Read Navajo ECCLESIASTES 12 Bible Online

ECCLESIASTES 12 - Navajo bible

ECCLESIASTES 12

¹Doo yá'áshóonii t'ah doo beíłkaahdą́ą́' nináháháahgo yítih dooleełígíí t'ah doo baa hoolzhííshdą́ą́', Doo bíneeshdlį́į da, t'ah doo diniihdą́ą́', t'ah ániid nanináhídą́ą́' Ániilaii béénílniih;

²jį́honaa'éí áádóó adinídíín, áádóó ooljéé' índa sǫ' t'ah doo bi'oh chahałheeł haleehdą́ą́' áádóó ahóółtą́ą́dóó bik'ijį' t'ah doo k'os nááhádleehdą́ą́';

³kin yaa ádahalyáanii bitah dahoditłid daazlį́į'di áádóó diné dabidziilii danilíinii yaa daazhahgo nidaakai daazlį́į'di áádóó bee ak'áhí t'áá díkwíigo biniinaa doo bee da'ak'áa da daazlį́į'di áádóó datsésǫ'dóó dadéez'į́'ígíí t'óó bił chadahóółhéeldi;

⁴kintah atiingóó dáádílkał dáda'deeskaaldi áádóó bee ak'áhí doo wózhǫ́ dadiits'a' da daazlį́į'di áádóó tsídii ádííniidgo ła' nízhdidoo'nah índa sin nizhónígo diits'a'ígíí éí doo hózhǫ́ diits'a' da silį́į'di Ániilaii béénílniih.

⁵Áádóó ałdó' daniinahígíí yéédaaldzid doo, áádóó dayíkááhgóó yéé' dahólǫ́ǫ doo, áádóó tsin sikaadii álman wolyéhígíí bílátah da'iidoogah áádóó nahachagii t'óó naa'na' doo, índa laanaa hwiindzinii nidínóołnah, háálá diné hool'áágóó bighan dooleełgóó ííyá índa yínííł danilį́įgo atínídadindleehii kintaa aztiingóó tádadikáah doo.

⁶Béésh łigaii bee tł'óół ályaii t'ah doo k'ídlaadą́ą́', éí doodaii' óola łeets'aa' nímazí t'ah doo yiits'iłdą́ą́', éí doodaii' tó bee naat'áhí éí tó hahadleehgi t'ah doo yiits'iłdą́ą́', éí doodaii' tó bee hahadleehí t'ah doo k'é'éltǫ'dą́ą́' Ániilaii béénílniih.

⁷Áko t'áá átséédą́ą́' át'éhígi át'éego nahasdzáán biyi'jį' łeezh łibáhí nídoodleeł áádóó Diyin God éí níłch'i ii' sizíinii ainíláii bich'į' nídoodleeł.

⁸T'áadoo nánídlíníii, t'áadoo nídandlíní da, ní halne'í; t'áá ałtsoní t'áadoo nídandlíní da.

⁹Áádóó t'ah nááyówehígo halne'í hóyánígíí bąą diné ił ééhózin t'ahdii yee yich'į' yáłti'; t'áá aaníí, saad nawólta' ts'ídá hazhó'ó baa nitsídzízkéézdóó haa lá yit'éego dooleeł lá jinízingo nabik'ítsídzízkéezgo lą'í ałkéé' nizhnínil.

¹⁰Saad da'ílį́įgo nidzinii yíká áát'įįd áádóó saad t'áá ákogi ádaat'éii índa t'áá aaníinii bee ak'e'doolchííł biniyé halne'í nilíinii naa yik'ítséskééz.

¹¹Dahóyáanii dabizaad éí béésh bee adilzhishí nidahalin, áádóó saad nawólta' áłah ályaaígíí éí ił adaalkaałí niłdzilgo eelkaalígíí nahalin; t'ááłá'í dibé yaa áhályáanii bits'ą́ą́dę́ę́' ályaa.

¹²T'ah nááyówehgo, shiye', éí bee ni'nishnííh: lą'í naaltsoos bikáá' ak'ida'doolchíiłgo nidadoo'niłígíí doo bá nihonít'i' da, áádóó łą'ígóó íhojiił'aahgo bąą nízhdínídááh.

¹³Díí t'áá ałtso dazdiizts'ą́'ígíí éí kót'é: Diyin God díínísin, áádóó bibik'eh ó'oo'níiłii bik'eh honíł'į́, háálá díí diné t'áá ałtso bee bá haz'ą́.

¹⁴Háálá Diyin God éí baa nida'aldeehii t'áá ałtso, nidanil'inii t'áá ałtso t'áá bił, yá'ádaat'éehii, doodaii' doo yá'ádaat'éehii éí yee aa nídóot'įįł.