Read Navajo ECCLESIASTES 4 Bible Online

ECCLESIASTES 4 - Navajo bible

ECCLESIASTES 4

¹Áko tsínáádíkéezgo oo'áłígíí biyaagi ałde áhólzin baa nida'aldeehígíí t'áá ałtso háísid nít'éé'; jó, bide ádahólzinígíí dabinák'eeshto' yiiłtsą́, áádóó yee hada'íídóolniiłii ádin, áko bide ádahósinii adziil bee dahólǫ́, nidi bide ádahólzinígíí hadabidi'yoołnihii ádin.

²Ákót'é bąą t'ahdii dahinánígíí biláahgo t'áá íídą́ą́' daneeznáanii bá baa shił hózhǫ́.

³Nidi díí t'áá áłah biláahgo t'ah doo ho'dichíii éí oo'áłígíí biyaagi doo yá'áshóonii baa da'íldéehii t'áadoo jiił tséhíjí há yá'át'ééh.

⁴Áko yéego na'anish índa naanish baa nida'digį' danilíinii t'áá ałtso biniinaa diné ahił kééhat'íinii ahoolch'į́įdgo yiiłtsą́. Díí ałdó' t'áadoo nánídlíní da áádóó níyol ch'ééh bíjílyeed nahalin.

⁵Doo áhályáanii t'óó ałnádéesnii'go té'é'į́ bi'niiłhééh.

⁶Hála' t'áá ałch'ishjí t'áá bizááká bee joolnishgo níyol ch'ééh bíjílyeed nahalinígíí éí biláahgo t'ááłáhíjí hálák'eegi hasyéél hadeezbingo yá'át'ééh.

⁷Ákohgo tsínáádíkéezgo oo'áłígíí biyaagi t'áadoo nánídlíní daígíí yiiłtsą́.

⁸Diné ła' t'áá sáhí naaghá, índa doo ła' bináánáoltą' da; ba'áłchíní áádóó yił háá'áázh doo hólǫ́ǫ da; ákondi binaanish t'áá át'é doo bá nihonít'i' da, doodaii' at'į́į nidi, doo bił sihgóó yiníł'į́, doo nidi kóníi da, Háísh bá naashnishgo baa dahoneeninii bąąh ádísht'į́? Díí ałdó' t'áadoo nánídlíní da; t'áá aaníí, naanish bik'e'íyée'ii át'é.

⁹T'áá łashdilt'éhígíí biláahgo nizhdilt'ééjígo yá'át'ééh, háálá hanaanish silį́į'ii bik'é yá'át'éehii hach'į' ninádoolyééł.

¹⁰Háálá naa'azhníídee'go, t'áá łah dilt'éhí bik'is néididoodzį́į́s, nidi t'áá sáhí nijigháago naa'ajíígo'ii éí doo hojooba' ájíníi da, háálá ła'da háká adoolwołgo náhodidoodzį́įsii ádin.

¹¹Náá'áłdó' nidilt'éego t'ááłáhígóó shitéezhgo ałhee honeesdo doo, nidi t'áá łah dilt'éhígo t'áá sáhígo hait'éegoshą' hwee honeezdo doo?

¹²Áádóó diné t'ááłá'íígíí hach'į' nídiidzáago nizhdilt'éego t'éiyá doo hak'eh hodidoodleeł da, áádóó tł'óół táadi ahą́ą́h nániilyáago éí doo hah k'ídoodlał da.

¹³Aláahgo naat'áanii haastihii doo áhályáanii kót'éego bidi'doo'niiłígíí doo yinízin da silį́į'ii biláahgo dinééh hóyáanii áádóó hojooba' át'éii agháago yá'át'ééh.

¹⁴Háálá azhą́ bee óhólníihgo bił haz'áanii biyi' baa hojoobá'ígo bi'dizhchį́į nidi, aláahgo naat'áanii dooleeł biniyé awáalyaadę́ę́' ch'ínádzá.

¹⁵Oo'áłígíí biyaagi dahináanii t'áá ałtso éí hakéé' góne' dinééh hatsásk'ehgi sizį́į dooleełígíí yił deíkáahgo yiiłtsą́.

¹⁶Dadine'é hahakáhígíí t'áá ałtso doo ninít'i' da; binazhnit'áhígíí t'áá ałtso doo ninít'i' da, nidi akée'di nidahaaskaii doo haa bił nidahoozhǫǫh da doo. T'áá aaníí, díí ałdó' t'áadoo nánídlíní da áádóó níyol ch'ééh bíjílyeed nahalin.