Read Navajo ECCLESIASTES 2 Bible Online

ECCLESIASTES 2 - Navajo bible

ECCLESIASTES 2

¹T'áá shiyi'ídi ádíshní, Baa nił honeeninii bee nééhodeesįįł, áko t'áá íiyisí baa honeenigo baa nił hózhǫ́ǫ doo. Jó, díí ałdó' t' áadoo nánídlíní da.

²Dloh hasin éí áhodiigis, áádóó honeeni éísh ha'át'íí ííł'į́? dishní.

³T'ahdii shijéí biyi'dóó hódzą́ shoolóosgo, Haa lá yit'éego shits'íís éí wáin bee bił honishǫ́ǫ dooleeł lá, nisingo shintsíkees nisíłkáá', áádóó, Haa lá yit'éego doo hóshkał yideestsoł lá, niizį́į́'. Yádiłhił biyaagi diné ba'áłchíní nida'iisdįįd bijį́įjį' ha'át'íí yá'át'ééh shį́į́ yaa nidaakai dooleeł lá éí shił bééhodoozįįł, niizį́į́'.

⁴Naanish ayóó ádaat'éii íishłaa; kin nidasínil; ch'il na'atł'o'ii ádá k'idadíla'.

⁵Dáda'ak'ehgo áádóó dahootsogo ádahooshłaa índa tsin bineest'ą' nídahoodleełii t'áá ał'ąą ádaat'éii ákwii ádá k'idadíla'.

⁶Tsin danilzéego tsin deíl'áhígíí bitahgóó be'ek'id naazyį́įgo ádaashłaa.

⁷Nidaalte' áádóó asdzání nidaalte' naháłnii' índa shikin góne' naalte' nidahaazhchį́. T'áá shítséedi Jerúsalemgi nidant'áá nít'éé' yę́ę t'áá ałtso biláahgo shá dah da'néelkaad, índa alį́į́' shá dah danéelkaad.

⁸Béésh łigaii áádóó óola índa aláahgo naat'áanii áádóó bił hadahwiisdzodę́ę́' dabiyódí áłah íishłaa; diné dahataałii áádóó asdzání dahataałii nídiinil índa diné yaa bił dahózhóonii t'áá ałtso shóiséłt'e'.

⁹Ákohgo ayóó ánísht'é áádóó t'áá shítséedi Jerúsalemgi nidant'áá nít'éé' yę́ę t'áá ałtso haláahgo asist'įįd; shibee hódzą' ałdó' t'ahdii shee hólǫ́.

¹⁰Áko t'áá ha'át'íhída shináá' bił bidááháníinii nishóhoosht'eeh nít'éé'; bee ił hózhóonii shijéí bich'į' doo baa nishchį' da nít'éé', háálá shinaanish t'áá ałtso shijéí yaa bił nihoozhǫǫhígíí shinaanish bik'é shich'į' naalyáii át'é.

¹¹Ákohgo t'áá shí binshishnishii áádóó shinaanish t'áá át'é baa nisíyáhígíí nééł'į́į́', áko nít'éé' t'áá át'é ts'ídá t'áadoo nánídlíní da, jó'akon, áádóó níyol ch'ééh bíjílyeed nahalin índa oo'á łígíí biyaagi t'áadoo bee bilááh náodle'í da.

¹²Áádóó łahgo át'éego tsínáádíkéezgo bee hódzáanii áádóó áhodiigis índa doo hóshkał nabik'ítsísíłkééz, háálá diné éí aláahgo naat'áanii bikéédę́ę́' aláahgo naat'áanii náádzísdlį́į'ii ha'át'íí baa nizhdoogaał? Jó, t'áá íídą́ą́' ła' daadzaa.

¹³Ákohgo adinídíín éí chahałheeł yiláahgo át'éhígi át'éego bee hódzáanii éí doo hóshkał yiláahgo át'éhígíí shił bééhoozin.

