Read Navajo ECCLESIASTES 7 Bible Online

ECCLESIASTES 7 - Navajo bible

ECCLESIASTES 7

¹Yá'át'éehgo ho'dójíigo tłah da'ílíinii biláahgo yá'át'ééh áádóó ła' ho'dizhchínígíí biláahgo dadziztsą́ą́jígo yá'át'ééh.

²Hooghangi ída'azįįdgo jiníyáhígíí biláahgo hooghangi yínííł hólǫ́ǫgo jiníyáájígo yá'át'ééh, háálá diné t'áá ałtso díí bee bá nidahwiizt'i' áádóó dahináanii díí yee ádiih dahwiidiyoo'nił.

³Aníjídlohígíí biláahgo yínííł jílį́į́jígo yá'át'ééh, háálá yínííł joolnii'ígíí daats'í hajéí bá yá'át'ééh.

⁴Diné hóyáanii éí yínííł bá hooghanígíí bijéí yee yaa nitsíkees, nidi diné doo áhályáanii dloh hanáltǫǫhgo bá hooghanígíí bijéí yee yaa nitsíkees.

⁵Diné doo ádahalyáanii nidadi'a'go wólts'ą́'ígíí biláahgo diné hóyáanii hashkéego wólts'ą́ą́'jígo yá'át'ééh.

⁶Háálá ásaa' bii' abézhí biyaagi ch'il deeníní dook'ą́ąłgo dilch'iłígíí nahalingo diné doo áhályáanii anádloh. Díí ałdó' t'áadoo nánídlíní da.

⁷T'áá aaníí diné hóyáanii bide áhólzingo báháchį' ábiił'įįh, áádóó bee nabi'diiniihii éí bibee ak'i'diitįįhii éí yee át'éii ííłdįįh.

⁸Ha'át'íhída hadahat'éhígíí biláahgo t'óó nidahazt'i'jí yá'át'ééh áádóó ádaa hodzódlí biláahgo ha'ahónííjígo yá'át'ééh.

⁹T'áadoo hání síní'ání, háálá diné doo ádahalyáanii áháchį' bii' dahólǫ́.

¹⁰Ha'át'íí lá bee át'éego díí yoołkáłígíí biláahgo nahdę́ę́' yoołkááł yę́ę yá'át'ééh nít'éé' lá? t'áadoo diníní, háálá díí éí doo áháyą́ą́góó na'ídíłkid át'é.

¹¹Hódzą́ éí hwíí' dooleełii biłgo ílį́, áádóó binááł háá'át'áahgo hódzą́ bił bídayéełkaahii t'ah yówehgo bá yá'át'ééh.

¹²Háálá béeso ách'ą́ą́h naalyéhígi át'éego hódzą́ ałdó' ách'ą́ą́h naalyéii át'é, nidi ił ééhózin aláahgo yá'át'éehii éí hódzą́ bee dahólóonii yee dahiná.

¹³Diyin God binaanish baa nitsídaohkees, háálá ha'át'íhída digizgo áyiilaii háishą' k'éidoołdǫǫł?

¹⁴T'áá ałtsoní bee ída'azįįd haleehgo baa nił hózhǫ́, nidi nits'ą́ą́jí ne'akǫsgo díí baa nitsíníkees: diné hakéé' áhásdįįdóó bik'ijį' hakéédę́ę́' áhodooníiłii doo hoł bééhózin da dooleełígíí biniyé Diyin God t'áá áłah hólǫ́ǫgo áyiilaa.

¹⁵T'áadoo nánídlínígóó hinínaadę́ę́' t'áá ałtsoní yiiłtsą́. Diné t'áá ákogi át'éii t'áá ákogi ááníiłgo bikéé' áhádįįh, áádóó diné doo yá'áshóonii doo yá'áshǫ́ǫ́góó hináago t'áá náás yołt'ih.

¹⁶T'áá ákogi át'éii t'áá biláahgo t'áadoo t'áá ákogi ánít'éhí, áádóó honíyánígíí t'áá biláahgo t'áadoo honíyą́ ádíínílziní. Ha'át'íísh biniyé t'áá ni atí'ádílnéeh doo?

¹⁷Doo yá'áníshónígíí t'áá biláahgo t'áadoo doo yá'áníshóní, áádóó doo áhólyánígíí t'áá biláahgo t'áadoo doo áhólyání. Ha'át'íísh biniyé ná haz'ánígíí t'áá bich'į' dadíítsaał?

¹⁸Díí bee ádiih tsííníkéezgo la' t'áá íiyisí yá'át'éeh doo, áádóó doo bididííchił da, háálá Diyin God yidósinii díí t'áá áłah yits'ádoogááł.

¹⁹Kin haal'áagi diné neeznált' éego naat'áanii danilínígíí éí biláahgo diné hóyáanii hódzą́ yee bidziil.

²⁰Nahasdzáán bikáa'gi diné t'áá ákogi át'éii éí yá'át'ééh ááníłígíí áádóó doo ádił ni'iisíihii t'áá ádin.

²¹Saad t'áá ałtso bee hada'iidziihígíí ałdó' t'áadoo baa ná'áhodílt'íní, áko ná naal'a'í neinít'į́įgo doo didííts'į́įł da.

²²Háálá nahdę́ę́' t'áá ahą́ą́h t'áá ákót'éego diné baa nánít'į́į́ nít'ée'go nił bééhózin.

²³Díí t'áá ałtso hódzą́ bee bééhózingo áshłaa; Honisą́ą dooleeł, dííniid nidi, doo deeghánídi shits'ą́ądi hólǫ́ǫ́ lá.

²⁴Dahólóonii bi'oh nitsáhákosdi hólǫ́ áádóó bik'idi'dootį́łígíí nantł'a. Háísh éí yik'idi'dootį́į́ł?

²⁵Hadínéeshtaał áádóó hádídéesh'įįł índa ts'ídá ha'át'éego ádaat'éé lá nisingo shił bééhodoozįįł niizį́į́' áádóó doo yá'áshóonii éí doo hóshkał át'éego índa doo áháyą́ éí áhodiigis át'éego shił bééhodoozįįł biniyé shijéí bee hásht'į́įgo ádaa dinisht'ą́.

²⁶Asdzání ła' bijéí łoh áádóó tł'óół yistł'óonii át'éego bíla' éí álátsíín niná'niłí át'éego aniné biláahgo dích'íi'go hadinish'į́į́'; t'áá háiida Diyin God yił hóshóonii éí yits'ádínóochééł, nidi diné ádił ni'iilzíihii éí asdzání azahodínóo'ah.

²⁷Biniinaanii shił bééhodoozįįł nisingo ahąąh nidaashnilgo díí shił bééhoozin, jó'akon, ní halne'í nilíinii.

²⁸Éí lą́ą shii' sizíinii t'ahdii háidéez'į́į́', nidi t'ah doo bik'íninishtáah da. T'ááłáhídi mííl diné ákónéelą́ą'go diné t'ááłá'í hadinish'į́į́', nidi díí ákónéelą́ą'go bitahdóó asdzání t'ah doo ła' bik'íninishtáah da.

²⁹Jó, díí t'éiyá shił bééhoozin, Diyin God éí diné t'áá ákogi át'éego áyiilaa, nidi lą'ígóó t'áá hó bindahodziz'áanii bik'ídazneeztą́ą́'.