Read Navajo ECCLESIASTES 1 Bible Online

ECCLESIASTES 1 - Navajo bible

ECCLESIASTES 1

¹David yę́ę biye' aláahgo naat'áanii nilíinii Jerúsalemgi halne'í nilį́įgo díí saad yee hahaasdzíí'.

²T'áadoo nánídlíníii t'áadoo nídandlíní da, ní halne'í, T'áadoo nánídlíníii t'áadoo nídandlíní da; t'áá ałtsoní t'áadoo nídandlíní da.

³Oo'áłígíí biyaagi diné joolnishgo naanish t'áá ałtso baa nijigháhígíí ha'át'íí bee há bilááh nídoodleeł?

⁴T'ááłá'í oochíłígíí ałtso eeldee'go, áádóó náánáła' hanáá'ahidoolchííł, nidi nahasdzáán éí hool'áágóó hólǫ́.

⁵Áádóó ałdó' ha'doo'ááł, áádóó i'doo'ááł, índa haayáhígóó tsį́įłgo ańdoodáałgo áádę́ę́' hanáádoodááł.

⁶Shádi'áahjigo níyol łeh, áádóó naa náyołgo náhookǫsjigo nááníyol łeh; t'áá áłahjį' t'áá ákǫ́ǫ́ hááhidiiyóół, índa t'áá ákǫ́ǫ́ ahééh héyóół.

⁷Tooh danílínígíí t'áá ałtso tónteel biih daazlį́; azhą́ ákót'ée nidi, tónteel doo de adíníl'ąąh da; tooh danílį́įjį' náádanídlį́įh łeh.

⁸Ts'ídá t'áá ałtsoní baa ch'ééh adidááh; diné díí át'éegi doo baa nahojólne' át'ée da; anáá' bee níl'į́į nidi, doo sih da, áádóó ajaa' bee wólts'ą́ą' nidi, doo sih da.

⁹T'áá íídą́ą́' hólǫ́ǫ́ nít'é'ígíí éí t'áá hólǫ́ǫ doo; t'áá íídą́ą́' ádaadzaaígíí éí t'áá ádaaníił doo, áko oo'áłígíí biyaagi náánáła' ániidíii ádin.

¹⁰Łahgo haz'ą́ą́sh t'áá bee ha'doodzih kóhá'níigo, Shoo, díí ániidí? Éíyee' t'áá nihítséedi hoolzhiizh bilááhdę́ę́' t'áá shiidą́ą'dii hólǫ́.

¹¹T'áá íídą́ą́' ádahoodzaii doo béédahaniih da, índa ádahodooníłígíí dahazlį́į́'dóó bik'ijį' nidi, doo béédahodoonih da.

¹²Halne'í nishłį́įgo Jerúsalem kin haal'áagi aláahgo naat'áanii nishłį́įgo Ízrel dine'é binanisht'áá nít'éé'.

¹³Yádiłhił biyaagi t'áá ałtsoní ádahóót'įįdígíí hódzą́ binahjį' shijéí bee hásht'į́įgo ádaa dinisht'ą́. Diyin God éí diné biye'ké ádił ni'íníísh yee na'ádídantaah doogo yeidiní'ą́.

¹⁴Oo'áłígíí biyaagi naanish t'áá ałtso ádaadzaaígíí nééł'į́į'go, jó, t'áá ałtsoní t'áadoo nánídlíní da áádóó níyol ch'ééh bíjílyeed nahalin.

¹⁵Naneeshtł'iizhii doo k'ézdon óolne' át'ée da, áádóó bídin ídlíinii doo wóolta' ánéelą́ą' da.

¹⁶T'áá shí ádił náhweeshne'go ádíshní, T'áá shítséedi Jerúsalemgi nidant'áá nít'éé' yę́ę bilááh át'éego hódzą́ ayóó át'éii shóisíłt'e'; t'áá aaníí, shijéí biyi' ts'ídá ayóó át'éego hódzą́ áádóó ił ééhózin át'é niizį́į́'.

¹⁷Áko hódzą́ áádóó áhodiigis índa doo hóshkał shił bééhodoozįįł biniyé shijéí baa diní'ą́, áko díí ałdó' níyol ch'ééh bíjílyeed nahalinígíí baa ákoniizį́į́'.

¹⁸Háálá t'áá íiyisí hojiyąąhgo yínííł ałdó' yiląąh áádóó lą'ígóó hoł ééhoozįįhgo yínííł nitsaii ałdó' k'ee'ąą dilzhish.