¹⁴Diné hóyáanii bináá' yee ákonízin nidi, doo áhályáanii chahałheeł yii' yigááł áádóó t'áá aheełt'éego bich'į' áhoníiłgo baa ákoniizį́į́'.

¹⁵Ákohgo t'áá shiyi'ídi ádíshní, Doo áhályáanii bich'į' áhodooníłígi át'éego shí ałdó' shich'į' ákóhodoonííł; ákoshą' ha'át'íí biniyé shí t'áá íiyisí honisą́ą́ nít'éé'? Áádóó t'áá shiyi'ídi ádííniid, Díí ałdó' t'áadoo nánídlíní da lá.

¹⁶Háálá doo áhályáanii doo bééhodoonih daígi át'éego diné hóyáanii ałdó' hool'áágóó doo bééhodoonih da; jó, yoołkááłgóó háadida t'óó baa dahoyoos'nahii ádaat'ée dooleeł. Dooládó' diné hóyáanii áádóó diné doo áhályáanii t'áá aheełt'éego ninée da lá!

¹⁷Éí bąągo oo'áłígíí biyaagi naanish baa nida'aldeehígíí doo shił yá'áshǫ́ǫ́góó bąą iiná jooshłxáá nít'éé', háálá éí t'áá ałtso t'áadoo nánídlíní da, áádóó níyol ch'ééh bíjílyeed nahalin.

¹⁸T'áá aaníí, oo'áłígíí biyaagi shinaanish t'áá át'é binshishnishii bits'ą́ą́dóó hazlį́į'ii jiisíłxáá', háálá shikéé' áhásdįįdgo shóisíłt'e' yę́ę shikéédę́ę́' náánáádáałii bíí' dooleeł.

¹⁹Áko éí diné hóyą́ą dooleełgo, doodaii' doo áhályą́ą da dooleełgo háísh bił bééhózin? Ákondi éí oo'áłígíí biyaagi shibee hódzą' bee shéého'dílzinii binahjį' shinaanish daazlį́į'ii t'áá át'é yinant'áa doo. Díí ałdó' t'áadoo nánídlíní da.

²⁰Éí bąągo oo'áłígíí biyaagi naanish t'áá át'é baa nisíyáhígíí t'áá íiyisí shijéí yąąh nahóółkaad.

²¹Háálá hódzą́ bee áádóó ił ééhózin bee índa iichįįh bee diné naashnishgo shóyoost'e'ii t'áadoo yiniyé naashnishii yeididoo'ááł. Díí ałdó' t'áadoo nánídlíní da índa t'áá íiyisí doo yá'áshǫ́ǫ da.

²²Háálá oo'áłígíí biyaagi diné ła' hanaanish silį́į'ii, áádóó t'áá hazááká bíká ájíít'įįdii ha'át'íish bee haadoodił?

²³Háálá yínííł áádóó cha hasin bił hóyoołkááł; t'áá aaníí, tł'ée'go nidi, háni' doo hanályį́įh da; díí ałdó' t'áadoo nánídlíní da.

²⁴Diné ayą́ áádóó adlą́ índa binaanish yaa bił hózhǫ́ǫgo yaa naagháhígíí biláahgo bá yá'ánáánát'éeh dooleełii ádin; díí ałdó' Diyin God bits'ą́ą́dóó hólǫ́ǫgo yiiłtsą́.

²⁵Éí t'áá bídingo háísh bił honeełnigo ayą́ągo yíneel'ą́?

²⁶Háálá Diyin God éí t'áá bí diné yaa bił hózhóonii éí hódzą́ áádóó ił ééhózin índa ił hózhǫ́ yeidii'aah. Nidi ádił ni'iilzíihii áłah áda'ale'go áádóó ałk'i da'deesk'idgo ída'alne'go na'anishii yeidii'aah, áko bik'é nijishnishígíí Diyin God yaa bił hózhóonii yeididoo'ááł. Díí ałdó' t'áadoo nánídlíní da, áádóó níyol ch'ééh bíjílyeed nahalin.