.