Read Navajo PROVERBS 8 Bible Online

PROVERBS 8 - Navajo bible

PROVERBS 8

¹Hódzą́ éí dilwosh. Bee ak'i'diitįįhii éí nahwiiniih. T'áá aaníí ya'?

²Wók'ą́ągi atiin bąąhgóó ałná'ooztiingi sizį́į łeh.

³Kintah góne' ada'iiztiingi nidilghaash łeh; dáń'da'ditį́į́hgóó chánahgo yáłti'

⁴kóníigo, Diné danohłíinii, nihich'į' ádíshní; diné danilíinii dabiye'ké bich'į' yáshti'.

⁵Doo dahonohsáanii, hódzą́ nabik'ítsáhákeesii bik'ida'doohtįįh, áádóó doo dahóyáanii danohłíinii, ak'ida'doohtįįh.

⁶Da'íísółts'ą́ą́', háálá ayóó ádanóolninii bee nihich'į' yádeeshtih, áádóó nihich'į' yáshti'go t'áá ákogi ádaat'éii éí dadoohts'a' dooleeł.

⁷Háálá t'áá aaníinii t'éiyá bee yáshti' doo; doo yá'áshǫ́ǫ́góó yáti' t'éiyá doo shił aaníi da.

⁸Saad bee hahasdziihígíí éí t'áá ałtso t'áá ákogi ádaat'é; saad bee ák'eh ha'íinii, doodaii' saad naagizii doo éí ádaat'ée da.

⁹Éí t'áá ałtso diné ak'idi'yiitįįhii bich'į' ííshjání danilį́, índa ił ééhózin nishódayoołt'eehii bił t'áá da'áko.

¹⁰Bínaninishtinígíí nídiilé, béésh łigaii éí dooda; ił ééhózin nídiilé, óola bitahaasdláa'ii éí dooda.

¹¹Háálá nitł'iz ałtaas'éí bilááh át'éego hódzą́ yá'át'ééh, áádóó ha'át'íhída bídin ídlíinii t'áá ałtso t'áá nída'íí'oh.

¹²Hódzą́ nishłíinii bee hódzą́ yee át'éii bił kééhasht'į́, índa ił ééhózin áádóó nihodiit'aah ádaat'éii shił nibééhwiizįįh.

¹³Bóhólníihii jidósinii éí doo yá'áshóonii jijoołxáii át'é; ádaa ha'niih áádóó ádíhólnííh áádóó doo yá'át'éehii bił dahonít'i'ii índa saad bee ák'eh ha'į́ jooshłxá.

¹⁴Na'nitin áádóó hódzą́ ts'ídá yá'ádaat'éehii éí shí; ak'idi'yiitįįhii nishłį́ áádóó adziil shee hólǫ́.

¹⁵Shí shinahjį' aláahgo naat'áanii danilíinii dahwée'aah, áádóó ałdó' shí shinahjį' naat'áanii danilíinii t'áá ákogi áhodooníiłgo hadahadziih.

¹⁶Shí shinahjį' naat'áanii danilíinii áádóó aghá dahideezíinii, t'áá éí nihokáá'góó ándahwii'aahii t'áá ałtso, shí shinahjį' nidant'á.

¹⁷Ayóó'ádashijó'níinii ayóó'ádahósh'ní, áádóó t'áá hahígo shíkadantáii shik'ídahidookah.

¹⁸Yit'íinii índa ił ídlį́ shee hólǫ́; t'áá aaníí, yódí ałtaas'éí dadina'ii índa t'áá ákogi ádaat'éii shee hólǫ́.

¹⁹Shineest'ą' éí óola biláahgo yá'át' ééh; t'áá aaníí, óola bąąh nídoolyį́į'ii biláahgo yá'át'ééh; shá bilááh násdlį́į'ii éí béésh łigaii bitahaasdláa'ii biláahgo yá'át'ééh.

²⁰T'áá ákogi át'éego áhoot'éégóó índa doo haada yit'éii bee dahonít'i'góó yishááł.

²¹Áko ayóó'ádashó'níinii badadi'yoodi łígíí biyódí bá dahooghangóó yódí hadadeezbingo ádadeeshłííł.

²²Hodeeyá bilááhdę́ę́' Bóhólníihii bíí' nishłį́; t'ah doo t'áadoo le'é íílééhdą́ą́' bíí' nishłį́.

²³Hool'áádę́ę́' hasht'e'nishi'deelkid; hodeeyáádę́ę́', doodaii' t'ah doo nahasdzáán álnééhdą́ą́' honishłǫ́.

²⁴Tónteel t'ah ádindą́ą́' áádóó tó hadaazlį́į́góó tó t'ah doo hadaanééhdą́ą́' yit'íní áshi'diilyaa.

²⁵Dził t'ah doo ádaalnééhdą́ą́', dah daask'idígíí t'ah doo ádaalnééhdą́ą́' yit'íní áshi'diilyaa.

²⁶T'ah doo nahasdzáán íílééhdą́ą́', kédaayahii t'ah doo íílééhdą́ą́', nahasdzáán bikáá'dóó łeezh t'ah doo íílééhdą́ą́' honishłǫ́.

²⁷Yót'ááh hiníláii áyiilaadą́ą́' ákwii honishłǫ́; tónteel ahééhiníyį́įgo áyiilaadą́ą́' ákwii honishłǫ́.

²⁸K'os dah deílzhoodgo áyiilaadą́ą́', tó lą'í hadaazlį́įgo áyiilaadą́ą́' honishłǫ́.

²⁹Bóhólníihii bibee haz'áanii éí tó bik'eh dahół'į́į dooleełgo, T'áá kódíjį' tónteel nihiníyį́į dooleeł, dííniidą́ą́' honishłǫ́; nahasdzáán niłdzilgo niiní'ą́ą́dą́ą́' honishłǫ́.

³⁰Naanish yiyiichįįhii nishłį́įgo bíighahdóó honishłǫ́ǫ́ nít'éé'; t'áá áłahjį' bidááhdóó shił hózhǫ́ǫgo shaa bił nihoozhǫǫh nít'éé'.

³¹Diné kéédahat'į́į́góó shił nihoozhǫǫh áádóó dine'é danilíinii baa shił nihoozhǫǫh.

³²Áko k'ad shiyázhí danohłíinii, dashíínółts'ą́ą́'; ádíshníinii bik'eh dahojíł'íinii éí hak'idahojidlí.

³³Bínanihinishtinii deísínółts'ą́ą'go dahonohsą́ą doo, áádóó doo dadínóosįįłígíí éí dooda.

³⁴Shighan bich'é'étiingi t'áá ákwíí jį́ diné shíká déez'į́į'ii, shighan bidáádílkałgi shiba' sidáii, shíists'ą́ą'ii díí lą́ą bik'ihojidlí ni.

³⁵Háálá diné shik'íníyáii iiná yik'íníyáa dooleeł, áádóó Bóhólníihii hach'oo'níi doo.

³⁶Nidi shich'į' ádił nidziilzíihii éí hwii' sizíinii atíjíł'į́; shik'ee dadiniihii t'áá ałtso aniné ayóó'ádayó'ní.