Read Navajo ECCLESIASTES 11 Bible Online

ECCLESIASTES 11 - Navajo bible

ECCLESIASTES 11

¹Nibááh táłkáa'jį' ahíłhan áádóó łą'í yiską́ą́dóó bik'ijį' bik'ídíníítááł.

²Diné tsosts'id yilt'éego, éí doodaléi' tseebílt'éego ba'dííłtsoł, háálá nahasdzáán bikáa'gi doo yá'át'ééhgóó áhodooníiłii doo nił bééhózin da.

³K'os éí tó dah deíyeehgo nahasdzáán bikáa'jį' níłtsą́ nináłtį́į́h áádóó shádi'áahjigo, doodaii' náhookǫsjigo t'iis naa'anííkaadgo t'áá naa'anííkaadígi sitą́ą doo.

⁴Níyolgo baa ákoznízinii doo k'ezhdi'dooléeł da, áádóó k'osgo baa ákoznízinii doo azhdooyish da.

⁵Níłch'i deezt'i'dę́ę́' doo nił bééhózinígi át'éego áádóó asdzání yiltsą́ągo awéé' yééltsánígíí bits'in nooséełii doo nił bééhózinígíigi át'éego, t'áá éigi át'éego Diyin God t'áá ałtsoní áyoolíiłii binaanish nilíinii doo nił bééhózin da.

⁶Abínígo k'éé'dídlééh áádóó e'e'áahjį' ałdó' binanilnish, háálá dínóosééł áádóó dínóot'į́įłii, díí daats'í, éí doodaii' níléí daats'í, éí doodago t'áá áłah daats'í t'áá aheełt'éego nizhóní dooleełígíí doo nił bééhózin da.

⁷T'áá aaníí, adinídíín nizhóní áádóó anáá' éí jį́honaa'éí i'dííłdíingo bił yá'át'ééh.

⁸Diné hináago t'óó ahayóí binááhaigo bíni'dii t'áá ałtso yaa bił nihoozhǫǫh, nidi chahałheeł bik'iidooldohígíí yénálniih, háálá éí t'óó ahayói doo; éí t'áá ałtso nidahwiileehígíí t'áadoo nídandlíní da.

⁹Dinééh nílíinii, ániid nanináhígíí baa nił hózhǫ́ áádóó ániid nanináago níyoołkáłígíí nijéí bił hóshǫ́ǫ le'; nijéí yídin nilíinii áádóó nináá' bee yíní'íinii bik'ehgo yínááł, nidi díí biniinaa naa náhódóot'įįłjį' Diyin God andoolósígíí nił bééhózin le'.

¹⁰Éí bąągo yínííł nijéí bits' ą́ąjį' kónílééh, áádóó nits'íís yidoołchǫǫłii bits'ádiní'aah, háálá áłchíní jílínígíí áádóó ániid na'adáhígíí t'óó kónígháníjį' át'é.